Irelaud 70
Soukohp Sosep Smith alehdi kaudiahl nan Hiram, Ohio, Nohpempe 12, 1831. Poadoapoad en Soukohpo kasalehda me kapokon kesempwal pahiou me wiawiher sang ni Nohpempe 1 lel 12, me pil wia kisehn rahnoko. Ni lahs en rahn en kapokon pwukat, keieu kesempwal en kaudiahl kan me mwuhr pahn wiawihda ong Pwuhk en Kosonned akan oh Padahk oh Inou kan ahpw alahlda rahno. Kaudiahl wet kohda mwurin kapokono arail usuhski me kaudiahl kan e “kesempwalehng Mwomwohdiso rasehng pai en Sampah pwon.” Poadoapoad en Sosep Smith karasahieng kaudiahl kan ni duwe met “poahson en Mwomwohdiso nan imwin rahn pwukat, oh kamwahupen sampah, kasalehda me kih kan en me rir kan en wehin atail Sounkomouro pwurehng likihkihong aramas.”
1–5, Soun apwahpwali kan me pilipildahr en wiahda ntingdahn kaudiahl kan; 6–13, Irail me kin doadoahngki ngehno nan arail doadoahk kan me warohng en alahlda en doadoahk; 14–18, Souleng kan pahn kin epwel pahrek ong ni mehkoaros en sampah.
1 Kilang, oh rong mwahu, kumwail tohn kouson en Saion, oh kumwail aramas akan koaros en ei mwomwohdiso me mih wasa doh kan, oh rong mahsen en Kauno me I ketkihong nei ladu Sosep Smith Jun., oh pil ong nei ladu Martin Harris, oh pil ong nei ladu Oliver Cowdery, oh pil ong nei ladu Sohn Whitmer, oh pil ong nei ladu Sidney Rigdon, oh pil ong nei ladu William W. Phelps, sang ni mwohmw en kosonned ehu ong irail.
2 Pwe I ketkihong irail kosonned ehu; eri rong mwahu oh rong, pwe Kauno me mahsanihong irail—
3 Ngehi, Kauno, me piliraildahr, oh kasarawirailahr en wia soun apwahpwali kaudiahl kan oh kosonned akan me I ketkihong irailehr, oh me I pahn pil ketkihong irail mwurin me;
4 Oh ehu kisin likou en pwukoahn kohwa wet me I pahn anahne sang irail ong ni rahn en kadeiko.
5 Eri, I idiadahng iraillehr, oh met iei arail pwukoah nan mwomwohdiso en Koht, en apwalih irail oh soahng sohte lipilipil kan me pid duwen irail, ei, kamwauperail kan.
6 Eri, kosonned ehu me I ketkihong irail, me irail sohte pahn kiheng mepwukat rehn kaun akan en mwomwohdiso, de pil tohn sampah;
7 Ahpw, ni arail pahn alehdi tohtohsang me irail anahne ong arail anahn akan oh me irail mwahukih kan, e pahn anahne wisiklahng nan ei wasahn nahk;
8 Oh kamwaupeh kan pahn kohieng irail tohn kouson kan en Saion, oh ong dihrail kan, ni arail pahn wiahla sohn sohsoh kei nin duwen kosonned akan en wehio.
9 Kilang, iei met me Kauno ketin anahnehiong emen emen aramas nan ah pwukoahn kohwa, iei me Ngehi, Kauno, idiadahr de pahn idiada emen aramas mwurin me.
10 Oh kilang, sohte emen me pahn pitsang kosonned wet me iang wia towe en mwomwohdiso en Koht ieiaso;
11 Ei, kaidehn pil pisop, kaidehn pil soun weliepe me kin apwahpwali wasahn nahk en Kauno, kaidehn me idihdahr ong pwukoahn kohwahki dipwisou en sampah kan.
12 Mehmen me idihdahng en kin apwalih doadoahk sarawih kan, ihte me pil warohng en alahlda doadoahk, iei pil ong irail kan me idihdahr ong pwukoahn kohwahki dipwisou en sampah kan;
13 Ei, me keieu tohto, uwen tohto me kohpeseng pohrail sang ni mahsen kan en Ngehno.
14 Ahpw, nan amwail dipwisou en sampah kan kumwail pahn kin pahrek, oh met kaidehk ni mehnseiren, ma soh ah uwen laud en mahsen kan en Ngehno sohte pahn wiawi.
15 Ansou wet, kosonned wet me I ketkihong nei ladu kan ong kamwauperail nan ereihn arail pahn wie mihmi, ong kasalepen kapai kan me I ketkihong pohrail, oh ong isepen arail pwerisek oh ong doareperail.
16 Ong mwenge oh likou; ong sohso; ong ihmw akan oh ong sahpw akan, ni sohte lipilipil dahme wihwiawih kan Ngehi, Kauno, pahn koasoneiraildi, oh ni sohte lipilipil wasa Ngehi, Kauno, pahn kadar iraila ie.
17 Pwe irail udahn kin loaloapwoatieng soahng tohto, oh wiadahr doadoahk mwahu ni arail saikinte wiahda dihp.
18 Kilang, Ngehi, Kauno, me kin ahniki mahk oh I pahn kapai irailda, oh irail pahn iang perepereniki mepwukat. Ihme pahn wiawi. Ahmen.