Iralaud 52
Soukohp Sosep Smith alehdi kaudiahl ong elder kan en Mwomwohdiso, nan Kirtland, Ohio, Suhn 6, 1831. Kapokon ehu wihwiawiher nan Kirtland, me tepida ni 3 oh imwisekla ni 6 en Suhn. Nan kapokon wet wia tepin kasarawi me wiawi ong ohpis en samworo lapalap akan, oh soangen wielikamw oh ngehn akan me kin ketewehdi aramas ahpw pwarada, kaun akan en mwomwohdiso wekpeseng oh angiangi irail.
1–2, Kapokon en mwurin met koasondier en wiawi nan Misori; 3–8, Koasoandihn seilok kan ong irail elder kan me pahn seilokpene wiawidahr; 9–11, Elder kan pahn padahngki dahme wahnpoaron kan oh soukohp akan ntingihdier; 12–21, Irail me marainkihla Ngehno pahn ale katingpen wahn arail doadoahk me iei kaping kalahngan oh eripit; 22–44, Ekei elder pilipildahr pwe irail en padapadahngki rongamwahuo kowei nan ereihn ahnsou en arail seiseiloklahng Misori ong kapokono.
1 Kilang, Kauno ahpw ketin mahsanihong elder kan me e ketin malipehier oh piladahr ni imwin rahn akan, sang ni kepitien sapwellime Ngehno—
2 Mahmahsanih: Ngehi, Kauno, pahn kasalehiong kumwail dahme I kupwuriki kumwail en wia sang met kohla lao lel ni ansou en kapokono, me pahn wiawi nan Misori, pohn sahpwo me I pahn patohwan kasarawihong ai tungoal aramas akan, me wia kadaudok en Seikop, oh irail kan me pahn sohsohki nin duwen inouo.
3 Eri, mehlel I ndahiong kumwail, mweidohng nei ladu Sosep Smith, Jun., oh Sidney Rigdon en tapiada ara seilok ansou karuwaru mwurin kaunopadah kan ah pahn wiawihda en mweselsang ara wasahn kouson, oh seiloklang nan wehin Misori.
4 Oh ni ara pahn loaloapwoatieng ie, e pahn sansalehng ira dahme ira pahn wia;
5 Oh e pahn pil, ni ara pahn loaloapwoat, e pahn sansalehng ira sapwen amwail sohsoh.
6 Oh ma ira sohte loaloapwoat, ira pahn lekdekla, nin duwen me I koasoanehdi, me I kilang konehng.
7 Oh pil, mehlel I ndahiong kumwail, mweidohng nei ladu Lyman Wight oh nei ladu John Corrill en kamwadanga ara seilok;
8 Oh pil nei ladu John Murdock, oh nei ladu Hyrum Smith, ira en pil seilokweite wasahute ahpw ira en keihdwei pali Detroit.
9 Oh mweidohng ira en seilok kowei oh padahngki mahseno ni wasah kan, sohte koaskoasoia ehu soahngen mehkot likin dahme soukohp akan oh wahnpoaron kan ntingidier, oh dahme ira alehdihsang Soun Kaloalemwahuo sang ni kapakap en pwoson.
10 Mweidohng irail en wad riemen kowei, oh mweidohng irail en padahk nin duwen me kin wiawi nan kapokon en sarawih kan, pepdaiski pihl, oh sang ni pwilidien peh kan limwahn pihlo.
11 Pwe Kauno ketin mahsanih, I pahn kamwadangahla rahn en kadeiko, pwe rahn akan pahn kohdo me I pahn kadarawei pwuhng en lao kaunda wasa.
12 Oh mweidohng nei ladu Lyman Wight en kanaiehng, pwe Sehdan men sihpih ih duwehte kilin sihd.
13 Oh kilang, mehmen me loaloapwoat pahn wiahla kaun emen me pahn kaunda soahng tohtoh.
14 Oh pil ehu, I pahn ketkihong kumwail mehn kaweid ehu ong ni meh koaros, pwe Sehdan dehr pitihkumwaildi; pwe Sehdan mihseliher nan sahpwo, oh e kohseliher pitipitihseli wehi kan—
15 Eri mehmen me kin kapakap, me palingene kin peik, ihte me I pahn pil kasamwoh ma e pahn kin peikiong ai kaweid kesempwal kan.
16 Mehmen me kin lokaia, me palingene kin peik, me ah koasoi kin ohpampap oh marain, ih sang rehn Koht ma e peikiong ai kaweid kesempwal kan.
17 Oh pil, mehmen me kin rerreriki ah lomwikinie pahn kehlaila, oh pahn ale katingpen wahn arail doadoahk en kaping kalahngan oh eripit, nin duwen kaudiahl kan oh me mehlel kan me I kihong kumwailehr.
18 Oh pil, mehmen me powehdi oh sohte mie wah, itarete eh doadoahngki mehn kaweihd wet, e sohte sang rehi.
19 Pwe, sang ni mehn kaweihd wet kumwail pahn kak kasawih ngehn akan nan kemwekid kan koaros me kin wiawi pahn lahng akan pwon.
