Irelaud 75
Soukohp Sosep Smith alehdi kaudiahl nan Amherst, Ohio, Senweri 25, 1832. Irelaud wet audaudkihda kaudiahl riau (keieu nan iretikitik 1 lel 22 oh keriau nan iretikitik 23 lel 36) me wiawi nan rahn ehute. Audepen rahno wia kapokon ehu ni ansou me Sosep Smith usuhsda oh kasarawihong Preseden en Samworo Lapalap. Ekei elder kan me men esehla mwahu duwen arail pwukoah kan. Iei kaudiahl pwukat me wihwiawiher.
1–5, Elder loaloalpwoat kan me kin kalohngki rongamwahuo pahn ale mour soutuk; 6–12, Kapakap pwe en ale Sounkoaloalamwahuo, me kin padahngki soahng koaros; 13–22, Elder kan pahn kadeik irail kan me soikala arail padahk kan; 23–36, Peneinei kan en misineri kan pahn ale sawas sang Mwomwohdiso.
1 Mehlel, mehlel, I mahsanihong kumwail, Ngehi me kin mahsen sang ni kepitien Ngenio, iei Alpa oh Omeika, amwail Kaun oh amwail Koht—
2 Rong mwahu, kumwail kan me kilahr edemwail kan pwe en kohla kalohngki ei rongamwahu, oh en kamwakelehda ei mwetuwelo.
3 Kilang, I mahsenihong kumwail me I kupwuriki kumwail en kowei oh dehr wie wawai, de pil pohnkahke ahpw doadoahk ni uwen amwail kehlail koaros—
4 Kumwail en koasoakoasoiki ni ngihl laud duwehte ngilen seuwi ehu, kalkalohngki me mehlelo nin duwen kaudiahl kan oh kosonned akan me I ketkihong kumwail.
5 Oh pwehki met, ma kumwail loaloapwoat kumwail pahn kapaikada kapakap pwukat, oh kamwaramwarikihdi wahu, oh lingan, oh mour poatoapoat, oh mour soutuk.
6 Eri, mehlel I mahsanihong nei ladu William E. McLellin, I kasohrelahr pwukoah me I ketkihong en kohla wia ni palimese en wehi kan;
7 Oh I ketkihong ih pwukoah kapw ehu oh kosonned kapw ehu, me Ngehi, Kauno, engiengkihda pah pwehki kaulum kan en nan ah mongiong.
8 Oh e dipadahr; ahpw, I mahkohng ih oh pil ehu mahsanihong ih, En kowei ni palieir en wehi kan.
9 Oh mweidohng nei ladu Luke Johnson en iang ih, oh kalohngki soahng kan me I ketkihong irahier—
10 Likilikweriong mwaren Kauno ong Sounkaloalemwahuo, me pahn padahkihong ira soahng koaros me konehng ira—
11 Kapakap ansou koaros pwe ira dehr luwetala; oh ni ansou me ira pahn kin wia met, I pahn kin ieiang ira lao lel ni imwi.
12 Kilang, met iei kupwuren Kauno amwa Koht me pid duwen kumwa. Ihme pahn wiawi. Ahmen.
13 Oh pil, mehlel Kauno mahsaniher, en mweidohng nei ladu Orson Hyde oh nei ladu Samuel H. Smith en seilokla ni palimese en wehi kan, oh kalohngki soahng kan me I mahsanihong ira; oh ni ara pahn loaloapwoat, kilang, I pahn kin ieiang ira lao lel ni imwi.
14 Oh pil, mehlel I mahsanihong nei ladu Lyman Johnson, oh nei ladu Orson Pratt, ira en pil seilokla ni palimese en wehi kan; oh kilang, oh kilang mwahu, I pil pahn ieiang ira, lao lel ni imwi.
15 Oh pil, I mahsanihong nei ladu Asa Dodds, oh nei ladu Calves Wilson, me ira en pil seilokla ni palikapi en wehi kan, oh kalohngki ei rongamwahu, duwehte ni ei mahsanihongehr ira.
