Iralaud 30
Kaudiahl kohieng Soukohp Sosep Smith ong David Whitmer, Peter Whitmer Jr., oh John Whitmer, nan Fayette, New York, Septempe 1830, mwurinte kapokon me wiawihki rahn siluh nan Fayette, ahpw mwohn elder kan en Mwomwohdisoh ar kohkohpeseng. Tepin wiawihdahn kaudiahl pwukat e mihmi ni iralaud siluh; ahpw Soukohpo kapatapene wiahla ehu nan ntingdahn pwuhk en Padahk oh Inou kan me wiawihda nan 1835.
1–4, Kauno ketin panawih David Whitmer pwehki eh sohte loaloapwoatohng papah; 5–8, Peter Whitmer Jr. en iangada Oliver Cowdery kohla nan misin rehn Mehn Leimen kan; 9–11, John Whitmer malipilipda pwe en kalohk rongamwahuo.
1 Kilang, I ndahionguhk, David, me ke masak aramas oh sohte koapworopworikin ie pwe I en kihonguhk kehl nin duwen me ke pahn wia.
2 Ahpw ke kin wie medemedewe soahng kan en sampah laudsang soahng kan me sang rehi, Sounwiepem, oh doadoahk me ke malipilipiong; oh ke sohte rong mwahu Ngehnio, oh irail akan me kakaunuhk, ahpw ke rongalahr irail akan me I sohte mahsanih re en kaweiduhk.
3 Eri, ke kelehpwlahr pwe ken pein peki rehi, oh medemedwe soahng kan me ke alehdier.
4 Oh ihmwen ahmw pahpao pahn wia wasahn ahmw keiru, lao I pahn kihonguhk pil ekei kosonned kan. Oh ke pahn wiwia doadoahk en papah nan mwomwohdiso, oh mwohn sampah, oh nan sahpw akan me kapilpene.
5 Kilang, I ndahionguhk, Peter, me ke pahn iangada riomw ohl Oliver seiloak wei; pwe ansouo lelledohr me I kamehlele me e pahn konehngehr ken kihpeseng ewemwen oh kalohngki ei rongamwahu; eri, dehr masak, rong mwahu ehn riomw ohl en e mahsen kan oh kaweid, me I pahn kihong ih.
6 Oh ke pahn iang ih lokolok nan ah kahpwal akan koaros, oh kin kalapw kapakapki oh pwoson ie nan ahmw mohngiong, ong doarepe oh doaropomw; pwe I kihongehr ih manaman en kauwada ei mwomwohdiso rehn Mehn Leimen kan;
7 Oh sohte me I idiahda pwe en wia nah sounsawas me pahn ahneki manaman powe nan mwomwohdiso, me pid doadoahk en mwomwohdiso, ih rie ohl, Sosep Smith, Jun.
8 Eri, rong mwahu mepwukat oh loaloapwoationg kapwaiada ei kosonned akan, oh ke pahn kapaikihda mour soutuk. Ahmen.
9 Kilang, I ndahionguhk, nei sounpapah Sohn, sang ahnsou wet kohla ke pahn tapida kalohngki ei rongamwahu, nin duwen ngihl en sewe ehu.
10 Oh ahmw doadoahk pahn mih rehn riomw ohl Pilip Burroughs, oh nan wasahn kan me kapilpene, ei, wasa kan me aramas pahn ronguhk, loa I pahn mahsenihonguhk ken kohwei sang me.
11 Oh ahmw doadoahk unsek pahn ong Saion, sang ni ngehn unsek, sang ansou wet kohla; ei, ke pahn kalapw kihpeseng ewemwen nan ei doadoahk, sohte masak dahme aramas kak wiahiong uhk, pwe I pahn ieianguhk. Ahmen.