Pali 77
Soukohp Sosep Smith alehdi kaudiahl nan Hiram, Ohio, ele Mahs 1832. Poadoapoad en Sosep Smith koasoia, “Ni ah wia kisehn kawewehpen Iren Pwuhk Sarawi kan, I alehdi duwen kaweweh kan en Kaudiahl en St. Sohn.”
1–4, Mahn akan ahniki ngehn kan oh pahn iang mih nan wasa peren soutuk; 5–7, Sampah wet ahniki lepin ahnsou en pahr 7,000; 8–10, Ekei tohnleng kan me kapwurehdo rongamwahuo oh papah pohn sampah; 11, Katengtengpenehn meh 144,000; 12–14, Krais pahn ketido ni tepin pahr en ke-isikido; 15, Soukohp riemen pahn epwelda ong wehin Suhs.
1 Peidek. Dahkot sehd en kilahs me Sohn koasoia, nan irelaud 4, oh iretikitik 6 en Kaudiahl?Pasapengpen peidek. Iei sampah, ni ah kasarawialahr, solahr pahn kak mie mehla, oh momour kohkohlahte.
2 Peidek. Dahme kitail en wewehki sang mahn pahmeno, me koasoiepe mih nan iretikitikohte?Pasapengpen peidek. Irail wia men kaweweh kei, me Sohn, soun Kaudiahlo doadoahngki, ni ah kaukauwehwe nanleng, paradais en Koht, peren en aramas, oh mahn akan, oh soahng kan me kin limwahdek, oh mehn pihr akan; me ahniki palingehn me duwehte paliwar; oh me ahniki paliwar me duwehte palingehn; ngehn en aramas me duwehte pein paliwere, me pil duwehte ngehn en mahn, oh koaros me Koht ketin kapikada.
3 Peidek. Mahn pahmeno e ongete emen emen mahn akan, de irail welian ehu ehu pwihn akan de irekdien mahn akan?Pasapengpen peidek. Irail ongete emen emen mahn pahmen kau, me sansalohng Sohn, pwe en wia kasalepen lingan en ehu ehu pwihn en mahn akan nan arail wasa me koasondieng irail de wasa me ongete irail, perepereniki arail peren soutuk.
4 Peidek. Dahme kitail en wewehki sang pwoaren mas oh mehn pihr kan, me mahn akan ahniki?Pasapengpen peidek. Pwoaren masarail kan wewehki marain oh loalokong, me iei, irail ahniki loalokong laud; oh arail mehn pihr kan wewehki kehlail, en kak mwekid, kak wia mehkot, soahng teikan.
5 Peidek. Dahme kitail en wewehki sang mahn pahmeno oh elder riehko, me Sohn mahsanio?Pasapengpen peidek. Kitail en wewehki me elder pwukat me Sohn kilangada, iei elder kan me loaloapwoatieng nan doadoahk en papah oh irail melahr; me wia kisehn mwomwohdiso isuho, oh mwuhr re ahpw iang mih nan paradais en Koht.
6 Peidek. Dahme kitail en wewehki sang ni pwuhk me Sohn kilangada, me katengtengkipene mehn kateng isuh?Pasapengpen peidek. Kitail en wewehki me e audawudkihda kupwur me kasansaladahr, me rir kan, oh doadoahk kan en Koht; soahng kan me nekinekla ong sapwellime doadoahk en pweida me pid duwen sampaht nan irair en pahr isikid me pahn wiawi kohla, de nan erein e pahn wie mihmi.
7 Peidek. Dahme kitail en wewehki sang ni mehn kateng isuh me e katengtengkipenehu?Pasapengpen peidek. Kitail en wewehki me keieu en mehn kateng audawudkihda soahng kan en keieu en pahr kid, oh keriauo pil ong pahr riekid, oh lao lel keisuho.
8 Peidek. Dahme kitail en wewehki sang tohnleng pahmeno, me mahsenpe mih nan irelaud 7 oh ire tikitik 1 en Kaudiahl?Pasapengpen peidek. Kitail en wewehki me irail wia tohnleng pahmen me pekederdo sang Koht, me ale manaman ong keihmw pahieu en sampah, pwe en doarehla mour oh kawehla; iei irail pwukat me kolokol rongamwahu poatoapoato pwe en lohkihong wehi koaros, kadaudok koaros, lokaia koaros, oh aramas koaros; me ahniki manaman en katokehdi nanleng kan, pwe en katengehdieng mour, de en lekdekdilahng nan wasa rotoroto.
