Pali 63
Soukohp Sosep Smith alehdi kaudiahl nan Kirtland, Ohio, Oakos 30, 1831. Soukohpo, Sidney Rigdon, oh Oliver Cowdery lellehr nan Kirtland ni Oakos 27 mwurin arail seilokih Misori. Nan poadoapoad en Sosep Smith e kawewehda kaudiahl wet me: “Nan ereihn tepidahn rahn akan en Mwomwohdiso, mie lapalahn kapwunod ehu ong alehda mahsen en Kauno nan ireh kan koaros me pid duwen atail komour; oh pwehki met sapwen Saion wia ire kahrepe keieu kesempwal ehu me sansal, I kalelapak rehn Kauno ong ireh kan me pid kapokonpenehn Souleng kan, oh pweipweidahn sahpw, oh soahng teikan.”
1–6, Rahn en kalokoloko pahn kohdo pohn me suwed kan; 7–12, Kilel kan wiawi sang ni pwoson; 13–19, Me wia dipen kamwahl nan kapehde pahn kahmahmkihla ah pwoson oh lekdeklahng nan lehn kisiniei; 20, Me loaloapwoat akan pahn ale dewerail ni ansou me sampah pahn kiewekla; 21, Unsek en koasoiepen kemwekid kan me wiawi pohn Nahna en Kiewekla saikinte sansal; 22–23, Me peik kan ale mehlel rir kan en wehio; 24–31, Sapwen sohsoh kan nan Saion pahn anahne en pweipweida; 32–35, Kauno kalohngkihda mahwin kan, oh me suwed kan kin kemehla me suwed kan; 36–48, Souleng kan en pokonpene Saion oh sawaskihda mwohni kan pwehn kawada; 49–54, Kapai kan me Koht inoukiheng me loaloapwoat kan ni rahn en Ketido Keriau, rahn en Iasadao, oh ereihn ahnsou en Mileniemo; 55–58, Iei rahno met me wia rahn en mpeng, 59–66, Irail kan me doadoahngki mwaren Kauno ni sohte ahniki mweimwei, kasaminelahr mware.
1 Rong mwahu, kumwail aramas akan, oh ritingada amwail mongiong kan oh me doh kan en pil rong mwahu; oh nantiheng rong, kumwail me kin nda me kumwail aramas en Kauno, oh rong mahsen en Kauno oh sapwellime kupwur ong kumwail.
2 Ei, mehlel, I patohwan mahsanih, rong mahsen en ih me lingeringerdahr pahn me suwed oh kahngohdi kan;
3 Iei kupwure, en pilada ihs me e pahn kihsang arail mour, oh en doarehla mour en irail me e men doarehla; Me e pahn pilada en kihsang arail mour mehel irail, ihs me e pahn kihsang, oh en doare arail mour, ihs me e pahn doarehla.
4 Me kawada sang ni pein nsene oh ineng; oh kawehla ni ansou me e kupwuriki, oh kak en kesehdihla ngehn nan ehl.
5 Kilang, Ngehi, Kauno, lokaiahki ngilei, oh e anahne en peikiong.
6 Eri, mehlel I patohwan mahsanih, mweidohng me suwedo en kanaiehng, oh mweidohng me kahngohdio en masepwehkada oh rerrer; oh mweidohng me sohte kin kamehlele kan en kihpene ewerail kan, pwe rahn en kalokoloko pahn lelledohng irail duwehte elipip ehu, oh aramas koaros pahn dehdehki me Ngehi me Koht.
7 Oh irail kan me kin rapahki kilel kan pahn kilang kilel kan, ahpw kaidehn ong en komourkihla.
8 Mehlel, I ndahiong kumwail, mie nan pwungamwail me kin raparapahki kilel kan, oh mie me kin wia sang ni tapio;
9 Ahpw, kilang, pwoson sohte kin miehda sang ni kilel kan, ahpw kilel kan kin idawehn irail kan me kin kamehlele.
10 Ei, kilel kan kin wiawi sang ni pwoson, kaidehn sang ni nsenen aramas, de sang ni arail inangih, ahpw e sang ni kupwuren Koht.
