Iralaud 59
Soukohp Sosep Smith alehdi kaudiahl, nan Saion, Jackson County, Misori, Oakos 7, 1831. Mwohn kaudiahl wet, sahpwo kasarawialahr, nin duwen me Kauno ketin kaweidkier, oh wasa me tehnpas sarawi pahn kokouda pil kasarawilahr. Ni rahn me kaudiahl wet alahldi, Polly Knight, en Sosep Knight Sr. pwoud mehla, keieu en tohn Mwomwohdiso me mehla nan Saion. Tepin toweh kan kaweweh kaudiahl wet nin duwe met “kaukauweidki Souleng kan ia mwomwen momouriki rahn en sabad oh ia mwomwen kaisihsol oh kapakap.”
1–4, Souleng kan me pwoson nan Saion pahn kapaida; 5–8, Irail en ahniki limpoak oh papah Kauno oh momouriki Sapwellime kosonned akan; 9–19, Sang ni kapwaiada sapwellimen Kauno rahn sarawi, Souleng kan pahn kapaida ni paliwar oh palingehn; 20–24, Me kin wiahda mwahu kan ahniki inou en meleilei nin sampah wet oh mour soutik nan mour me pahn kohdo.
1 Kilang, meidpai, Kauno me mahsanih, irail kan me kohdo nan sahpw wet en kilenglahngete ei lingan ki pwoaren meserail kan, nin duwen ahi kosonned akan.
2 Ong irailko me pahn momour pahn sohsohki sampah, oh irailko me melahr pahn komoldihsang arail doadoahk kan, oh arail doadoahk kan pahn idawehn irail; oh irail ahpw pahn alehdi mwarerail nan tehnpas en Semeio, me I patohwan kaunopadahng iraillehr.
3 Ei, meidpai irail kan me nehrail kan kin keskesihnen pohn sapwen Saion, me peikiong ahi rongamwahu; pwe irail pahn alehdi ong ketingparail soahng mwahu kan en sampah, oh e pahn wiahda mehkot mwahu tohto.
4 Oh irail pahn pil kamwaramwarikihdi kapai kan sang powe, ei, oh kosonned akan sohte pahn malaulau, oh kaudiahl akan nan arail ahnsou—irail me kin pwoson oh loaloapwoat mwohi.
5 Eri, I patohwan ketkihong irail kosonned ehu, me mahsanih: Kumwail pahn poakoahng Kauno amwail Koht ni mongiongamwail unsek, amwail kehl unsek, madamadau unsek, oh roson unsek; oh ni mwaren Sises Krais me kumwail en pahn papah ih.
6 Kumwail en poakoahng mehn mpomwail duwete pein kumwail. Kumwail dehr pirap; dehr kamwahl, dehr kemehla aramas, de pil wia mehkot me duwehte.
7 Kumwail en kapingkihong Kauno amwail Koht ni mehkoaros.
8 Kumwail en wia meirong ong Kauno amwail Koht ni mour pwung, iei mongiong karakarahk oh ngehn peik.
9 Oh me kumwail en kak nantihong dehr saminkihla momour suwed en sampah, kumwail en kohla ni wasahn kaudok en kapakap oh patohwanda amwail kamadipw sarawi kan ong rahn en ahi rahn sarawi;
10 Pwe mehlel iei rahno met me idihdahr ong kumwail en komoal sang amwail doadoahk kan, oh en kasalehiong amwail loaloapwoat koaros ong Wasa Lapalapo.
11 Eri amwail inou kan pahn wiawi ni mour pwung nan rahn akan koaros oh ni ahnsou kan koaros;
12 Ahpw tamataman me ong met, ni rahn en Kauno, kumwail pahn patohwanda amwail meirong kan oh kamadipw sarawi kan ong Wasa Lapalap, wehkada dipemwail kan rehn riomwail ohl en mwomwohdiso, oh mwohn Kauno.
13 Oh ni rahn wet kumwail sohte pahn wia ehu soangen mehkot, ihte mweidohng mwongeh kan en kaunopada ong ni kahrepe ehute pwe amwail kaisihsol en kak unsek, de, ni pil ehu kaweweh, pwe kumwail en kak direkihla popohl.
14 Mehlel, iei met kaisihsol oh kapakap, de pil ehu kaweweh, pereperen oh kapakap.
15 Oh ni amwail pahn wia mepwukat ni kaping kalahngan, ni peren en amwail mongiong kan oh wiewia mwahu kan, ieremen kouruhr laudiki, pwe met e wia dihp ehu, ahpw ni peren en nan mongiong oh perepereniki wiewia mwahu—
16 Mehlel I nda, me ni amwail pahn wia met, unsek en sampah iei amwail, mahn akan en nan mohs oh mehnpihr akan, oh me kin dauhr tuhkeh kan oh me kin alu pohn sampah;
17 Ei, oh tehn tuhke molomol, oh soahng mwahu kan me pahn wiawida sang sampah, ma ong mwonge de ong likou, de ong ihmw akan, de ong ni imwen nekinek kan, de ong mwetuwel en wahntuhkeh kan, de ong nan kisin mwetuwel kan, de ong mwetin wain kan;
18 Ei, soahng koaros me wiawida sang sampah, nan ahnsou me konehng, e wiawihda ong kamwaupen aramas oh aramas en kak doadoahngki, koaros en kak kilang nsenamwahuki oh kaperenda mongiong;
19 Ei, ong mwonge oh likou, ong neme oh ong pwowe, pwehn kakehlaka paliwar oh kaperenda palingehn.
20 Oh Koht ketin kupwur perenkihda ah ketkihong soahng pwukat koaros rehn aramas akan; pwe ong ni kahrepe wet me e wiawihda ong mehn doadoahk, ni tenek mwahu, sohte dauliala, oh sohte sang ni idihd.
21 Oh sohte mehkot me aramas emen kak en mwamwahliki Koht, de sohte emen kak uhwong sapwellime engieng, ihte irailko me sohte pekmahngki arail wiewia kan koaros, oh sohte peikiong sapwellime kosonned akan.
22 Kilang, met nin duwen kosonned oh soukohp akan; eri, ieremenehr kediropwehkin ie irair wet.
23 Ahpw esehla me mehmen me pahn wia doadoahk en mour pwung pahn ale ketingpe, me iei meleilei nan sampah wet, oh mour sotuk nan sampah me pahn kohdo.
24 Ngehi, Kauno, koasoiahier met, oh Ngehno ketin kadehdehkier. Ahmen.