Iralaud 55
Soukohp Sosep Smith alehdi kaudiahl ong William W. Phelps, nan Kirtland, Ohio, Suhn 14, 1831. William W. Phelps, soun prinder, oh ah peneinei me ahpwtehn lelledohng nan Kirtland, oh Soukohp song rapahki rehn Kauno me pid duwen ih.
1–3, William W. Phleps malipilipda oh pilipilda en pepdaisla, kasarawiheng elder, oh en kalohngki rongamwahuo; 4, E pil wia soun intingiada pwuhk kan ong seri kan nan skuhl kan en Mwomwohdiso; 5–6, E pahn seilokla Misori, wasa me e pahn wia ah pwukoah doadoahk kan.
1 Kilang, Kauno me ketin mahsaniong uhk, nei ladu William, ei, iei Kaun en sampah pwon, ke malipilipdahr oh pilipildahr; oh mwurin ahmw pepdaiskilahr pihl, me ma ke kilikilangete kalingenpei, ke pahn ale lapwepen dipomw kan oh alahldi en Ngehn Sarawi sang ni pwilikihdi en peh kan;
2 Oh mwuhr ke ahpw pahn kasarawiala sang ni limen nei ladu Sosep Smith, Jun., pwe ken wiahla elder en mwomwohdiso wet, pwe en kalohngki koluhla oh lapwepen dihp akan sang ni pepdaisla ni mwaren Sises Krais, Ieros en Koht ieias.
3 Oh sohte lipilipil me ke pahn pwilikihdi pehmw kan powe, ma irail kin peihkiong ie, ke pahn ahniki manaman en kiheng Ngehn Sarawi.
4 Oh pil, ke pahn kasarawiala pwe ken sewese nei ladu Oliver Cowdery en wia doadoahk en pirinding, oh iang soun pilada oh intingiada pwuhk kan ong skuhl kan en mwomwohdiso wet, pwe seri tikitik kan en pil kak alehdi kaweid kan mwohi nin duwen me I kupwuriki.
5 Oh pil, mehlel I ndahiong uhk, pwehki sang ni kahrepe wet me ke pahn iangih nei ladu kan Sosep Smith, Jun., oh Sidney Rigdon, pwe ken kak soandiheng nan sahpwen ahmw sohso oh wia doadoahk wet.
6 Oh pil, mweidohng nei ladu Joseph Coe en pil iang irail seilok. Dahme luweh pahn ahpw sansalada mwurin met, iei ni mehlel me I pahn wia. Ahmen.