Iralaud 2
Ire kan sang nan nein Sosep Smith poadoapoad duwen mahsen kan en tohnleng Moronai ong Soukohp Sosep Smith, ahnsou me Soukohpo mihmi nimwen eh pahpa nan Manchester, New York, ni soutik en Septempe 21, 1823. Moronai me wia lahs en soupoad me wiahda poadpoado me ansou wet wia Pwuhk en Mormon mwohn sampah. (Karasahiong Malakai 4:5–6; pil iralaud kan 27:9; 110:13–16; oh 128:18.)
1, Elaisa me pahn kasalehda prihsduhd; 2–3, Inou kan en sahmoko en padokedi nan mohngiong en seri kan.
1 Kilang, I pahn kasalehiong kumwail Prihsduhdo, sang ni limen soukohp Elaisa, mwohn sapwellimen Kauno rahn lapalap oh kamasepwehko eh pahn leledo.
2 Oh e pahn ketin padokedi nan mohngiong en nahi kan inou kan me e ketin inoukihong sahmoko, oh nahi kan ahpw pahn tamanda semarailoko.
3 Pwe ma soh, sampah pwon udahn pahn kamwomwala ni e pahn ketido.