Iralaud 44
Soukohp Sosep Smith oh Sidney Rigdon alehdi kaudiahl, nan Kirtland, Ohio, ni imwin sounpwung en Pepuweri 1831. Pwehn idawehn koasondi kan me miehier, Mwomwohdiso koasonehdier ehu kapokon me pahn wiawi tepin sounpwung en Suhn kohkohdo.
1–3, Elder kan pahn kin pokonpene nan kapokon lap; 4–6, Irail pahn kin koasonehdi nin duwen kosonned akan en sahpw oh apwalih me semwehmweh kan.
1 Kilang, Kauno ketin mahsaniong kumwail nei ladu kan, e konehng ong ie me elder kan en ei mwomwohdiso pahn kin pokonpene, sang ni palimese oh sang ni palikapi, oh sang ni paliepeng oh sang ni palieir, sang ni kisin likou de ni soangen wiepe ehu.
2 Oh ansouo pahn lelledo, me ma irail pahn ahneki pwoson laud, oh kin kakehlailih arail pwoson ie, I pahn kamwerehdi Ngeni pohrail ni rahn me irail pahn pokonpenehu.
3 Oh ansouo pahn lelledo me irail pahn kohwei nan kahnihmw laud kan, oh padahngki koluhla rehn aramas akan.
4 Oh me tohtoh me pahn wekila, me kahrehda kumwail pahn kak alehdi manaman en koasoneikumwaildi nin duwen kosonned akan en aramas;
5 Me amwail imwintihtih kan pahn sohte kak en kaloweikumwaildi; me kumwail pahn kak en poadoandoarasang ni soahng koaros; me kumwail pahn kak en kapwaiada ei kosonned akan; me kosonned kan koaros pahn ohla me imwintihtiho kin songosong en kawehkihla nei aramas akan.
6 Kilang, I ndahiong kumwail, me kumwail anahne pwarek me semwehmweh oh me anahne sawas oh seweseiraildahsang nan arail kahpwal, pwe irail en kak kolokol lao soahng koaros eh pahn kak pweida nin duwen ei kosonned me kumwail alehier. Ahmen.