Pali 65
Soukohp Sosep Smith alehdi kaudiahl en kapakap, nan Hiram, Ohio, Oakotohpe 30, 1831.
1–2, Kih kan en wehin Koht wia kepwukoah likilik ehu ong aramas pohn sampah, oh kemwekid en rongamwahuo pahn pweida; 3–6, Ni ahnsou en meleniem, wehin nanleng pahn kohdo oh patehng wehin Koht pohn sampah.
1 Rong mwahu, oh kilang, mie ngihl ehu me duwehte ehu me kohdihdosang wasa me ile, me inenen kehlail oh idipek, me kokowehng ni keihmw kan en sampah, ei, me ngihlo ong aramas akan—Kumwail en kaunopada elen Kauno, wiahda sapwellime ahl akan en inen.
2 Kih kan en wehin Koht wia pwukoah likilik ong aramas akan pohn sampah, oh sang wasao me rongamwahuo pahn kohpeseng ni keihmw kan en sampah, me duwehte takai me pwupwusang nahnao ni eh sohte me doahke pahn tapwurewei, lao e pahn kadirehla sampah pwon.
3 Ei, ngihl ehu me inenen ngihlaud koaskoasoia—Kumwail kaunopada mwohn Kauno, kumwail kaunopada kamadipw lapalap en Sihmpwulo, onopadahng Ohl Kamwohdo.
4 Kapakap ong Kauno, likweri sapwellime mwahr sarawi, kasalehda sapwellime doadoahk kopwuriamwei kan ong aramas akan.
5 Likweriong Kauno, pwe sapwellime mwomwohdiso en kak kohpeseng pohn sampah, me toweh kan en sampah pahn alehda, oh kaunopadahng rahn akan me pahn kohdo, ni ansou me Nein-Aramas pahn ketdihdo nanleng, maraihn en sapwellime lingan pahn kapilpene, pwe en pwarek wehin Koht me kokoudahr pohn sampah.
6 Eri, mwomwohdiso en Koht en kohpeseng, pwe wehin nanleng en kak kohdo, pwe en kak, maing Koht, kepkepinga nanleng oh pil pohn sampah, pwe komwi en kak kalewehdi sapwellimwomwi imwintihtih kan; pwe sapwelimahr iei wahu, manamano, oh lingano kohkohlahte. Ahmen.