Iralaud 32
Soukohp Sosep Smith alehdi kaudiahl ong Parley P. Pratt oh Ziba Peterson, nan Manchester, New York, ni tepdahn sounpwung en Oaktope nan pahr 1830. Elder kan kehnda oh inangih mehkot laud ong Mehn Leimen kan, me kapaiparail akan kasansaladahr sang nan Pwuhk en Mormon me Mwomwohdisoh esehdahr. Met kahrehda, arail peki rehn Kauno ni karakarahk en ketin kasalehiong irail kupwure ma elder kan pahn konehng pekederla ni ansouo rehn keinek en Mehn Indian kan ni Palikapi. Kaudiahl wet ahpw wiawi.
1–3, Parley P. Pratt oh Ziba Peterson malipilipdahr en kohla kalohkehng Mehn Leimen kan oh en iangih Oliver Cowdery oh Peter Whitmer Jr.; 4–5, Irail pahn kapakapiki ren wehwehki pwuhksarawi kan.
1 Eri met duwen nei ladu Parley P. Pratt, kilang, I ndahiong ih nin duwen ei momour I men en kohla kalohngki ei rongamwahu oh esehla duwen ngehi, oh ahneki mohngiong karakarahk oh mpai.
2 Oh dahme I koasonehdi ong ih iei en iangih nei ladu kan, Oliver Cowdery oh Peter Whitmer, Jun., kohla nan sapwtehno rehn Mehn Leimen kan.
3 Oh Ziba Peterson pahn pili ang irail; oh pein ngehi pahn iang irail kohla oh mihmi rehrail; oh ngehi me wia welieparail rehn Sahmo, oh sohte mehkot pahn kalowehdi irail.
4 Oh irail pahn rong mwahu dahme ntingdio, oh sohte kosoia me re alehdi ehu kaudiahl tohrohr; oh irail pahn kalapw kapakap pwe I en kak kawehwehiong irail dahme ntingdier.
5 Oh irail pahn rong mwahu mahsen pwukat oh sohte mwamwahliki, oh I pahn kapaiada irail. Ahmen.