Pali 78
Soukohp Sosep Smith alehdi kaudiahl nan Kirtland, Ohio, Mahs 1, 1832. Ni rahno, Soukohpo oh ekei kaun kan ahpw tuhpenehr pwe irail en koasoia duwen koasondih kan en Mwomwohdiso. Kaudiahl wet tepte kaweidki Soukohp, Sidney Rigdon, oh Newel K. Whitney en seilokla Misori oh koasonehdi ehn Mwomwohdiso wasahn netinet oh wasahn prindihda pwuhk sang ni kawada ehu “pesines” me pahn kak apwahpwali uwen doadoahk pwukat, kapkapidolong mwohni kan ong kokoudahn Saion oh ong kamwaupen me somwehmweh kan. Pesines wet, me pil kadaniki Pesines en Utuhtpene, me wiawihda nan Epreil 1832 oh kilohsdi nan 1834 (kilang irelaud 82). Ansou kis mwurin koadoahkpe ah wihwiawi, pahn kaweidpen Sosep Smith, lepin mahsen “kemwekid kan en wasahn nahk ong me semwehmwe” ahpw weliankihdi “wasahn netinet oh prindihda pwuhk” me sansal nan kaudiahlo, oh lepin lokaia “pwihn” uhd weliankihdi lepin lokaia “pesines.”
1–4, Souleng kan en koasonehdi oh kawada wasahn nahk; 5–12, Loalokongehng doadoahngki arail dipwisou kan pahn kapitiraila; 13–14, Mwomwohdiso en uhtohrki manaman akan en sampah; 15–16, Michael (Adam) papah pahn kaweidpen me Sarawio (Krais); 17–22, Meidpai irail kan me loaloapwoat, pwe irail pahn sohsohki soahng koaros.
1 Kauno mahseniong Sosep Smith, Jun., ketihtihki: Rong ie mwahu, Kauno ahmw Koht me mahsanih, me kasarawihong samworo lapalap en ei mwomwohdiso, me kapokonei kumwailpenehr;
2 Oh rong kaweid en ih me kasarawi kumwailla sang powe, me pahn mahseniong nan salengomwail kan mahsen en eripit, pwe komour en kak kohdo rehmwail ni soahng kan me kumwail wadongehr mwohi, Kauno Koht me mahsaniher met.
3 Pwe mehlel I mahsanihong kumwail, me ahnsouo leledohr, oh e miher met; oh kilang, oh kilang mwahu, e udahn anahnepe en mie pwihn en nei aramas akan, en kaukaweid oh wiwiahda doadoahk kan en wasahn nahk ong nei aramas semwemweh kan, ong nan wasa kiset oh nan sapwen Saion—
4 Ong wiawihdahn koasondi oh pilahn me pahn poatoapoat oh kohkohlahte ong ei mwomwohdiso, pwe en kalaudehla doadoahkpe, me kumwail inoukidahr, ong komourpen aramas, oh ong lingan en Samemwailo me ketiket nanleng;
5 Pwe kumwail en kak pahrek ong ni inou teng en dipwisou kan en nanleng; ei, oh pil dipwisou kan en sampah, ong alialehdi dipwisou kan en nanleng.
6 Pwe ma kumwail sohte pahn pahrek ni dipwisou kan en sampah kumwail sohte pahn kak pahrek ong alialehdi dipwisou kan en nanleng;
7 Pwe ma kumwail mwahuki Ien ketkihong kumwail wasa ehu nan sampah selestiel, kumwail anahne en kaunopada pein kumwail sang wiewia soahng kan me I ruwesehkin kumwail oh anahne kumwail en wia.
8 Oh met, mehlel Kauno mahsaniher met, iei e konehng me soahng koaros pahn wiawi ni ei lingan, sang kumwail me iang patehng patpene nan pwihn wet;
9 De, pil kak nda, mweidohng nei ladu Newel K. Whitney oh nei ladu Sosep Smith, Jun., oh nei ladu Sidney Rigdon en iang mwohd nan wie kupwur rehn souleng kan me kin mihmi Saion;
10 Pwe ma soh ah Sedan pahn rapahki en kasohpeisang arail mongiong kan sang ni me mehlelo, pwe irail en maskunla oh sohte wewehki soahng kan me kaunopadahr ong irail.
11 Eri, kosonned ehu me I ketkihong kumwail, en kaunopada oh koasoneikumwaildi sang ni inou teng de inou sarawi poatoapoat me sohte pahn kak ohla.
12 Oh mehmen me pahn kawehla e pahn luhsang ah ohpis oh pwukoah nan mwomwohdiso, oh pahn wisiklahng pahn kalokolok kan en Sehdan lao lel rahn en poadoandoaralao.
13 Kilang, iei met kaunopadahuo me I kaunopehng kumwail, oh poahsoano, oh karasaraso me I ketkihong kumwail, me iei me kumwail en kak kapwaiada kosonned akan me kohieng kumwail;
14 Pwe sang ni ei sawas, itarete kahpwal akan me pahn lellohng kumwail, pwe mwomwohdiso en kak uhtohrda pohn soahng kan koaros me mih pahn sampah selestiel;
15 Pwe kumwail en kak kohdahdo ale mwaramwar me kaunopdahng kumwail, oh wiahla kaun en wehi tohto, Kauno Koht mahsaniher, me Sarawio en Saion, me kawadahr poahsoan kan en Adam-ondi-Ahman;
16 Me idiadahr Michael en wia noumwail pirins, oh wiadahr paten neh kan, oh ketkihdahla ih powe, oh ketkihong ih kih kan en komour pahn sawasepen oh kaweidpen me Sarawio, me sohte mie ni tepin rahn akan de imwin mour.
17 Mehlel, mehlel, I mahsanihong kumwail, kumwail seri tikitik kei, oh kumwail saikinte wewehki mwomwen kapai lap kan me Sahmo kolokol nan pein limeh kan oh kaunopadahr ong kumwail;
18 Oh kumwail sohte pahn kakohng soahng koaros ansou wet; ahpw, kumwail koapwoaroapwoar, pwe I pahn kaweid kumwail kowei. Wehio iei amwail oh kapaipeh kan iei amwail, oh pai kan me poatoapoat iei amwail.
19 Oh mehmen me alehda soahng koaros ki kapingkalahngan pahn linganla; oh soahng kan en sampah pahn kapatapatieng ih, iei pahn pak epwiki laudsang, ei, tohtohsang.
20 Eri, wia soahng kan me I ruwesehkin kumwail, amwail Soundor mahsaniher, iei Sapwellimeu Ahman, me kaunopadahr soahng koaros mwohn e pahn malipeiuk;
21 Pwe kumwail iei mwomwodihso en Mesenih, oh e pahn ketin waikumwaildahla nan dopwek ehu, oh ketkihong emen emen aramas kisakis me e kodoahkehda.
22 Oh ih me kin loaloapwoat oh sounpapah loalekong pahn sohsohki soahng koaros. Ahmen.