Irelaud 69
Soukohp Sosep Smith alehdi kaudiahl nan Hiram, Ohio, Nohpempe 11, 1831. Rikirikpenehn kaudiahl kan ong ni pilahnen en ntingda ansou keren ahpw kamanamanlahr nan kapokon kesempwal ehu me wiawi Nohpempe 1–2. Ni Nohpempe 3, kaudiahl me sansal wasaht iei irelaud 133, mwuri e ahpw kadaniki Iren Kapatapat, me kapatapatieng. Oliver Cowdery idihdahr mwowehu pwe en wahla doaropwehn kaudiahl rikirikpeneh kan oh kosonned akan nan Independence, Misori, pwe en pirinda. E pil ni ansouohte wahda mwohni kan me toweh kan sawaskida ong kokoudahn Mwomwohdiso nan Misori. Kaudiahl wet ruwesehki Sohn Whitmer en iangih Oliver Cowdery oh e pil kaweidki Whitmer en seilok oh kin kihpene kisin likou ntingdah kan me audawudki poadoapoad kan ni pwukoah me e malipilipiong en wia soun poadoapoad oh soun rekerd en Mwomwohdiso.
1–2, Sohn Whitmer en iangih Oliver Cowdery kohla Misori; 3–8, E pahn pil kalohk oh kihpene, rekerdih, oh ntingih iren poadoapoad kan.
1 Rong ie mwahu, Kauno amwail Koht me mahmahsen, ong kamwahupen nei ladu Oliver Cowdery. Kaidehn sang ni eripit me mih rehi me kumwail en likihki ih en wahda kosonned akan oh mwohni kan kohla nan sapwen Saion, ihte ma mie me pahn iang ih me pahn mehlel oh loaloapwoat.
2 Eri, Ngehi, Kauno, kupwuriki me nei ladu, Sohn Whitmer, en iangiada nei ladu Oliver Cowdery;
3 Oh en pil wenlahte mwowe nan ntingtingiada oh wihwiahda poadoapoad en soahng koaros me kesempwal me e kilang oh ese me pid duwen ei mwomwohdiso;
4 Oh en pil ale kaweid oh sawas sang nei ladu Oliver Cowdery oh mehteikan.
5 Oh pil, nei ladu kan me kohpeseng nan sampah anahne kadaredo repwoht en arail doadoahk kan sapwen Saion;
6 Pwe sapwen Saion me pahn wia wasahn doadoahk oh wasahn ale oh wia soahng pwukat koaros.
7 Ahpw, mweidohng nei ladu Sohn Whitmer en seilok pak tohto sang ehu wasa kolahng ehu wasa, oh sang ni ehu ihmw sarawi kolahng ni ehu ihmw sarawi, pwe en kak mengei en alehdi mehn kaskuhl kan—
8 Padapadahk oh kauwahsak, ntingtingih, wihwiada koapi, pilipilada, oh alialehdi soahng koaros iei me ong kamwaupen mwomwohdiso, oh ong dih kan me wie lalaudla me pahn keirda nan sapwen Saion, en kohwahki sang ehu dih ong ehu dih, kokohlahte. Ahmen.