ພາກທີ 86
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງເຄີດແລນ, ລັດໂອໄຮໂອ, ວັນທີ 6 ເດືອນທັນວາ, 1832. ການເປີດເຜີຍນີ້ໄດ້ຮັບໃນຂະນະທີ່ສາດສະດາໄດ້ທົບທວນ ແລະ ຮຽບຮຽງການແປພຣະຄຣິສຕະທຳຄຳພີ.
1–7, ພຣະຜູ້ເປັນເຈົ້າໄດ້ບອກຄວາມໝາຍກ່ຽວກັບຄຳອຸປະມາເລື່ອງເຂົ້າເປືອກ ແລະ ເຂົ້ານົກ; 8–11, ພຣະອົງອະທິບາຍພຣະພອນຂອງຖານະປະໂລຫິດສຳລັບຄົນເຫລົ່ານັ້ນທີ່ເປັນທາຍາດຢ່າງຖືກຕ້ອງຕາມກົດໝາຍໃນທາງເນື້ອໜັງ.
1 ຕາມຄວາມຈິງແລ້ວ, ພຣະຜູ້ເປັນເຈົ້າໄດ້ກ່າວດັ່ງນີ້ກັບພວກເຈົ້າທັງຫລາຍຜູ້ຮັບໃຊ້ຂອງເຮົາ, ກ່ຽວກັບ ກຄຳອຸປະມາເລື່ອງເຂົ້າເປືອກ ແລະ ເຂົ້ານົກ:
2 ຈົ່ງເບິ່ງ, ຕາມຄວາມຈິງແລ້ວ ເຮົາກ່າວວ່າ ທົ່ງຄືໂລກ, ແລະ ອັກຄະສາວົກຄືຜູ້ຫວ່ານເມັດພືດ;
3 ແລະ ຫລັງຈາກເຂົາເຈົ້າໄດ້ຫລັບໄປ ຜູ້ຂົ່ມເຫັງທີ່ຍິ່ງໃຫຍ່ຂອງສາດສະໜາຈັກ, ຜູ້ປະຖິ້ມຄວາມເຊື່ອ, ໂສເພນີ, ແມ່ນແຕ່ ກບາບີໂລນ, ທີ່ເຮັດໃຫ້ທຸກປະຊາຊາດດື່ມຈາກຖ້ວຍຂອງນາງ, ຊຶ່ງໃນໃຈຂອງພວກເຂົາ, ສັດຕູ, ແມ່ນແຕ່ຊາຕານ, ນັ່ງຢູ່ເທິງບັນລັງ—ຈົ່ງເບິ່ງ ມັນໄດ້ຫວ່ານເຂົ້ານົກ; ດັ່ງນັ້ນ, ເຂົ້ານົກຈຶ່ງຫຸ້ມຮັດເຂົ້າເປືອກ ແລະ ຂັບໄລ່ ຂສາດສະໜາຈັກເຂົ້າໄປໃນຖິ່ນແຫ້ງແລ້ງກັນດານ.
4 ແຕ່ ຈົ່ງເບິ່ງ, ໃນ ກຍຸກສຸດທ້າຍ, ແມ່ນແຕ່ບັດນີ້ ໃນຂະນະທີ່ພຣະຜູ້ເປັນເຈົ້າພວມເລີ່ມນຳພຣະຄຳອອກມາ, ແລະ ຕົ້ນເຂົ້າພວມປົ່ງໃບ ແລະ ຍັງອ່ອນຢູ່—
5 ຈົ່ງເບິ່ງ, ຕາມຄວາມຈິງແລ້ວ ເຮົາກ່າວກັບພວກເຈົ້າ, ກເຫລົ່າທູດໄດ້ຮ້ອງທູນພຣະຜູ້ເປັນເຈົ້າທັງວັນ ແລະ ຄືນ, ຜູ້ພ້ອມແລ້ວ ແລະ ຄອຍຖ້າທີ່ຈະຖືກສົ່ງອອກໄປ ຂເກັບກ່ຽວຢູ່ໃນທົ່ງ;
6 ແຕ່ພຣະຜູ້ເປັນເຈົ້າໄດ້ກ່າວກັບພວກເຂົາວ່າ ບໍ່ໃຫ້ຫລົກເຂົ້ານົກ ໃນຂະນະໃບເຂົ້າຍັງອ່ອນຢູ່ (ເພາະຕາມຄວາມຈິງແລ້ວ ສັດທາຂອງພວກເຈົ້າຍັງອ່ອນແອຢູ່), ຖ້າບໍ່ດັ່ງນັ້ນພວກເຈົ້າຈະທຳລາຍເຂົ້າເປືອກຄືກັນ.
