Pali 82
Soukohp Sosep Smith alehdi kaudiahl nan Independence, Jackson County, Misori, Epreil 26, 1832. Rahno wia rahn en mihting en kaweid en samworo lapalap akan oh elder kan en Mwomwohdiso. Nan mihting en kaweido, Sosep Smith ahpw usuhsdahr en wia Preseden en Prihsduhd Lapalap, ohpis ehu me e kasarawihengehr nan ehu kapokon en samworo lapalap akan, elder kan, oh toweh kan, nan Amherst, Ohio, Senueri 25, 1832 (kilang oaralap en pali 75). Kaudiahl wet pwurehng kapwurehieng mehn kaweid kan me alahldier nan kaudiahl en ansou kis samwalahro (pali 78) pwe en kawada pesnes ehu—me kahdaniki Pesnes en Utuhtpene (pahn kaweidpen Sosep Smith, lepin lokaia “pwihn” mwuhr ahpw welialikiheng “pesnes”) —pwe en katanga en Mwomwohdiso wasahn netinet oh prindihda pwuhk kan.
1–4, Aramas me kin ale laud, pahn pil anahne kihla laud; 5–7, Rotorot kipehdier sampah; 8–13, Kauno kin ketin kapwaiada ni atail kin wia dahme E mahsanih; 14–18, Saion anahne kalaudehla kalinganpe oh sarawiala; 19–24, Emen emen aramas anahne rapahki dahme mehn mpeh kan kin anahne.
1 Mehlel, mehlel, I mahsanihong kumwail, nei ladu kan, me ni amwail pahn kin mahkikihong emen emen amwail sapwung kan, pil Ngehi, Kauno, mahkohng kumwail.
2 Ahpw, mie nanpwungamwail me inenen dipan mehlel; ei, pil kumwail koaros dipan; ahpw mehlel I mahsanihong kumwail, kanaiehng sang met kohla, oh uhdihsang wia dihp, pwe kadeik laud dehr kohieng kumwail.
3 Pwe ong ih me alehdi laud pahn pil anahne kihla laud; oh mehmen me wiahda dihp ni arail wewehki e pahn ale kalokolok keieu laud.
4 Kumwail eker mwareiet pwe en ale kaudiahl kan, oh I ketkihong kumwail; oh ni amwail pahn sohte kolokol ei mahsen kan, me I ketkihong kumwail, kumwail wiahla aramas dipan ekei; oh kopwung oh pakadeik me wia kalokepe me koasondier nan ei kosonned.
5 Eri, dahme I mahsanihong emen I mahsanihong koaros: Mwasamwasahn, pwe tepilo kadauhrpesengehr mwekid suwed kan, oh rotorot kaundahr wasa.
6 Oh Koht ahpw engiengda pahn tohn sampah; oh sohte me wiewia mwahu, pwe koaros sohpeisangehr ahl pwungo.
7 Oh met, mehlel I mahsanihong kumwail, Ngehi, Kauno, pahn sohte kapwukoahkinkumwail dihp ehute; kumwail kohkohwei oh dehr pwurehng wiahda dihp; ahpw ong aramaso me pwurehng wiahda dihp, dipen mahsoko pahn pwurehng pwurodohng, Kauno amwail Koht me mahsaniher met.
8 Oh pil, I mahsanihong kumwail, I ketkihong kumwail kosonned kapw ehu, me kumwail en wewehki dahme I kupwuriki me pid duwen kumwail;
9 De, me wewehki, I ketkihong kumwail mehn kaweid kan ong mwomwen amwail pahn kin mwekid mwohi, pwe en kak wiahla kamwaupen komourpamwail.
10 Ngehi, Kauno, kin kapwaiada ni ansou kumwail kin wia dahme I mahsanih; ahpw ni ansou me kumwail sohte kin wia dahme I mahsanih, sohte inou ong kumwail.
11 Eri, mehlel I mahsanihong kumwail, me e konehng ong nei ladu kan Edward Partridge oh Newel K. Whitney, A. Sidney Gilbert oh Sidney Rigdon, oh nei ladu Sosep Smith, oh Sohn Whitmer oh Oliver Cowdery, oh W. W. Phelps oh Martin Harris kolokoltengpene sang ni koasondih kan me wiawihda nanpwungarail oh inou sarawi me sohte pahn kak en ohla sang ni kawehla kosonned, ihte ma kadeik pahn mwadangete wiawi, nan ekei amwail pwukoah doadoahk kan—
12 Pwe en apwali kemwekid kan en me semwehmwe, oh soahng koaros me pid duwen pisoprik nan sapwen Saion oh nan sapwen Kirtland;
13 Pwe I ketin kasarawialahr sapwen Kirtland nin duwen ei ahnsou ong kamwaupen souleng kan en Wasa Lapalahpieh, oh ong ehu sdeik ong Saion.
14 Pwe Saion anahne kalaudehla kalinganpe, oh en sarawiala; irepeh kan anahne en katehlapala; lepin tuhkehn katengeh kan anahne en kakehlaila; ei, mehlel I mahsanihong kumwail, Saion anahne pwourda oh kapwatkihda karmend kaselel kan.
15 Eri, I ketkihong kumwail kosonned wet, me kumwail en katengeikumwaildieng inou sarawi wet, oh e ahpw pahn wiawi nin duwen kosonned akan en Kauno.
16 Kilang, met iei eripit me pil mih rehi ong kamwaupemwail.
17 Oh kumwail en pahrek, me wewehki, kumwail en ahneki nehne pahrek nan amwail dipisou kan, ong kamwaupen apwahpwalih saweweh kan en amwail kohwah kan, emen emen aramas nin duwen dahme e mwauki oh anahne, ereihn dahme e mwauki kan mih ni pwung—
18 Oh mepwukat koaros ong kamwaupen mwomwohdiso en Koht ieiaso, me emen emen aramas en kak kalaudehla ah koahiek, me emen emen aramas en kak esehla en ekei arail koahiek, ei, iei pahn pak epwiki laudsang, me pahn kohieng wasahn nahk en Kauno, pwe en wiahla en mwomwohdiso wasahn kanekid—
19 Emen emen aramas anahne rapahki dahme mehn mpe kin anahne, oh wia soahng koaros ki kilikilangete kalingenpen Koht.
20 Pwihn wet me I ketin idiadahr pwe en wia pwihn poatoapoat ehu ong kumwail, oh ong irail kan me pahn welian kumwaildi, ni ereihn amwail sohte pahn wiahda dihp.
21 Oh aramas me pahn dipikihda inou sarawi wet, oh kakeluwakiala ah mongiong, epwelpe pahn wiawihong nin duwen kosonned akan en ei mwomwohdiso, oh pahn wisiklahng pahn kalokolok kan en Sedan lao lel rahn en poadoandoaralao.
22 Oh met, mehlel I mahsanihong kumwail, oh iei eripit met, kumwail rapahkihda kempoakepahmwail kan me kopwehpwehki mour sapwung, oh irail sohte pahn kaweikumwailla.
23 Mweidohng ie kelehpw ien kadeik, pwe ei pwukoah kadeik oh dupuk. Popohl ong kumwail; ei kapai kan en mihmihte rehmwail.
24 Pwe pil wehio iei amwail, oh pahn kohkohlahte, ma kumwail sohte pahn pwupwidihsang amwail loaloapwoat. Iei ni mehlel. Ahmen.