Iralaud 13
Pali wet kohsang nan ehn Sosep Smith poadoapoado me koasoiahda duwen Soukohpo oh Oliver Cowdery ara kasarawiheng Prihsduhd en Aron karanihte Harmony, Pennsylvania, nan May 15, 1829. Kasarawio kohsang ni pehn tohnleng men me pakairiki me iei ih Sohn, me kahdaniki Sohn Sounpapidais nan Kadehde Kapw. Tohnlengo kawehwehda me e wie doadoahk pahn kaweid en Piter, Seims, oh Sohn, Wahnpoaron en keilahn aio ko, me kol kih kan en prihsduhd Ileilehu, me kahdaniki Prihsduhd en Melikesidek. Inouo kohieng Sosep oh Oliver me ni ansou e pahn lel prihsduhd Ileile wet pahn kohieng Ira. (Tehk iralaud 27:7–8, 12.)
Key kan oh manaman en Prihsduhd en Aron kasansalda.
1 Sang ni mwaren Mesaia I kihong pohmwa, iengei sounpapah ko, prihsduhd en Aron, me tungoaleniki kih kan en papah en tohnleng kan, oh rongamwahu en koluhla, oh papidais sang ni kaduhdi ong kamwakelpen dihp kan; oh met sohte pahn pwurehng kohsang pohn sampah, lao nein Lihpai pwutak kan pahn pwurehng wia meirong ong Kauno nan mour pwung.