Iralaud 9
Kaudiahl kohieng soukohp Sosep Smith ong Oliver Cowdery, nan Harmony, Pennsylvania, Epreil 1829. Oliver alehdi kaweid me en kanangamah oh en itarikihla mahs wia sounnting, nan ansouo, ni sounkawehweh e pahn kin koasoi, oh en dehr song kawehweh.
1–6, Ekei poadoapoad en kawa ko saikinte kawehwehdi; 7–14, Pwuhk en Mormon kawehwehdi sang ni onop oh sang ni kasansal en ngehn sarawi.
1 Kilang, I ndahionguhk, samwa, me pwehki ahmw sohte kawehweh nin duwen dahme ke inangih sang rehi, oh pwurehng tepida wia soun nting ong nei sounpapah, Sosep Smith, Jun., eri I kupwuriki ken peusehlahte lao ke kanekehla poadoapoad wet, me I likih kihonguhk.
2 Eri, kilang, mie ekei nei poadoapoad, me I pahn kihonguhk manaman ken iang sawas kawehweh.
3 Kin kanangamah, samwa, pwe iei e wia eripit ehu rehi, oh e sohte konehng me ke pahn kawehweh nan ansou wet.
4 Kilang, doadoahk me ke malipilipda ken wia iei ken wia sounnting ong nei sounpapah Sosep.
5 Oh, kilang, iei pwehki ahmw sohte peusehla dahme ke tapiadao, ahnsou me ke tepida iang kawehweh, me kahrehda ei kihsanguhk kapai wet.
6 Ke dehr kaulim, samwa, pwehki sang ni ei eripit me I wiahkihonguhk wiepe wet.
7 Kilang, ke sohte wehwehki; ke medewe me I pahn kihonguhk, ni ahmw sohte medewe ken peki mahs rehi.
8 Ahpw, kilang, I ndahionguhk, me ke anahne onopiki mahs nan ahmw madamadau; kowe ahpw peki rehi ma e pahn mwahu, oh ma e pahn mwahu I pahn wiahda ken kehn karakar nan kapehdomwen; eri, ke pahn kehn me e mwahu.
9 Ahpw ma e pahn sohte mwahu ke sohte pahn kehn soangen pepehm kat, ahpw ke pahn ahneki madamadao kasapwurupwur me pahn kahrehda ahmw pahn moanokehla soahngen sapwungo; eri, ke sohte kak ntingihdi dahme sarawi ihte ma e kohwei sang rehi.
10 Eri, ma ke ese met ke pahn kak kawehweh; ahpw, e sohte konehng ken kawehweh ansou wet.
11 Kilang, e kesempwal ansou me ke tepo; ahpw ke peikasal, oh ansouo dauliher, oh e sohte konehng ansou wet;
12 Pwe, ke sohte kilang me I kihongehr nei sounpapah Sosep wen kehlail ehu, eri e mwahulahr wasa sohte itaro? Oh kumwa koaros I sohte soikala.
13 Wia dahme I mahsanihonguhk, oh ke pahn kapaida. Loaloapwoat, oh dehr lohdieng nan kasongosong.
14 Tengediong nan doadoahk me I malipehionguhk, oh sohte ehu pitenwel en mongomw pahn salongala, oh ke pahn pwokpwokdahla ni imwin rahno. Ahmen.