20 Oh rahn akan lelledohr; nin duwen pwoson en aramas ah pahn pweida ong irail.
21 Kilang, kosonned wet kohieng irail elder kan koaros me I patohwan piladahr.
22 Oh pil, mehlel I ndahiong kumwail, mweidohng nei ladu Thomas B. Marsh oh nei ladu Ezra Thayre en pil tapiada ara seilok, padapadahngkihwei mahseno ni wasah kan nan sahpwohte.
23 Oh pil, mweidohng nei ladu Isaac Morley oh nei ladu Ezra Booth en tapiada ara seilok, pil padapadahngkihwei mahseno ni wasah kan nan sahpwohte.
24 Oh pil, mweidohng nei ladu Edward Partridge oh Martin Harris en patehng nei ladu Sidney Rigdon oh Sosep Smith, Jun. tapiada arail seilok.
25 Mweidohng nei ladu David Whitmer oh Harvey Whitlock en pil tapiada ara seilok, oh padahk ni wasah kan, ong nan sahpwohte.
26 Oh mweidohng nei ladu Parley P. Pratt oh Orson Pratt en tapiada ara seilok, oh padahk ni wasah kan, iei ong nan sahpwohte.
27 Oh mweidohng nei ladu Solomon Hancock oh Simeon Carter en pil tapiada ara seilok nan sahpwet, oh padapadahk kowei nan wasah kan.
28 Mweidohng nei ladu Edson Fuller oh Seikop Scott en pil tapiada ara seilok.
29 Mweidohng nei ladu Levi Hancock oh Zebedee Coltrin en pil tapiada ara seilok.
30 Mweidohng nei ladu Reynolds Cahoon oh Samuel H. Smith en pil tapiada ara seilok.
31 Mweidohng nei ladu Wheeler Baldwin oh William Carter en pil tapiada ara seilok.
32 Oh mweidohng nei ladu Newel Knight oh Selah J. Griffin ira koaros en kasarawiala, oh pil tapiada ara seilok.
33 Ei, mehlel I mahsanih, mweidohng irail pwukat koaros en tapiada arail seilok kowei ni wasah kan, nan pein arail ahl akan me irail keid loale, oh ohl emen sohte pahn kauwada ah poahsoan pohn en emen tohrohr ah poahsoan, pil duwehte sohte keidla pohn ahl me emen keidlahr ie.
34 Mehmen me pwoson, aramaso pahn mie doarepe oh kapaiki wah tohto.
35 Oh pil, I patohwanohng kumwail, mweidohng nei ladu Sosep Wakefield oh Solomon Humphrey en tapiada ara seilok ni palimese en sahpw akan;
36 Mweidohng ira en doadoahk rehn ara peneinei kan, kalkalohngki sohte ehu likin mahsen en soukohp akan oh wahnpoaron akan te, me ira patohwan kilangehr oh rongehr oh ni mehlel kamehlelehier, pwe kohkohp kan en kak pweida.
37 Pwehki e kawehla kosonned, mweidohng pwukoaho me kohieng Heman Basset en kopwurupwursang ih, oh uhd kohieng Simonds Ryder.
38 Oh pil, mehlel I patohwanohng kumwail, mweidohng Jared Carter en kasarawihong en wiahla emen samworo, oh pil George James en pil kasarawihong en wiahla emen samworo.
39 Mweidohng irail elder teiken me luwehdi en apwalih ihmw sarawih kan, oh pakaihrkihwei wasah kan koaros nan arail wehio; oh mweidohng irail en doadoahk ni arail pahn doadoahngki pein pehrail kan pwe en dehr mie ansou en pwongih dikadik suwed kan de wiewia suwed kan.
40 Oh tamataman nan soahng koaros ong me semwehmwe oh me anahne sawas, me soumwahu oh me lokolok, pwe mehmen me sohte pahn wia mepwukat, kaidehn ih ai tungoal tohnpadahk.
41 Oh pil, mweidohng nei ladu Sosep Smith, Jun., oh Sidney Rigdon oh Edward Partridge en wahda ehu kisin likou en mweimwei sang mwomwohdiso. Oh en pil mie ehu wiawihda ong nei ladu Oliver Cowdery.
42 Oh met, itarete ai mahsanihero, ma kumwail pwoson kumwail pahn pokonpene pereperenpene nanpwungamwail pohn sahpw en Misori, me wia sapwen amwail sohsoh, me ansou wet wiahier sapwen amwail imwintihtih kan.
43 Ahpw, kilang, Ngehi, Kauno, pahn kamwadangahla ahnsou nan kanihmwo, oh pahn kamwaramwarih irail kan me pwoson ki popohl oh peren.
44 Kilang, Ngehi me Sises Krais, Ieros en Koht, oh I pahn kasapwilada irail ni imwin rahno. Iei ni mehlel. Ahmen.