Iralaud 28
Kaudiahl kohieng Soukohp Sosep Smith, nan Fayette, New York, Septempe 1830. Hiram Page, emen tohn Mwomwohdiso, nainiki takai ehu oh kosoia me e alialehdi kaudiahl kan sang ni sawaspen kokoudahn Saion oh koasondi en Mwomwohdiso. E ketewehdier ekei towe kan sang ni eh koasoi kan, oh pil Oliver Cowedery sapwungala sang ni eh kamehlele koasoi pwukat. Mwohnte tiepenehn kapokon ehu me koasondi, Soukohpo ahpw ngidingidi eh peki rehn Kauno duwen irair wet, oh kaudiahl wet ahpw kohda.
1–7, Sosep Smith kolokol kih kan en me rir kan, oh ih kelehpw me kak alehdi kaudiahl kan ong Mwomwohdiso; 8–10, Oliver Cowdery en kohlohkehng Mehn Leimen kan; 11–16, Sehdan ketewehdi Hiram Page oh kihong kaudiahl likamw kan.
1 Kilang, I ndahionguhk, Oliver, e pahn mweimweionguhk mwomwohdiso en karongeiuk nan soahng koaros me ke pahn padahngki sang ni rehn Sounkaloalamwahuo, nin duwen kaudiahl akan oh kosonned akan me I kihweiehr.
2 Ahpw, kilang, mehlel, mehlel, I ndahionguhk, sohte emen pahn idihda en alehdi kosonned akan oh kaudiahl akan nan mwomwohdisoh wet ihte nei sounpapah Sosep Smith, Jun., pwe e pahn kin alehdi kaudihal oh kosonned akan duwehte Moses.
3 Oh ke pahn kin peikiong soahn kan me I pahn ketikihong ih, duwehte Aron, en loaloapwoationg kalohngki kosonned oh kaudiahl akan, sang manaman oh mweimwei ong mwomwohdiso.
4 Oh ma Sounkaloalamwahuo pahn kin kahluweiuk en koasoi de padahn ni ansou sohte lipilipil, de ansou koaros ong mwomwohdiso sang ni ei mahsen, ke pahn kak wia.
5 Ahpw ke sohte pahn ntingihdi sang ni ei mahsen, ahpw sang ni eripit;
6 Oh ke sohte pahn ruwese ih me wia ahmw kaun, oh kaun en mwomwohdiso;
7 Pwe I ketikihongehr ih kih kan en me rir kan, oh kaudiahl akan me katengetengdi, lao I pahn idiada emen en weliandi ih.
8 Eri met, kilang, I ndahionguhk me ke pahn kohla rehn Mehn Leimen kan oh kalohngkihongirail ei rongamwahu; oh nin duwen arail pahn kin alehda ei padahk kan ke pahn kauada ei mwomwohdiso rehrail; oh ke pahn alehdi kaudiahl akan, ahpw ke sohte pahn ntingihdi en wia kosonned.
9 Eri met, kilang, I ndahionguhk me e sohte sansal, oh sohte aramas emen ese wasa me kahnihmw en Saion pahn kokouda, ahpw e pahn sansalada mwuhr. Kilang, I ndahionguhk me e pahn mih ni irepen sahpw en Mehn Leimen kan.
10 Ke sohte pahn mweselsang wasaht lao tiepenehn kapokon wet unsekla; oh nei ladu Sosep ahpw pahn idihda pwe en kaunda kapokon wet sang ni arail usuhs en utuht, oh dahme e pahn ndahionguhk ihme ke pahn nda.
11 Oh pil, ke pahn kahrehda riomw ohl, Hiram Page, kumwahte riemen, oh padahkihong ih me soahng kan me e ntingihdi sang ni takaio sohte kohsang rehi oh me Sehdan ketewehdier ih;
12 Pwe, kilang, soahng pwukat sohte koasondi ong ih, de pil sohte soahng ehu me pahn koasondi ong emen nan mwomwohdiso me pahn uhwong inou kan en mwomwohdiso.
13 Pwe soahng koaros pahn kin wiawi ni koasondi, oh sang ni miniminpenehn pilipil en mwomwohdiso, sang ni kapakap ni pwoson.
14 Oh ke pahn sawas koasonehdi mepwukat koaros, nin duwen inou kan en mwomwohdiso, mwohn ahmw pahn doulahng nan ahmw seiloak kohwei rehn Mehn Leimen kan.
15 Oh e pahn kohieng uhk dahme ke pahn wia sang ansouo me ke pahn kohwei, loa lel ansouo me ke pahn pwurodo.
16 Oh ke pahn anahne kihpeseng ewemwen ansou koaros, kalkalohngki ei rongamwaho sang ni ngihl en pereperen. Ahmen.