11 Ei, kilel kan kin wiawi sang ni pwoson, ong doadoahk kehlail kan, pwe ma sohte pwoson sohte aramas emen kak kansanamwahuih Koht; oh mehmen me Koht lingeringerda pah e sohte pahn nsenamwahu; eri, ong irail me sohte kilang kilel kan, ihte engieng en Kauno me pahn wia amwail kalokolok.
12 Eri, Ngehi, Kauno, sohte kupwurpereniki irailko nanpwungamwail me kin raparapahki kilel kan oh manaman kan pwe en kak ahniki pwoson, oh kaidehn ong kamwaupen aramas akan ong ahi lingan.
13 Ahpw, I patohwanda kosonned akan, oh me tohto me sohpeisang ahi kosonned akan oh sohte kapwaiada.
14 Mie nanpwungamwail ohl kamwahl kan oh lih kamwahl kan; ekei irail me sohpeisang kumwailehr, oh ekei wie mihmihte rehmwail me mwurin ansou kis e pahn sansalada.
15 Mweidong aramas akan en kanaiehng oh koluhla ansou mwadang, pwe ma soh a kadeiko pahn leledohng irail rasehng nsar ehu, oh arail pweipwei pahn sansalada, oh arail doadoahk kan pahn idawehn irail mwohn mesen aramas akan.
16 Oh mehlel I ndahiong kumwail, ni Ai patohwan mahsaniher ninkapwan, mehmen me pahn kilikilang lih emen ni ineng suwed, de ma mie emen me wiadahr dipen kamwahl nan arail mongiong, Ngehno sohte pahn ieiang irail, ahpw pahn kamahmkihla pwoson oh ahniki masepwehk.
17 Eri, Ngehi, Kauno, patohwan mahsaniher me masepwehk kan, oh me kahmahmkihla arail pwoson kan, oh me kin lokaia likamw kan koaros, oh mehmen me kin pereniki oh wiahda likamw, oh sounkamwahl, oh sounwunahni, irail pahn ale dewerail nan leh me kin lululiki kisiniei oh suwepel, me wia keriau en mehla.
18 Mehlel I patohwan mahsanih, me irail sohte pahn iang mih nan keieu en iasadauo.
19 Oh met kilang, Ngehi, Kauno, patohwan mahsanihong kumwail me kumwail saikinte pwungila, pwehki soahng pwukat wie mihmihseli nan pwungamwail.
20 Ihme kahrehda, mehmen me dadaurete ni pwoson oh wia nin duwen me I kupwuriki, ihte aramaso me pahn pil powehdi, oh pahn ale sapwen sohso pohn sampah ni ansou me rahn en kieweklao pahn leledo;
21 Ni ansou me sampah pahn kiewekla, mehlel ong nin duwen mehn kaweid me kasansalohng nei wahnpoaron kan pohn nahnao; kumwail saikinte alehdi unsek en poadoapoad wet.
22 Oh met, mehlel I ndahiong kumwail, me ni Ai ndahier me I pahn kasalehiong kumwail dahme I kin kupwuriki, kilang I pahn kasalehda pwe en sansalohng kumwail, kaidehn sang ni mwohmw en kosonned ehu, pwe me tohto me sohte kin kapwaiada ai kosonned akan.
23 Ahpw ong ih me kin kapwaiada ai kosonned akan I pahn kihong ih mehlel rir kan en ai wehio, oh ongete ih me pahn pil ahniki pwarer en pihl en komour, kuskusdahng mour soutik.
24 Oh met, kilang, met iei kupwuren Kauno amwail Koht duwen sapwellime souleng kan, me irail anahne en kapokoneirailpene nan sapwen Saion, ni sohte pwurur, pwe en dehr mie kepingiping, me kin kahrehda soumwahu lusulus.
25 Kilang, sapwen Saion—Ngehi, Kauno, me kin apwahpwalih;
26 Ihme kahrehda, Ngehi, Kauno, kihong Sihsar dipisou kan me en Sihsar.
27 Eri, Ngehi Kauno kupwuriki me kumwail en pwainda sahpw akan, pwe kumwail en mih nan irair ehu me sampah sohte kak kaweikumwailla, pwe kumwail en kak ahniki pwuhng pohn sampah, pwe irail en dehr kak lingeringerda.
28 Pwe Sehdan kihongehr nan arail mongiong kan irail en lingeringerda pahmwail, oh kakerehdi nta.
29 Eri, sapwen Saion sohte pahn kak kasapwasapwla ihte ma e sang ni pweipweida de sang ni kakerehdi en nta, ma soh a e pahn sohte sapwemwail sohso.
