Irelaud 74
Soukohp Sosep Smith alehdi kaudiahl nan Wayne County, New York, pahr 1830. Sangete mwohn koasonepen Mwomwohdiso, iren kalelapak kan pwarada duwen ia pwungin mwomwen pepdais, me kahrehda Soukohpo rapahki pasapengpeh kan ong me pid ire wet. Poadoapoad en Sosep Smith kasalehda me kaudiahl wet wia kawewehpen 1Â Korint 7:14, iren pwuhk sarawi ehu me kin kalapw doadoahk pwe en utung pepdais en kisin seri pwelel kan.
1–5, Paul kaweidki Mwomwohdiso en nan ah mwehio en dehr kapwaiada kosonned en Moses; 6–7, Kisin serih kan irail mwakelekel oh sarawialahr sang ni Tomwo.
1 Pwe ohl pwopwoud men me sohte eh pwosono sarawihkilahr sangeh lih pwopwoudo, oh lih pwopwoudo me sohte eh pwosono pil sarawihkilahr sang eh ohl pwopoudo; ma soh noumwail seri kan sohte mwakelekel, ahpw met irail sarawialahr.
2 Met, nan mwehin wahnpoaron kan kosonned en serkumsais kin wihwiawi nanpwungen mehn Suhs kan koaros me sohte kamehlele rongamwahu en Sises Krais.
3 Oh kedekedeo pingiping laud ehu ahpw wiawihda nanpwungen aramas akan me pid duwen kosonned en serkumsais, pwe ohl pwopwoud me sohte eh pwosono me mwahuki nah seri kan en serkumsaisla pwe en peikiong kosonned en Moses, kosonned me pweidahro.
4 Oh kedekedeo seri kan, me kekeirda oh peikiong kosonned en Moses, ahpw idawehnte tiahk kan en arail pahpa kan oh sohte kamehlele rongamwahu en Krais, ihme kahrehda irail wiahla aramas me sohte sarawi.
5 Eri, ong ni kahrepe wet wahnpoarono ntingieng mwomwohdiso, kihong irail kosonned ehu, kaidehn sang rehn Kauno, ahpw sang pein ih, me me kin kamehlele sohte pahn pwoudki me kin sohte kamehlele; ihte ma kosonned en Moses en sohrala sang nanpwungarail.
6 Pwe neirail seri kan en kak wie mihmihte oh sohte serkumsais; oh pwe tiahko en kak sohrala, me koasoia me seri tikitik kan sohte sarawi; pwe ihme kin wiawi nanpwungen mehn Suhs akan;
7 Ahpw seri tikitik kan irail sarawi, irail kasarawialahr sang ni tomw pen Sises Krais; oh iei met dahme iren pwuhk sarawi kan kadehdehki.