Pali 83
Soukohp Sosep Smith alehdi kaudiahl nan Independence, Misori, Epreil 30, 1832. Kaudiahl wet alahldi ni ansou me Soukohpo mwomwohd nan mihting en kaweid rehn rie ohl kaun akan.
1–4, Lih akan oh seri kan kileihm arail pwoud kan oh pahpah kan ong arail anahn akan; 5–6, Liohdih kan oh seri sopwoupwou kan kileihm Mwomwohdiso ong arail anahn akan.
1 Mehlel, Kauno me mahsaniher, iren kapatapat ong kosonned akan en mwomwohdiso me pid duwen lih akan oh seri kan, irail kan me wia tohn mwomwohdiso, me arail pwoud kan oh pahpah kan wisiksang irail;
2 Lih akan kileihm arail pwoud kan ong arail anahn akan, lao arail pwoud kan mehsang irail; oh ma irail sohte pahn wiahda dihp irail pahn kak ahneki pwuhng koaros nan mwomwohdiso.
3 Oh ma irail sohte loaloapwoat irail sohte pahn ahneki pwuhng kan nan mwomwohdiso; ihte irail kak mimihdihte nan arail sapwen sohsoh kan nin duwen kosonned akan en sahpw.
4 Seri koaros kileihm arail pahpa oh nohno ong arail anahn akan lao irail laudla.
5 Oh mwurin mwo, irail ahpw pahn kileihm mwomwohdiso, me wewehki wasahn nahk en Kauno, ma arail pahpa oh nohno sohte kiheng irail sapwen sohsoh kan.
6 Oh wasahn nahko pahn wie nekinekte sang ni sawas akan me kin kohieng mwomwohdiso; oh lihodih kan oh seri sopwoupwou kan pahn ale sawaseperail, oh pil me semwehmweh kan. Ahmen.