Iralaud 23
Kaudiahl limau me ireklahte kohieng Soukohp Sosep Smith, nan Manchester, New York, Epreil 1830, ong Oliver Cowdery, Hyrum Smith, Samuel H. Smith, Joseph Smith Sr., oh Joseph Knight Sr. Sang ni aramas limenenet arail inangih mehlel en esehla pein arail pwukoah kan, Soukohpo ahpw kalelapak rehn Kauno oh alehdi kaudiahl ong emen emen irail.
1–7, Tepin tohnpadahk pwukat malipilipdahr pwe ren kalohk, kangoange, oh kakehlaka Mwomwohdiso.
1 Kilang, Oliver, I pahn ndahionguhk ekei mahsen. Kilang, meid pai kowe, oh ke sohte mih pahn manaman en lekidekla. Ahpw kanaiehng pwe kede pohnmwahso, pwe ke de pahn lellohng nan kasongosong.
2 Kasalehiong ahmw pwukoahn mwomwohdiso, oh pil mwohn sampah, oh mohngiongumw pahn ritidahng kalohngki mehlelo sang met kohwei oh kohkohlahte. Ahmen.
3 Kilang, Hyrum, I pahn ndahionguhk ekei mahsen; Ke sohte mih pahn manaman en lekidekla, oh mohngiongumw ritidahr, oh ke kak lokolokaia; oh ahmw pwukoah iei en kangoange, oh kakehlaka mwomwohdiso ansou koaros. Eri ahmw pwukoa iei ong mwomwohdiso kohkohlahte, oh met pwehki omwi peneinei. Ahmen.
4 Kilang, Samuel, I pahn ndahionguhk ekei mahsen; pwe ke sohte mih pahn manaman en lekidekla, oh ahmw pwukoa iei en kangoange, oh kakehlaka mwohmwohdiso; oh ke saikinte malipilipieng en kalohk mwohn sampah. Ahmen.
5 Kilang, Sosep, I pahn ndahionguhk ekei mahsen; pw eke sohte mih pahn manaman en lekidekla, oh pil ahmw pwukoa iei en kangoange, oh kakehlaka mwomwohdiso; oh met iei ahmw pwukoa sang met kohkohlahte. Ahmen.
6 Kilang, Sosep Knight, I kasalehionguhk, sang ni mahsen pwukat, me ke pahn anahne alehda ahmw lohpwuo, me ke pahn anahne kapakap mwohn aramas oh pil ni rir, oh nan ahmw peneinei, oh rehn kempoakepahmw kan, oh nan wasa koaros.
7 Oh, kilang, ie ahmw pwukoa en miniminiong mwomwohdiso mehlelo, oh wia kaweid en kangoang ansou koaros, pwe ken kak alehdi isepen soun doadoahko. Ahmen.