Iralaud 60
Soukohp Sosep Smith alehdi kaudiahl nan Independence, Jackson County, Misori, Oakos 8, 1831. Nan ereihn ahnsou wet elder kan me seiloklahng Jackson County oh patehng kasarawihn wehio oh wasa me tehnpas sarawi pahn mih ie inangih en ese dahme irail pahn wia.
1–9, Elder kan pahn kalohngki rongamwahuo nan kapokon en aramas suwed akan; 10–14, Irail sohte pahn wiakauwehla mwahl arail ahnsou, de ekihla arail koahiek kan; 15–17, Irail pahn kak en widenda nehrail kan en wia arail kadehde ong irail kan me kasohwe rongamwahuo.
1 Kilang, Kauno ahpw mahsanihong elder kan en sapwellime mwomwohdiso, irail en pwurodohng wehio ansou mwadang sang ni wasa me irail kohdohsang ie: Kilang, I kupwur pereniki, me kumwail kohdadohr wasaht;
2 Ahpw ong ekei I sohte nohn kupwur pereniki, pwe irail sohte pahn kihpeseng ewerail kan, ahpw irail ekihla koahiek me I patohwan ketkihong irail, pwehki arail masak aramas akan. Meidsuwediong soangen aramas pwukat, pwe I pahn engiengda pahrail.
3 Oh ahnsouo pahn lelledo, ma irail sohte pahn nohn loaloapwoatieng ie, e pahn kopwurupwursang, iei me irail ahniki pahn pil kohsang.
4 Pwe Ngehi, Kauno, me kakaun pohn lahng akan, oh sohnpei kan en sampah; oh ni rahn me I pahn alehda aramas akan en wiahla udahn nei aramas, koaros aramas pahn ese dahme kin kasalehda manaman en Koht.
5 Ahpw, mehlel, I pahn koasoiahiong kumwail me pid duwen amwail seiseiloklahng wehio sang wasa me kumwail kohdohsang ie. Mweidong en mie sohp wiawihda, de pweipweida, me pahn mwahu ong kumwail, e sohte lipilipil ong ie, oh tapiada amwail seilok ansou mwadang kolahng wasa me kahdaniki St. Louis.
6 Oh sang wasahu mweidohng nei ladu kan, Sidney Rigdon, Sosep Smith, Jun., oh Oliver Cowdery en seilokla Cincinnati;
7 Oh ni wasa kiset mweidohng irail en kaida ngilerail kan oh kalohngkiwei ai mahsen ni ngihl laud, ni sohte lingeringer de peikasal, kaukauwada peh kan oh kapakap kin irail. Pwe I kak wiahda kumwail en sarawihla, oh I mahkohngehr dipemwail kan.
8 Oh mweidohng me luwehdi kan en tepida seiloksang St. Louis, pahn kin wad riemen, oh kalohngki mahseno, sohte anahne karuaru, nan pwungen kapokon en me suwed kan, lao irail pwurodohng ihmw sarawih kan sang wasa irail kohdohsang ie.
9 Oh soahng pwukat koaros ong kamwaupen ihmw sarawih kan; pwehki sang ni kahrepe wet me I kadar irailkihwei.
10 Oh mweidohng nei ladu Edward Partridge en kihla mwohni me I kiheng ih, ekis rehn nei elder kan me I mahsanihong irail en pwurala;
11 Oh mehmen me kak, mweidohng en kapwurehla sang ni sawas en tohn weliepe; oh mehmen me sohte kak, a e sohte anahnepe.
12 Oh met I pahn koasoia duwen irail kan me luwehdi me pahn kodohng nan sahpw wet.
13 Kilang, I kadar irailwehr pwehn kalohngki rongamwahuo nan kapokon en me suwed akan; eri, I kiheng irail kosonned ehu, me: Kumwail en dehr wiakauwehla mwahl amwail ahnsou, de pil ekihla amwail koahiek pwe e dehr sansal.
14 Oh mwurin amwail pahn kohdahdo nan sapwen Saion, oh kalohngki ahi mahsen, kumwail pahn ansou mwadangete pil pwur, kalkalohngkiseli ahi mahsen nan kapokon en me suwed akan, ni sohte pwurur, de ni ngilen lingeringer de pil akamai.
15 Oh sipedesang pwelipar en nehmwail ong irail me sohte alehda kumwail, kaidehn mwohrail, pwe kumwail dehr kalingeringerirailda, ahpw ni rir; oh widenda nehmwail kan, en wia kadehde ehu ong irail ni rahn en kadeiko.
16 Kilang, met iei me itarehng kumwail, oh kupwure me e ketin kadar kumwailwei.
17 Oh sang ni ewen nei ladu Sosep Smith, Jun., e pahn sansal ong me pid duwen Sidney Rigdon oh Oliver Cowdery. Me luwehdi ahpw pahn sansal mwuhr. Iei ni mehlel. Ahmen.