16 Oh mehmen me loaloapwoat pahn powehdi mehkoaros, oh pahn kesepwilda ni imwin rahno.
17 Oh pil, I mahsanihong nei ladu Major N. Ashley, oh nei ladu Burr Riggs, mweidohng ira en pil seilokla ni palieir en wehio.
18 Ei, mweidohng irail kan en seilokla, sang ni ruwes me I ketkihong irail, en kowei sang ni ehu ihmw ong ehu ihmw, oh sang ni ehu kousapw ong ehu kousapw, oh sang ni ehu kahnihmw ong ehu kahnihmw.
19 Oh ni sohte lipilipil ihmw me kumwail pidolong ie, oh irail aleikumwailda, pwilikihdi amwail kapai ong ihmwo.
20 Oh ni sohte lipilipil ihmw me kumwail pidolong ie, oh irail sohte aleikumwailda, kumwail pahn ansou karuaru mweselsang ni ihmwo, oh sipedesang pwelipar en paten nehmwail pwe en wia kapehm ehu ong irail.
21 Oh kumwail pahn direkihla peren oh nsenamwahu; oh ese met, me ni rahn en kadeiko kumwail pahn wia sounkopwung kan en tohn ihmwo, oh kadeik irailda;
22 Oh e pahn ekis mengei ong me kin pwongih koht likamw akan ni rahn en kadeiko, sang tohn ihmwo, eri, katengehdi lukepomwail kan oh loaloapwoatieng, oh kumwail pahn powehdi soahng koaros, oh pahn kesepwilida ni imwin rahno. Ihme pahn wiawi. Ahmen.
23 Oh pil, Kauno mahsaniher met ong kumwail, kumwail elder kan en ei mwomwohdiso, me kilahr edemwail kan pwe kumwail en kak ese sapwellime kupwur me pid duwen kumwail—
24 Kilang, I mahsanihong kumwail, me iei pwukoahn mwomwohdiso en sowese utung peneinei kan en irailko, oh pil utung peneinei kan en irailko me malipilipdahr oh anahnepe mehlel en kowei nan sampah pwe en kalohngki rongamwahuo ong tohn sampah.
25 Eri, Ngehi, Kauno, ketkihong kumwail kosonned wet, me kumwail en alehdi wasahn kouson kan ong amwail peneinei kan, ihte ma riomwail tohn mwomwohdiso kan pahn inengieng en ritingadahng kumwail arail mongiong kan.
26 Oh mweidohng koaros irailko me kak alehdi wasahn kouson kan ong arail peneinei kan, oh utuht en mwomwohdiso ong irail, en dehr sohte kohla nin sampah, ni palimese de ni palikapi, de ni paliepeng, de ni palieir.
27 Mweidohng irail en peki oh irail pahn ale, letelet oh e pahn ritidahng irail, oh e pahn sansal sang powe, iei sang Sounkoaloalemwahuo, sohte lipilipil wasa irail pahn kohla ie.
28 Oh pil, mehlel I mahsanihong kumwail, me emen emen ohl me inengieng en peihn apwalih peihn ah peneinei, mweidohng en apwalih, oh e sohte pahn kak en katiasang ah kisakis; oh mweidohng ih en doadoahk nan mwomwohdiso.
29 Mweidohng emen emen ohl en pwersek nan soahng koaros. Oh me dangahnga sohte pahn mie dowe nan mwomwohdiso, ihte ma e pahn koluhla oh kamwauiala ah wiewiah kan.
30 Eri, mweidohng nei ladu Simeon Carter oh nei ladu Emer Harris en ehupene nan doadoahk sarawio;
31 Oh pil nei ladu Ezra Thayre oh nei ladu Thomas B. Marsh;
32 Pil nei ladu Hyrum Smith oh nei ladu Reynolds Cahoon;
33 Oh pil nei ladu Daniel Stanton oh nei ladu Seymour Brunson;
34 Oh pil nei ladu Sylvester Smith oh nei ladu Gideon Carter;
35 Oh pil nei ladu Ruggles Eames oh nei ladu Stephen Burnett;
36 Oh pil nei ladu Micah B. Welton oh pil nei ladu Eden Smith. Ihme pahn wiawi. Ahmen.