30 Oh ma e sang ni pweipweida, kilang kumwail pahn kapaida;
31 Oh ma sang ni kakerehdi en nta, ni amwail kaliksang en kakerehdi nta, kilang, amwail imwintihti kan pahn kodohng kumwail, oh kumwail pahn kalokolok sang ni ehu kahnihmw kolahng ehu kahnihmw, oh sang ni ehu sinakoke kolahng ehu sinakoke, oh me malaulau me pahn luwehdi ale sapwerail sohso.
32 Ngehi, Kauno, lingeringer pahn aramas suwed kan; I kolokol Ngeniet sang tohnsampah kan.
33 I inoukidahr ni ei engiengda, oh kalohngkidahr mahwin kan pohn sampah, oh aramas suwed akan pahn kemehla aramas suwed akan, oh aramas akan koaros pahn masepwehkada.
34 Oh souleng kan pahn pil apwalen sopohla; ihme kahrehda, Ngehi, Kauno, pahn ketiket rehrail, oh pahn kohdidohng nan lahng sang rehn Semeio oh isikala aramas suwed kan nan kisiniei sekehkun.
35 Oh kilang, met e saik wiawi, ahpw e kereniengehr.
36 Eri, kilang me Ngehi, Kauno, kalohngkidahr mepwukat koaros pohn sampah, eri I kupwuriki me nei souleng kan anahne en pokonpene nan sapwen Saion;
37 Oh me aramas koaros en alehda mour pwung nan pehrail kan oh loaloapwoatieng pein irail, oh kapwulewei mahsen en mpeng ong tohnsampah kan; oh pakaihrkihda sang ni lokaiah kan oh sang ni sopohla me kamwomwola laud pahn lelohng aramas suwed akan.
38 Eri, mweidohng nei tohnpadahk kan nan Kirtland en koasoanehdi arail iren kapwunod kan en momour en paliwar, me kousondieng nan mwaht wet.
39 Mweidohng nei ladu Titus Billings, me pwukoahki wasahuo, en kesehla sahpwo, pwe en kak kaunopehng nan irair en ansou en osadahn wahntuhke pwe en tapiada ah seilok kolahng sapwen Saion, pwe en iang irailko me kouson wasahuo, ihte irailko me I katohrehla ong ni kahrepe me I ahniki, me sohte pahn kohla lao I pahn ndahiong irail.
40 Oh mweidohng mwohni koaros me kak sawas, sohte lipilipil ong ie ma e tikitik de laud, en pekederdalahng sapwen Saion, ong irailko me I idiadahr en kin ale.
41 Kilang, Ngehi, Kauno, pahn kihong nei ladu Sosep Smith, Jun., manaman pwe en kak kahrehieng en ese sang ni Ngehno ihs irail kan me pahn kohdala nan sapwen Saion oh ihs irail nei tohnpadahk kan me pahn mihmi.
42 Mweidohng nei ladu Newel K. Whitney en kolokolete ah sidohwa, me wewehki, sidohwao, en mwur mihmi mahs ong lepin ahnsou.
43 Ihme kahrehda, mweidohng ih en kihla mwohni koaros me e kak kihla, pwe en pekederdalahng sapwen Saion.
44 Kilang, mepwukat ih me apwahpwalih, mweidohng ih en wia nin duwen eh maraihniki.
45 Mehlel I koasoia, en mweidohng ih en pilipilda en wia sounweliepe ong tohnpadahk kan me pahn mihmi, oh mweidohng ih en kasarawihong manaman wet.
46 Oh met ni ahnsou mwadang pwarek ihmw sarawi kan, kauwahsak mepwukat ong irail, rehn nei ladu Oliver Cowdery. Kilang, ih kupwurei met, aliale mwohni nin duwen ai kin kaweidki.
47 Mehmen me kin loaloalpwoat oh daudaurete pahn powehdi sampah.
48 Mehmen me kadarala ah sohso kan nan sapwen Saion pahn alehdi sapwen sohso pohn sampah, oh ah doadoahk pahn idawehn ih, oh pil katingpe nan mour mwurin mour wet.