7 ສະນັ້ນ, ຈົ່ງໃຫ້ເຂົ້າເປືອກ ແລະ ເຂົ້ານົກເຕີບໂຕຂຶ້ນນຳກັນ ຈົນກວ່າເຖິງເວລາທີ່ມັນສຸກເຕັມທີ່; ຈາກນັ້ນ ກ່ອນອື່ນໝົດ ໃຫ້ພວກເຈົ້າເຕົ້າໂຮມເອົາເຂົ້າເປືອກຈາກທ່າມກາງເຂົ້ານົກ, ແລະ ຫລັງຈາກໄດ້ເຕົ້າໂຮມເອົາເຂົ້າເປືອກແລ້ວ, ຈົ່ງເບິ່ງ ແລະ ເບິ່ງແມ, ເຂົ້ານົກຈະຖືກເຕົ້າໂຮມໄວ້ເປັນມັດໆ, ແລະ ທົ່ງເຫລືອຢູ່ເພື່ອຈະຖືກເຜົາ.
8 ສະນັ້ນ, ພຣະຜູ້ເປັນເຈົ້າໄດ້ກ່າວດັ່ງນີ້ກັບພວກເຈົ້າ, ກັບຜູ້ທີ່ ກຖານະປະໂລຫິດໄດ້ສືບຕໍ່ດຳລົງຢູ່ຜ່ານທາຍາດຂອງບັນພະບຸລຸດຂອງພວກເຈົ້າ—
9 ເພາະພວກເຈົ້າເປັນ ກທາຍາດທີ່ຖືກຕ້ອງຕາມກົດໝາຍ, ຕາມທາງເນື້ອໜັງ, ແລະ ໄດ້ຖືກ ຂເຊື່ອງໄວ້ຈາກໂລກກັບພຣະຄຣິດໃນພຣະເຈົ້າ—
10 ສະນັ້ນ ຊີວິດຂອງພວກເຈົ້າ ແລະ ຖານະປະໂລຫິດຍັງສືບຕໍ່ດຳລົງຢູ່, ແລະ ຈຳເປັນຕ້ອງສືບຕໍ່ດຳລົງຢູ່ໂດຍຜ່ານພວກເຈົ້າ ແລະ ທາຍາດຂອງພວກເຈົ້າ ຈົນກວ່າຈະເຖິງ ກການຟື້ນຟູຂອງທຸກສິ່ງທັງປວງ ຊຶ່ງເວົ້າໄວ້ໂດຍປາກຂອງສາດສະດາຜູ້ບໍລິສຸດທຸກຄົນນັບແຕ່ການເລີ່ມຕົ້ນຂອງໂລກ.
11 ສະນັ້ນ, ພວກເຈົ້າເປັນສຸກແລ້ວ ຖ້າຫາກພວກເຈົ້າສືບຕໍ່ຢູ່ໃນຄຸນຄວາມດີຂອງເຮົາ, ທີ່ເປັນ ກຄວາມສະຫວ່າງແກ່ຄົນຕ່າງຊາດ, ແລະ ໂດຍຜ່ານຖານະປະໂລຫິດນີ້, ເປັນພຣະຜູ້ຊ່ວຍໃຫ້ລອດແກ່ຜູ້ຄົນຂອງເຮົາ ຂອິດສະຣາເອນ. ພຣະຜູ້ເປັນເຈົ້າໄດ້ກ່າວເລື່ອງນີ້. ອາແມນ.