Iralaud 34
Soukohp Sosep Smith alehdi kaudiahl ong Orson Pratt, nan Fayette, New York, Nopempe 4, 1830. Brother Pratt sounpar eisek duwao ansouo. E weliakapwala oh papidaisla ahnsou me e tepin rongada kalohk en rongamwahu kopwurupwurdoh sang rehn rie pwutak laud, Parley P. Pratt, wihk weneu mwowehsang. Kaudiahl wet alahldi nan imwen Peter Whitmer Sr.
1–4, Me loaloapwoat pahn wiahla sapwellimen Koht pwutak sang ni Tomwo; 5–9, Kalkalohk en rongamwahu wet kaunopada ahlo ong Ketido Keriauo; 10–12, Kokohp akan kin kohdo sang ni manaman en Ngehn Sarawio.
1 Nei pwutak Orson, rong mwahu oh kilang dahme ngehi, Kauno Koht, iei Sises Krais ahmw Soundor, pahn mahsanihonguhk;
2 Marain oh komourpen sampah, marain ehu me kin kamarainih wasa rotorot oh rotoroto sohte kak powehdi;
3 Me ketin loaloale sampah kahrehda eh tohnmeteikihla pein eh mour, pwe koaros me pahn kamehlele ih pahn kak wiahla sapwellimen Koht pwutak. Eri kowe iei nei pwutak;
4 Oh meid pai kowe pwehki ke kamehlele;
5 Oh meid pai lap ong kowe pwehki ei malipeiukadahr en kalohngki ahi rongamwahu—
6 En lokaia ngihl laud duwehte ngilen sewi ehu, me ngihl laud oh werei, oh weriwerki koluhla ong dih suwed oh dipan wet, en kaunopada elen Kauno ong sapwellime ketido keriauo.
7 Pwe kilang, mehlel, mehlel, I ndahionguhk, ansouo kerendohr me I pahn sapahldo nan depwek iangahki ei manaman oh lingan lap.
8 Oh ansou en ei pahn sapahldohu pahn wia rahn kesempwal ehu, pwe wehi koaros pahn rerrer.
9 Ahpw mwohn rahn kesempwalo eh pahn lelledo, ketipino pahn rotorotala, maramo pahn weitahtahla duwehte nta; oh usu kan pahn sohla lingaling, oh ekei pahn pwupwidi, kamwomwala lap ehu pahn wiawihong me suwed akan.
10 Eri, kalaudehla ngilemwen oh dehr masak, pwe Kauno Koht ketin mahsaniher; eri kokohp, oh e pahn kohienguhk sang ni manaman en Ngehn Sarawi.
11 Oh ma ke pahn loaloapwoat, kilang, I pahn ieianguhk lao I pahn kohdo—
12 Oh mehlel, mehlel, I ndahionguhk, I pahn mwadang kohdo. Ngehi iei ahmw Kaun oh ahmw Soundor. Iei met mehlel. Ahmen.