Iralaud 11
Kaudiahl kohieng Soukohp Sosep Smith ong rie pwutak Hyrum Smith, nan Harmony, Pennsylvania, Mei 1828. Kaudiahl wet alahldi sang ni Urim oh Dummum me wia pasapeng ong ehn Sosep kapakap oh kalelapak. Ehn Sosep Smith poadoapoad kasalehda me kaudiahl wet alahdi mwurin kopwurupwurdohn Prihsduhd en Aron.
1–6, Tohn doadoahk en nan mwahto pahn komourla; 7–14, Rapahki eripit, kalohngki koluhla, likih Ngehno; 15–22, Kapwaiad kosonned akan, oh onopiki mahsen en Kauno; 23–27, Dehr kahmahmiki ngehn en kaudiahl oh ngehn en kokohp; 28–30, Irail akan me alehda Krais wiahla sapwellimen Koht pwutak.
1 Doadoahk kesempwal oh kapwuriamwei ehu pahn kohdo rehn aramas akan.
2 Kilang, Ngehi Koht; kumwail rong ei mahsen, me momour oh manaman, e keng sang kedlahs me au riau, e kin lelohng loalen aramas wasa me keieu rir, wasa me koakon oh sal tuhpene ie; eri rong mwahu ei mahsen kan.
3 Kilang, mwahto lellehr ansou en rahk; eri, mehmen me inangih iang sapak, mweidehng en ale kehlail nah kama, oh iang sapak ni rahn eh maramarainte, pwe en kak kihpenehng palinge komour poatoapoat nan wehin Koht.
4 Ei, mehmen me pahn ale kehlail nah kama oh sapak, e malipilipdahr sang Koht.
5 Eri, ma ke pahn peki rehi ke pahn alehdi; ma ke pahn letelet e pahn ritidahnguhk.
6 Met, nin duwen ahmw peki, kilang, I ndahionguhk, kapwaiada ei kosonned akan, oh rapahki ken kak sowese wiahda oh koasonehdi doadoahk en Saion;
7 Dehr rapahki kepwehn kepwehpwe kan ahpw rapahki eripit, oh kilang, sapwellimen Koht rir kan ahpw pahn kasansalohnguhk, oh ke ahpw pahn kepwehpwehla. Kilang, mehmen me ahneki mour soutuk e kepwehpwe.
8 Mehlel, mehlel, I ndahionguhk, iei nin duwen ahmw inangih sang rehi e pahn pweida rehmw; oh ma ke pahn inangih, ke pahn wiah aramas me pahn wiahda doadoahk mwahu laud nan dih wet.
9 Ke sohte pahn koasoia ehu soahng ahpw ke pahn koasoiahte koluhla ong dih wet; kapwaiada ei kosonned akan, oh sowese wiahda ei doadoahk, nin duwen ei kosonned kan, oh ke pahn kapaida.
10 Kilang, mie ahmw kisakis, de ke pahn ahneki kisakis ehu ma ke pahn inangih sang rehi sang ni pwoson, iangahki mohngiong mehlel, kamkamehlele manaman en Sises Krais, de nan ei manaman me koasoionguhk;
11 Pwe, kilang, iei ngehi me mahmahsen; kilang, ngehi me wia maraino me kamarainiada wasa rotorot, oh sang ni ei manaman I kihonguhk mahsen pwukat.
12 Oh met, mehlel, mehlel, I ndahionguhk, likih Ngehno me kahluweiuk en wia me mwahu—ei, en wia pwung, en weweidiki karakarahk, en tenek pwung; oh iei met Ngehnei.
13 Mehlel, mehlel, I ndahionguhk, I pahn kihonguhk Ngehnio, me pahn kamarainih ahmw madamadau, me pahn audehkihla peren palingenomw;
14 Oh ke pahn ese, de sang met ke pahn ese, soahng koaros me ke pahn inangih sang rehi, me pid soahng kan me mih ni mour pwung, ni pwoson oh kamkamehlele ie me ke pahn alehdi.
15 Kilang, I ndahionguhk me ke sohte pahn medewe me ke pahn lao malipilipda ke ahpw pahn kalohk.
16 Awiheng ekis ansou, lao ke pahn alehdi ei mahsen, ei paip, ei mwomwohdiso, ei rongamwahu, pwe ken kak ese ni mehlel ei padahk.
17 Oh eri, kilang, nin duwen ahmw ineng, iei, nin duwen ahmw pwoson e pahn pweida ong kowe.
18 Kapwaiada ei kosonned kan; koledihte ahmw popohl; peki sawas en Ngehnio;
19 Ei, tengedi rehi sang nan ahmw mohngiong unsek, pwe ken kak sawas wahdo soahng kan me I koasoia nan marain—ei, kawehwehdahn ei doadoahk; kanangamahiong lao ke pahn kanekehla.
20 Kilang, met iei ahmw doadoahk, en kapwaiada ahi kosonned akan, ei, sang nan ahmw mohngiong kak koaros, madamadau koaros, oh kehlail koaros.
21 Dehr rapahke ken kalohngki ei mahsen, ahpw rapahki ken alehda mahs ei mahsen, oh mwuri lewemwen ahpw pahn lepwedekla; eri, ma ke inangih, ke pahn alehdi Ngehnio oh ei mahsen, ei, manaman en Koht ong kamehlelehiong ei padahk aramas akan.
22 Ahpw met koledihte ahmw popohl; onopiki ei mahsen me kohweiehr rehn armas akan, oh pil onopiki ei mahsen me pahn kohwei rehn aramas akan, de me wie kaukawehweh ansou wet, ei, lao ke pahn alehdi koaros me I pahn mweidehng aramas akan nan dih wet, oh mwuri soahng koaros pahn kapatapationg.
23 Kilang kowe Hyrum, nei pwutak; rapahki wehin Koht, oh soahng koaros ahpw pahn kapatapationg nin duwen dahme pwung.
24 Kauwada pohn ei paip, me iei ahi rongamwahu;
25 Dehr kahmahmiki ngehn en kaudiahl, de pil ngehn en kokohp, pwe meid suwediong ih me pahn kahmahmikihla mepwukat;
26 Eri, nahkpene nan ahmw mohngiong lao ansouo me sang ni ei eripit pahn me ke pahn kohwei.
27 Kilang, I koasoiong koaros me ahneki ineng mehlel, oh me ale kehlail sapangki neirail kama.
28 Kilang, ngehi Sises Krais, Sapwellimen Kohto. Ngehi me mour oh marain en sampah.
29 Ngehi iei ihte me kohdo rehn pein nei aramas oh pein nei aramas sohte aleiehda;
30 Ahpw mehlel, mehlel, I ndahionguhk, me koaros me alehiukada, ong irail I pahn kihong irail manaman en wiahla sapwellimen Koht pwutak, iei irail me pahn kamehlele mwareiet. Ahmen.