Iralaud 62
Soukohp Sosep Smith alehdi kaudiahl pohn keilen pillap en Pillap Misori nan Chariton, Misori, Oakos 13, 1831. Ih rahno me Soukohpo oh sapwellime pwihn, seiseilok sang Independence kolahng Kirtland, tuhwongedi ekei elder kan me kohkolahng sapwen Saion, oh, mwurin pereperen en rahnmwahupene, e ahpw alehdi kaudiahl wet.
1–3, Kadehdeh kan kileldier nanleng; 4–9, Elder kan pahn seilok oh kalohk nin duwen tenek mwahu oh kaweid sang Ngehno.
1 Kilang, oh rong mwahu, kumwail elder kan en ahi mwomwohdiso, Kauno amwail Koht me mahsanih, iei Sises Krais, me wia sounsawasapamwail, me mwahngih luwet en aramas oh mwomwen ah pahn sowese irail me kin ale songosong.
2 Oh mehlel mesei kat patohwan kilikilang irail kan me saikinte kohdala nan sapwen Saion; eri amwail doadoahk en misin saikinte imwisekla.
3 Ahpw, kumwail kapaidahr, pwe kadehde me kumwail wiadahr e kileldier nanleng ong tohnleng kan me apwahpwalih; oh irail kapkapinga kumwail, oh I mahkongehr dipemwail kan.
4 Oh met kumwail peusehla amwail seilok. Kapokoneikumwailpene nan sapwen Saion; oh tuhpene oh pereperenpene, oh patohwanda kamadipw sarawi ong Wasa Lapalapieh.
5 Oh kumwail ahpw pahn kak en pwurodo kadehdehki, ei, pil ni amwail pahn ehupene, de wad riemen, me pahn mwahu ong kumwail, sohte lipilipil ong ie; ihte loaloapwoat, oh kalohngki rohng kaperen kan ong tohnsampah kan, de nanpwungen kapokon en aramas suwed akan.
6 Kilang, Ngehi, Kauno, me kihkumwailpenehr pwe inouo en kak pweida, pwe me loaloapwoat kan nanpwungamwail en kak poadoandoarala oh pereperenpene nan sapwen Misori. Ngehi, Kauno, me inoukieng me loaloalpwoat kan oh I sohte kin likamw.
7 Ngehi, Kauno, I kupwiriki, ma mie nanpwungamwail me inangih dake oahs akan, de ahs akan, de kurumah kan, e pahn alehdi kapai wet, ma e alehdisang nin limen Kauno, ni e kapingki mehkoaros nan ah mongiong.
8 Mepwukat pahn mihmi rehmwail en wiawi nin duwen tenek mwahu oh sang kaweidpen Ngehno.
9 Kilang, wehio iei amwail. Oh kilang, I kin ieiang me loaloapwoat kan ansou koaros. Iei ni mehlel. Ahmen.