Iralaud 47
Soukohp Sosep Smith alehdi kaudiahl, nan Kirtland, Ohio, Mahs 8, 1831. John Whitmer, me wihwiaier pwukoahn kilerk ong Soukohpo, tepte sohte men alehda pwukoah ni ansou me pekipek kohieng en weliandi Oliver Cowdery ong pwukoahn sounpoadoapoad oh soun rekerd en Mwomwohdiso. E ntingihdi, “I pilada me I sohte pahn wia ahpw I men kilang kupwuren Kauno en pweida, oh ma e ketin kupwuriki, eri ai pepehm me en ketin kasalehiong Sosep, Ohl Sarawio.” Mwurin Sosep Smith ah alehdi kaudiahl wet, John Whitmer ahpw alehda oh papah nan ah pwukoah me kohieng.
1–4, John Whitmer me pwukoahki kolokol poadoapoad en Mwomwohdiso oh soun nting ong Soukohpo.
1 Kilang, e konehng ong ie me nei sounpapah John anahne kin ntingih oh kolokol ehu ehu poadoapoad, oh seweseiuk, nei sounpapah Sosep, ong ni ntingihdi oh wiahda kopi en soahng koaros me ke pahn kin alehdi, lao e alehdi malipilip en ekei pwukoah doadoahk kan.
2 Pil, mehlel I ndahiong uhk me e pil kak lokaia ngihl laud nan mihting kan, ni ansou kan me e konehng.
3 Oh pil, I ndahiong uhk me e pahn malipilipieng en sohte uhdisang wihwia rekerd oh poadoapoad en mwomwohdiso; pwehki I kapwukoahkiher Oliver Cowdery ong ehu pwukoah doadoahk.
4 Eri, e pahn alehdi, ma e pahn ahneki pwoson laud, sang Soun Kaloalemwahuo, pwehn ntingihdi soahng pwukat. Ihme pahn wiawi. Ahmen.