Iralaud 33
Soukohp Sosep Smith alehdi kaudiahl ong Ezra Thayre oh Northrop Sweet, nan Fayette, New York, Oaktohpe 1830. Nan kapehsehn kaudiahl wet, ahn Sosep Smith poadoapoad kasalehda ni mehlel me “Kauno … kin ketin onopadahr pwe en kaweid irail akan me kin pwersekiong rapahki ni pwoson.”
1–4, Tohn doadoahk kan malipilipdahr pwe ren kalohngki rongamwahuo ni lahs en awahn doadoahko; 5–6, Mwomwohdiso wet wiawihda, oh me pilipilda kan kohpene; 7–10, Koluhla, pwe wehin nanleng kerendohr; 11–15, Mwomwohdiso wet kokouda pohn paip en rongamwahuo; 16–18, Kaunopada ong ketidohn Ohl Kamwohdo.
1 Kilang, I ndahiong kumwa, nei ladu ko Ezra oh Northrop, kumwa kihpeseng salengemwa kan oh rong mwahu kepitien Kauno amwa Koht, me sapwellimaniki mahsen me momour oh manaman, me keng sang kedlahs me au riau, me kin lellohng loalen aramas, wasa me mour oh ngehn kin tuhpene ie, wasa me koakon oh sahl kin tuhpene ie; oh iei ih me kin mwahngih madamadau kan oh ineng en nan mohngiong en aramas akan.
2 Pwe mehlel, mehlel, I ndahiong kumwa me kumwa malipilipdahr pwe kumwa en koasoakoasoiki ni ngihl laud duwehte ngihl en sewi ehu, pwe kumwa en kalohngki ei rongamwahu ong dih suwed oh dipan.
3 Pwe kilang, mwahto lellehr ansou en rahk; oh imwilahn awahn doadoahko met, oh lahs en ansou me I pahn malipe tohn doadoahk en ei mahte.
4 Oh ahi mahte olahr wasa koaros; oh sohte me kin wiewia me mwahu ihte ekeite; oh irail kin wiahda sapwung nan irair tohto pwehki doadoahk en prihskrap, koaros irail me arail madamadau kan olahr.
5 Oh mehlel, mehlel, I ndahiong kumwa, me mwomwohdiso wet me I wiadahr oh malipedahr sang nan sapwtehn.
6 Oh iei pil duwen ei pahn kihpene nei me pilipilda kan sang ni keimw pahieu en sampah, koaros irail akan me pahn kamehlele ie, oh rong mwahu ngileiet.
7 Ei, mehlel, mehlel, I ndahiong kumwa, me mwahto lellehr ansou en rahk; eri, kumwa pahn idangehng kehlail noumwa kama kan, oh dolung sang ni amwa kak unsek, madamadau unsek, oh kehlail unsek.
8 Kihpeseng ewemwa kan oh e pahn direkihla koasoi, oh kumwa pahn duwehla Nihpai en mahso, me seiloak sang Serusalem kohla nan sapwtehno.
9 Ei, kihpeseng ewemwa kan oh dehr masak koasoi, oh kumwa pahn alehdi kapakap en wisik tohto, pwe kilang, I ieiang kumwa.
10 Ei, kihpeseng ewemwa kan oh e pahn direkihla koasoi, ndinda: Koluhla, koluhla, oh kumwail kaunopada elen Kauno, kumwail kainenehla ahl akan me e pahn ketin keid ie; pwe wehin nanleng kerendohr;
11 Ei, emen emen kumwail pahn koluhla oh papidaisla ong kamwakelpen dipamwail akan; ei, papidaiskihla pihl, oh mwuri papidais en kisiniei oh Ngehn Sarawi ahpw pahn kohdo.
12 Kilang, mehlel, mehlel, I ndahiong kumwa, met iei ahi rongamwahu; oh tamataman me irail pahn pwoson ie pwe ma soh irail sohte kak komourla;
13 Oh pohn paip wet me I pahn kauwada ahi mwomwohdiso; ei, pohn paip wet me kumwa pahn kokouda powe, oh ma kumwa dadaurete, ewen kehl en ehl sohte pahn kak powehdi kumwa.
14 Oh kumwa pahn tamataman kapwaiada iren padahk oh inou kan en mwomwohdiso.
15 Oh mehmen me pahn ahneki pwoson kumwa pahn kasarawihong nan ahi mwomwohdiso, sang ni pwilidien peh kan, oh I pahn ketikihong kisakis en Ngehn Sarawi powe.
16 Oh I kihong kumwail Pwuhk en Mormon oh pwuhksarawi kan pwe en wia amwail mehn kaweid; oh manaman en Ngehnio kin kamourda soahng koaros.
17 Eri, loaloapwoationg, kapakap ansou koaros, oh kin kamwakamwakele oh kaukauoke noumwail lamp kan, oh nekinekid pile rehmwail, pwe kumwail en kak onopehng ansou me ketidohn Ohl Kamwohdo—
18 Pwe kilang, mehlel, mehlel, I ndahiong kumwa, me I pahn mwadang lelledo. Iei ni mehlel. Ahmen.