9 Peidek. Dahme kitail en wewehki sang ni tohnleng me kohdihdo sang ni palimese, nan Kaudiahl irelaud 7 oh ire tikitik 2?Pasapengpen peidek. Kitail en wewehki me tohnleng me kohdihdo sang palimese iei ih me weuwa sapwellimen Koht ieias mehn sihl ong keinek eisek riau en Israel; eri, e ahpw lohkihong tohnleng pahmeno me kolokol rongamwahu poatoapoato, ketihtihki: Dehr kawehla sampah, de nansed, de pil tuhkeh kan, lao se kihong kilelen sihl pohn tomwen sapwellimen atail Koht ladu kan. Oh, ma kumwail pahn alehda, iei Elaias met me pahn kohdo pwe en kapokonepene keinek kan en Israel oh kapwurehdo soahng koaros.
10 Peidek. Ansou da me koasoiepen soahng kat en nan irelaud wet me e pahn pweida?Pasapengpen peidek. Irail pahn pweida nan pahr wenekido, de ni ansou me kewenou en sihl pahn kedpeseng.
11 Peidek. Dahme kitail en wewehki sang ni kilel en sihl ong meh lopw pahnen pahkid, sang ni keinek kan koaros en Israel—meh nen riekid sang nan ehu ehu keinek?Pasapengpen peidek. Kitail en wewehki me irailko me kilelen sihl mih rehrail iei irail samworo lapalap akan, kasarawialahr sang ni koasondi sarawi en Koht, pwe en apwalih rongamwahu poatoapoato; pwe iei irail me kasarawialahr sang nan ehu ehu wehi, kadaudok, lokaia, oh aramas akan, sang tohnleng kan me ahniki manaman ong wehi kan en sampah, pwe en wahdo uwen tohto me pahn kohdo rehn mwomwodihso en Mesenih.
12 Peidek. Dahme kitail en wewehki sang ni ngilen seuwi kan, me sansal nan irelaud 8 en Kaudiahl?Pasapengpen peidek. Kitail en wewehki me ni ansou me Koht kapikada sampah ki rahn weneu, oh keisuh en rahn e kaimwsekala sapwellime doadoahk, oh kasarawiala, oh pil kapikada ohl emen sang ni pwehl en sampah, iei me wiawi, sang ni tepin pahr isikid me Kauno Koht pahn kasarawiala sampah, oh kawunsekiala komourpen aramas, oh kadeik soahng koaros, oh pahn kamourala soahng koaros, ihte me e saikinte ketkihong sapwellime manaman, ni ansou me e pahn katengehdi soahng koaros, lel ni imwin soahng koaros; oh ngilen seuwi kan en tohnleng isimeno iei me wia kaukaunopadahn oh kaimwsekialahn sapwellime doadoahk, ni tepin pahr isikido—kaukaunopadahn ahlo mwohn rahn en sapwellime ketidou.
13 Peidek. Ansou da me soahng kan pahn pweida, me ntingdi nan irelaud 9 en Kaudiahl?Pasapengpen peidek. Irail pahn pweida mwurin kedpeseng en keisuhn sihl, mwohn ketidohn Krais.
14 Peidek. Dahme kitail en wewehki sang ni kisin pwuhk me Sohn kangala, me sansal nan irelaud 10 en Kaudiahl?Pasapengpen peidek. Kitail en wewehki me e wia pwukoah ehu, oh tiahk sarawi ehu, ong ih en kapokonepene keinek kan en Israel; kilang, Elaias met, me, ni eh ntingdier, anahne en kohdo oh kapwurehdo soahng koaros.
15 Peidek. Dahme anahnepe en wewehki sang soun kadehde riemen kau, me sansal nan irelaud eisek ehu en Kaudiahl?Pasapengpen peidek. Ira wia soukohp riemen me pahn epwelda rehn wehin Suhs ni imwin rahn akan, ni ahnsou en kopwurupwurdou, oh en kohpadahng mehn Suhs kan mwurin arail pahn kapokonpene oh kawada kahnihmw en Serusalem nan sapwen arail pahpahko.