Pali 64
Soukohp Sosep Smith alehdi kaudiahl ong elder kan en Mwomwohdiso, nan Kirtland, Ohio, Septempe 11, 1831. Soukohpo kaukaunopehng en mweselahng Hiram, Ohio, pwe en pwurehng tapiada sapwellime doadoahk en kaweweh Pwuhk Sarawi, me e ketin pwilikihdi pwehki eh ketila Misorio. Pwihn en ohl ekei me alehdier kaweid en seilokla Saion (Misori) ahpw nsonohki mehlel arail kaukaunopada en mwesel nan Oakotohpe. Nan irair en ahnsou en kediropw wet, kaudiahlo alahldi.
1–11, Kauno ketin ruwesehki souleng kan en mahkpene nanpwungarail, ma soh a irail pahn mihmihte nan dihp lapalap; 12–22, Me sohte koluhla pahn wisikdohng mwohn kaun en Mwomwohdiso; 23–25, Mehmen me kin pwain ah meirong en eisek kis ehu sohte pahn isihsla ni ahnsou me Kauno pahn ketido; 26–32, Souleng kan esehier ia suwed en pweipwand; 33–36, Me kahngohdih kan pahn lekdeksang nan Saion; 37–40, Mwomwohdiso pahn kadeikada wehi kan; 41–43, Saion pahn keirda.
1 Kilang, Kauno amwail Koht me mahsanihong kumwail, kumwail elder kan en ei mwomwohdiso, rong mwahu oh rong, oh alehda dahme I patohwan kupwurki me pid duwen kumwail.
2 Pwe ni mehlel I ndahiong kumwail, I men kumwail en powehdi sampah; eri I pahn poakeikumwailla.
3 Miehier nan pwungamwail me dipadahr; ahpw mehlel I patohwan mahsanih, me ongete nan ahnsou wet te, ong wahupei, oh ong komourpen ngehn akan, I mahkohngehr dipamwail kan.
4 I pahn mahkohng kumwail, pwe I kihong kumwailehr wehio.
5 Oh kih kan en me rir kan en wehio sohte pahn peieksang nei ladu Sosep Smith, Jun., sang ni dahme I piladahr, ereihn e pahn wie momour, ma e pahn kapwaiada ahi tiahk sarawi kan.
6 Mie irail kan me rapahki sapwung kan reh pwe irail en kak uhkihong ih ni sohte kahrepe;
7 Ahpw e dipadahr; ahpw mehlel I ndahiong kumwail, Ngehi, Kauno, lapwadahr dipen irail kan me kin wehkada diperail kan mwohi oh peki lapwepen diparail kan, me saikinte wiahda dihp ong mehlahn palingehn.
8 Nei tohnpadahk kan, nan mweihn kawao, rapahki sapwung kan pwe en kin uhkihong emenemen oh sohte kin mahkohng emenemen sang nan arail mongiong kan; oh pwehki soahng suwed wet irail ahniki lokolok oh lapalahn kalokolok.
9 Eri, I ndahiong kumwail, me kumwail anahne mahkohng emenemen; pwe mehmen me sohte pahn mahkikihong rie ah sapwung kan pahn dipada mwohn Kauno; oh e pahn wie mihmi nan dihp lapalap.
10 Ngehi, Kauno, pahn mahkohng irail kan me I pahn mahkohng, ahpw kumwail anahne mahkohng aramas koaros.
11 Oh kumwail en medemedewe nan amwail mongiong kan—mweidohng Koht en kupwurehda ihs me pwung nanpwungat, oh ketkihong ketingpe nin duwen ah wiewiah kan.
12 Oh mehmen me sohte pahn koluhkihla dipeh kan, oh sohte wehkada, e pahn wisikdohng mwohn kaun en mwomwohdiso, oh wiepe ahpw pahn wiawihong nin duwen me iren pwuhk sarawi kan mahsanihong kumwail, ma sang ni kosonned de sang kaudiahl.
13 Oh met kumwail pahn wia pwe Koht en kak kupwurperenikihda—kaidehn pwehki kumwail sohte pahn lapwadahsang dihp, ni sohte insensuwedkihla, ahpw pwe kumwail en kak kopwungpwungla mwohn kosonned, pwe kumwail en dehr mwamahliki ih me wia noumwail soun koukosonnedo—
14 Mehlel I patohwan mahsanih, ong ni kahrepe wet kumwail anahne wia soahng pwukat.
15 Kilang, Ngehi, Kauno, lingeringerda pahn nei ladu Ezra Booth, oh pil nei ladu Isaac Morley, pwe ira sohte kapwaiada koasondih kan, pil iangahki kosonnedo;
16 Ira kin ahniki madamadau suwed nan ara mongiong kan, oh Ngehi, Kauno, koledihsang ira Ngehno. Ira kasalehda suwed ni mehkot ehu me sohte mwahn mie suwed ie; ahpw I mahkohngehr nei ladu Isaac Morley.
17 Oh pil nei ladu Edward Partridge, kilang, e dipadahr, oh Sehdan rapahki pwe en kawehla palingene; ahpw ni ahnsou me mepwukat sansalohng irail, oh irail koluhkihla me suwedo, diperail kan pahn lapwada.
18 Oh met, mehlel I patohwan mahsanih me e konehng ong ie me nei ladu Sidney Gilbert, mwurin wihk kei, e pahn pwurodohng ah pwukoah doadoahk, oh wasahn doadoahk nan sapwen Saion;
19 Oh me e kilangehr oh rongehr en kak sansalohng nei tohnpadahk kan, pwe irail en dehr lokolok. Oh pwehki ni kahrepe wet me I patohwan mahsanih mepwukat.
