Iraluad 37
Kaudiahl kohieng Soukohp Sosep Smith oh Sidney Rigdon, karanihte Fayette, New York, Tihsempe 1830. Wasaht me tepin kosonned alahldi duwen kohpenehn towe kan nan dih wet.
1–4, Souleng kan malipilipiong en kohpene nan Ohio.
1 Kilang, I ndahiong kumwa me e sohte kesempwalohng ie kumwa en wiwwiahte kawehweh lao kumwa pahn kohla Ohio, oh met pwehki imwintihtio oh pwehki kamwahupemwa.
2 Oh pil, I ndahiong kumwa me kumwa sohte pahn kohla lao kumwa kalohngki ei rongamwahu nan wasah ko, oh kakehlakahla mwomwohdisoh wasa kan me mie, ahpw mehlel nan Colesville; pwe, kilang, irail kin kapakap sang ni pwoson mehlel.
3 Oh pil, I kihong kumwail ehu kosonned ong mwomwohdiso, me e kesempwal ong ie me irail pahn kohpene nan Ohio, kaunopadahng ansou me nei ladau Oliver Cowdery pahn pwurodo rehrail.
4 Kilang, eripit ehu met, oh mweidehng aramas koaros en pein pilada lao I pahn kohwei. Iei ni mehlel. Ahmen.