49 Ei, oh meidpai me melahr akan me mehla ni arail loaloapwoatieng Kauno, pwe sang met kohla, ni ansou me Kauno pahn ketido, oh soahng mering kan pahn sohrala, oh soahng koaros me kapw pahn uhd wiliandi, irail pahn iasadahsang mehla oh sohte pahn pwurehng mehla, oh pahn alehdi sohso mwohn Kauno, nan kahnihmw sarawio.
50 Oh mehmen me pahn wie momourete ni ansou me Kauno pahn ketido, oh kolokolete pwoson, meidpai ih; ihme kahrehda, e pilipilda ong ih en mehla ni ah wia sounpar en ohl emen.
51 Eri, serih kan pahn kekeirda lao irail mahla; aramas mah kan pahn mehla; ahpw irail sohte pahn seridieng pahn pwehl, ahpw irail pahn kiewekla ni marep ehu.
52 Eri, pwehki ni kahrepe wet me wahnpoaron kan kalohngki duwen iasadahn me melahr akan ong sampah.
53 Iei soahng pwukat me kumwail anahne rapahki; oh, nin duwen me Kauno ketin mahsanih, met irail kerendohr, oh nan ahnsou ehu me e pahn kohdo, pil ni rahn en ketidohn Nein-Aramas.
54 Oh lao lel ni awao e pahn mie meipwon pweipwei kan nan pwungen me loalokong kan; oh ni awao ah pahn lel me katohrohrpeseng en me mwahu kan oh me suwed kan; oh ni rahno me I pahn kadarewei nei tohnleng kan pwe en katohrehla me suwed kan oh keseirailahng nan kisiniei sekehkun.
55 Oh met kilang, mehlel I ndahiong kumwail, me Ngehi, Kauno, I sohte kupwurpereniki nei ladu Sidney Rigdon; e pein kapinga pein ih, oh sohte men alehda kaweihd, ahpw kansensuwedialahr Ngehno;
56 Eri dahme e ntingihdi Kauno sohte alehda, oh e pahn pwurehng wiahda ehu; oh ma Kauno sohte pahn alehda, kilang e solahr pahn kolokol pwukoah me I idiadahngo.
57 Oh pil, mehlel I ndahiong kumwail, irail me inangih nan arail mongiong kan, me kin mpai, en kaparki me dipan akan en koluhla, mweidohng irail en kasarawihong manaman wet.
58 Pwe iei ih rahn en mpengo met, oh kaidehn rahn en mahsen tohto. Pwe Ngehi, Kauno, sohte me kak pitih ie ni imwin rahn akan.
59 Kilang, I kohsang nanleng, oh I pil ahiniki manaman pohn sampah kan me mih pahn lahng. Ngehi me kaun en mehkoaros, oh wia kisehn soahng koaros, oh ni mehkoaros, oh kin tehk mwahu soahng koaros, oh rahno pahn kohdo me soahng koaros pahn mih pahn ai manaman.
60 Kilang, Ngehi me Alpa oh Omeka, pil Sises Krais.
61 Eri, mweidohng aramas akan en kaperikinirail mwomwen arail kin doadoahngki mwareiet nan arail lokaiah kan—
62 Pwe kilang, mehlel I koasoia, me me tohto wasaho me milahr nan kalokolok wet, me kin doadoahngki mwaren Kauno, oh doadoahngki ni samin, ni arail sohte ahniki mweimwei.
63 Eri, mweidohng tohn mwomwohdiso en koluhkihla diperail kan, oh Ngehi, Kauno, pahn aleirailda; ma soh a irail pahn lekdekla.
64 Tamataman me dahme kin kohsang nanleng e sarawi, oh anahne aramas en koasoia ni keneinei, oh sang ni pepehm en Ngehno; oh met sohte me pahn uhwong, oh kumwail pahn alehdi Ngehno sang ni kapakap; eri, ma sohte soahng wet a uhpene pahn wihwiawihte.
65 Mweidohng nei ladu kan, Sosep Smith, Jun., oh Sidney Rigdon, en rapahki ara wasahn kouson, ni ara kin alehdi kaweid nan ara kapakap sang Ngehno.
66 Mepwukat pahn kin powehdi sang ni kanengamah, pwe irail en kak alehdi lingan lap soutuk me sikila, ma soh, a lapalahn kalokolok. Ahmen.