20 Oh pil, I ndahiong kumwail, me nei ladu Isaac Morley sohte pahn alehdi kasongosong me laudsang me e kak powehdi, oh kihla kaweid me sapwung me pahn kamedekeikumwailla, I kihong kosonned ehu me ah mwahto pahn netila.
21 I sohte men nei ladu Frederick G. Williams en netikihla sapwe mwahto, pwe Ngehi, Kauno, men kolokolete wasa mwahu ehu nan sapwen Kirtland, ong nan ereihn pahr limau, ni ereihn ahnsou me I sohte pahn kawehla me suwed akan, pwe I en kak kapitala ekei irail.
22 Oh mwurin rahno, Ngehi, Kauno, sohte pahn kolokol dipen emen me pahn kohkihdahla mongiong mwahu nan sapwen Saion; pwe Ngehi, Kauno, anahne mongiong en seri en aramas akan.
23 Kilang, iei rahno met lao lel ketido en Nein-Aramas, oh mehlel iei rahn en tohnmetei, oh rahn en meirong en eisek-kis ehu en nei aramas akan; pwe mehmen me pwain ah meirong sohte pahn isihsla ni rahn en sapwellime ketidohu.
24 Pwe mwurin rahn wet kisiniei pahn kohdo—iei met duwen me Kauno ketin mahmahsanih—pwe ni mehlel I patohwan mahsanih, lakapw koaros me pohnmwahso oh irail kan me kin wia me suwed pahn duwehla dihpw meng; oh I pahn isikirailda, pwe Ngehi Kauno Wasa Lapalap; oh I sohte pahn kapitalahte emen me luwehdi nan Papilon.
25 Eri, ma kumwail kamehlele ie, kumwail pahn doadoahk ong ereihn rahno
26 Oh e sohte pwung me nei ladu kan, Newel K. Whitney oh Sidney Gilbert, en netikihla ara imwen netinet oh ara pai kan wasaht; pwe met kaidehn eripit lao aramas teikan en mwomwohdiso, me wie mihmihte wasaht, pahn kohdahla nan sapwen Saion.
27 Kilang, e nting nan ai kosonned akan, de sohte mweimwei, en wiahda pweipwand rehn amwail imwintihtih kan;
28 Ahpw kilang, e sohte ntingdi ahnsou dah me Kauno sohte pahn ale ahnsou me e kupwuriki, oh pwain ni mwohmw me e kilang mwahu ong ih.
29 Eri, ni amwail wia sounweliepeh kei, kumwail wiewia sapwellimen Kauno doadoahk; oh sohte lipilipil dahme kumwail wia nin duwen kupwuren Kauno iei sapwellimen Kauno doadoahk.
30 Oh e ketin pilkumwaildahr en apwalih sapwellime souleng kan imwin rahn pwukat, pwe irail en kak alehdi sapwen sohso nan sapwen Saion.
31 Oh kilang, Ngehi, Kauno, kalohk ong kumwail, oh ai mahsen kan mehlel oh sohte pahn pweiek, pwe irail en kak alehdi.
32 Ahpw soahng koaros pahn wiawi nan arail ahnsou.
33 Eri, dehr pwangada wiewia mwahu, pwe kumwail kaukawada poahsoan en doadoahk lap ehu. Oh sang ni mehkot tikitik kan kin wiahla mehkot laud.
34 Kilang, Kauno ketin anahne mongiong oh madamadau me ngoang; oh me ngoahngki oh peik pahn tungoale reken wahnsahpw en sapwen Saion ni imwin rahn pwukat.
35 Oh me kahngohdi kan pahn pekous sang nan sapwen Saion, oh pahn kohlasang wasahuo, oh sohte pahn iang sohsohki wehio.
36 Pwe, mehlel I patohwan mahsanih me kahngohdi kan sohte wia ntahn Ipram, eri ihme kahrehda irail pahn katohrohrkihla.
37 Kilang, Ngehi, Kauno, patohwan kawadahr ei mwomwohdiso ni imwin rahn pwukat me rasohng sounkopwung men me ketiket pohn kumwukumw ehu, de pohn wasa ehu me ile, pwe en kadeik wehi kan.
38 Pwe ahnsouo pahn kohdo me aramas akan en Saion pahn kadeik soahng koaros me pid duwen Saion.
39 Oh me kilinaulikamw akan oh mwalaun akan pahn sansalada sang irail, oh irail kan me kaidehn wahnpoaron kan oh soukohp kan pahn dierekda.
40 Oh pil duwehte pisop, me wia sounkopwung, oh nah sounsawas akan, ma irail sohte loaloapwoatieng arail pwukoah doadoahk kan irail pahn pakadeikda, oh mehtei kan pahn uhd welian iraildi.
41 Pwe, kilang, I patohwan mahsanihong kumwail me Saion pahn keirda, oh lingan en Kauno pahn ket powe;
42 Oh e pahn wia kilel en pilaihk ong aramas akan, oh irail pahn kohdo reh sang ni wehi laud koaros me mih pahn lahng.
43 Oh rahno pahn kohdo me wehi laud kan en sampah pahn rerada pwehki ih, oh pahn masepwehkada pwehki sang ni sapwellimeh kan me kamasepwehk. Kauno me ketin mahsaniher. Ahmen.