Iralaud 40
Soukohp Sosep Smith oh Sidney Rigdon alehdi kaudiahl, nan Fayette, New York, Senuari 6, 1831. Mwohn rekoht en kaudiahl wet, sapwellimen soukohp poadoapoado mahsanih, “Ni James [Covel] e soikalahr mahsen en Kauno, oh pwuralahngehr soahng kan me e kin kamehlele mahs oh nah aramas, Kauno ahpw ketikihong ngehi oh Sidney Rigdon iren kaudiahl wet” (tehk iralaud 39).
1–3, Masak kailok en aramas oh anahn akan en sampah kin kahrehda sosoiklahn rongamwahu.
1 Kilang, I ndahionguhk, me mohngiong en nei ladu James Covel e pwung mwohi, pwehki e inoukihda me e pahn kapwaiada ei mahsen.
2 Oh e alehdi mahseno ni eh peren, ahpw Sehdan mwadangete kasongosongih; oh masak kailok en aramas oh anahn en sampah kahrehda eh soikala ei mahseno.
3 Eri e kauwehlahr ei inouo, oh I kolokolete ei pwukoa en wiahiong ih nin duwen me I kilang konehng.