Iralaud 24
Kaudiahl kohieng Soukohp Sosep Smith oh Oliver Cowdery, nan Harmony, Pennsylvania, Sulai 1830. Mehndahte Mwomwohdisohu saikinte lel sounpwung pahieu mwurin eh wiawihda, kahpwal en kailok lalaudla, oh kaun akan kin anahne anahne rukila ekei pak pwe en wia pereparail. Kaudiahl silupwoat me mih pah kohda nan ahnsouo pwe en kakehlaka, kangoange, oh kaweid irail.
1–9, Sosep Smith malipilipda pwe en kawehweh, kalohk, oh kauwahsek pwuhksarawi kan; 10–12, Oliver Cowdery malipilipda pwe en kalohngki rongamwahuo; 13–19, Kosonnedo kin kasalehda duwen doadoahk kapwuriamwei kan, duwen keria kan, duwen sipedasang pwelen nehn aramas men, oh duwen kohkohwei sohte wa pilihs de koaruk en seilok.
1 Kilang, ke malipilipdahr oh pilipilda pwe ken ntingih Pwuhk en Mormon, oh ong ei doadoahko; oh I doarehsanguhkehr nan ahmw kahpwal akan, oh kaweiduhkehr, oh ke poadoandoarsangehr rehn ahmw imwin kan, oh ke poadoandoarsangehr manaman en Sehdan oh sang rotorot!
2 Ahpw, dipomw kan sohte pahn mie peikidpe; ahpw, kohkohwei oh dehr pwurehng wiahda dihp.
3 Wahuniki oh wia pwukoahn ahmw ohpis; oh mwurin ahmw pahn padokedi ahmw mwetuel oh silehdi, kohwei ansou mwadang ni mwomwohdiso me mih nan Colesville, Fayette, oh Manchester, oh irail pahn utunguhkada; oh I pahn kapaiada irail ni palingehn oh paliwar;
4 Ahpw ma irail pahn sohte aleiukada, I pahn keriairailla oh sohte kapaiada irail.
5 Oh ke pahn loalloapwoationg peki rehn Koht ni mwarei, oh ntintingihdi soahng kan me ke pahn kohienguhk sang rehn Sounkaloalamwahuo, oh kauwahsek pwuhksarawi kan koaros ong mwomwohdiso.
6 Oh e pahn kohienguhk nan ansouohte dahme ke pahn koasoia oh ntingih, oh irail pahn rong, ma soh I pahn kadarewei rehrail karia ehu ahpw kaidehn kapai.
7 Pwe ke pahn loaloapwoationg ahmw papah koaros nan Saion; oh nan papah wet ke pahn ahneki kehlail.
8 Kanangamah nan kahpwal akan, pwe ke pahn ahneki kahpwal tohto; ahpw kanangahmahiong irail, pwe, kilang, I pahn ieianguhk, lao lel imwin ahmw rahn akan.
9 Oh nan doadoahk en sampah ke sohte pahn kehlailiong, pwe kaidehn ih ahmw pwukoa met. Kapwaiada ahmw pwukoa oh ke pahn alehdi dahme ke pahn anahne pwe ken wia ahmw pwukoahn ohpis, oh alehdi dahme ke pahn anahne pwe ken kauwahsek pwuhksarawi kan koaros, oh uhsehla wia doadoahk en pwilidi en peh kan oh kasarawihla mwomwohdiso kan.
10 Oh riomw ohl Oliver pahn uhsehla kadehdehki mwareie mwohn sampah, oh pil ong mwomwohdiso. Oh e sohte pahn medewe me e itarehr dahme e koasoia nan ei doadoahk; oh kilang, I pahn ieing ih loa lel imwi.
11 E pahn alehdi rehi lingan, oh kaidehn saing pein ih, ni ansou luwet de kehlail, de ni ansou selidi de saledek;
12 Oh nan ansou koaros, oh wasa koaros, e pahn kin kihpeseng ewe oh kalohngki ei rongamwahu duwehte ngilen sowi ehu, nihrahn oh nihpwong. Oh I pahn kihong ih kehlail me sohte aramas men wehwehki.
13 Dehr peki manaman kapwuriamwei, ihte ma I pahn mahsenihonguhk, ihte ma ong kausala tepel kan, ong kamwahuiala me soumwahu, oh ong poisin en serpent kan, oh ong wini suwed kan;
14 Oh mepwukat ke sohte pahn wia, ihte ma irail akan me anahne pahn inangih, pwe pwuhksarawi kan en kak pweida; pw eke pahn wia nin duwen dahme ntingihdier.
15 Oh nan wasa sohte lipilipil me kumwa pahn pidelong, oh irail sohte aleikumwahda ni mwarei, kumwa pahn pwilikihdi keriah ahpw kaidehn kapai, sang ni amwa pahn sipedasang pwelen nehmwa ong irail pwe en wia ehu kadehde, oh sipisipedasang pwelen nehmw kohwei nan ahlo.
16 Oh ansou pahn kohdo me mehmen me pahn song en kauweikumwahla, kumwa pahn mahsanih en kamakam ni mwarei; oh, kilang, I pahn kaloke irail nin duwen amwa mahsen kan, nin duwen ei ansou.
17 Oh mehmen me pahn kihong kumwa nan kosonned e pahn keriahla pahn kosonnedo.
18 Oh ke sohte pahn wahda pilihs de pil koaruk en seiloak, de pil sokon, de pil sekid riau, pwe mwomwohdiso we pahn kihonguhk nan ansouohte me ke pahn anahne mwonge de likou, oh ong suht de mwohni, oh koaruk en seiloak.
19 Pwe kumwa malipilipda pwe en kamwakele ei mwetuwelo sang ni kamwakel kehlail, iei, ong ni imwin ahnsou; ei, oh pil irail koaros me komw kasarawilahr, oh irail pahn wia nin duwen wiepe wet. Ahmen