Iralaud 46
Soukohp Sosep Smith alehdi kaudiahl ong Mwomwohdiso, nan Kirtland, Ohio, Mahs 8, 1831. Pwehki Mwomwohdiso ahpwtehn tepida, wiepen koasondi en kaweid sarawi kan en Mwomwohdiso saikinte soandi mwahu. Ahpw, tiahk en mweidolong toweh kan te oh me mehlelki arail raparapahki me mehlelo en iang tuhpenehn kamadipw sarawih kan oh ekei kapokon kan en Mwomwohdiso iei me kin wiwiawi. Kaudiahl wet kasalehda kupwuren Kauno ong ni apwahpwalih oh kaukaweid mihting kan oh Sapwellime kaweid ong raparapahki oh kak en kasawiada kisakis kan en Ngehno.
1–2, Elder kan pahn kin kaweid mihting kan sang ni kaweidpen Ngehn Sarawi; 3–6, Irail kan me kin inengieng rapahki me mehlelo sohte pahn kin irairdihsang en towehda tuhpenehn kamadipw sarawih kan; 7–12, Peki rehn Koht oh rapahki kisakis kan en Ngehno; 13–26, Irekdien ekei kisakis pwukat mih nan ire tikitik pwukat; 27–33, Kaun akan en Mwomwohdiso ahniki manaman en ese kisakis kan en Ngehno.
1 Rong mwahu, kumwail aramas akan en ei mwomwohdiso; pwe mehlel I ndahiong kumwail me mepwukat koaros me kumwail rongehr ong kamwahupamwail oh kamarainpamwail.
2 Ahpw mendahte dahme ntingdier, irail elder kan en ei mwomwohdiso kin alialehte sangete ni tapio, oh irail pahn alialehte kohkohlahte, pwe en wia mehn kaweid mihting kan koaros sang ni Ngehn Sarawi ah pahn kahluwairail oh kaweid irail.
3 Ahpw I ndahiong kumwail me kumwail sohte pahn soikala aramas emen sang nan amwail tuhpenehn mihting kan, me kin wiwiawi mwohn sampah.
4 I pil ndahiong kumwail me kumwail sohte pahn soikala sang nan amwail mihting en kamadipw sarawi kan aramas emen me wia kisehn mwomwohdiso; ahpw, ma mie me kawehla kosonned, a kumwail dehr mweidohng ih en tungoale lao eh kapwungala dihpeh kan.
5 Oh I pahn pwurehng ndahiong kumwail, kumwail sohte pahn soikala aramas emen me kin mehleliong raparapahki wein Koht sang nan amwail mihting en kamadipw sarawi kan—I koasoia mepwukat ong irail kan me sohte wia towe en mwomwohdiso.
6 Oh I pahn pwurehng ndahiong kumwail, ong me pid duwen amwail tuhpene kan wasa me kasarawi pahn wiawi ie, me ma mie emen me sohte wia towe en mwomwohdiso, me wie mehleliong raparapahki wehin Koht, kumwail dehr kausirailla.
7 Ahpw I ndahiong kumwailehr me kumwail pahn peki soahng koaros rehn Koht, me kin kupwur sapan en kihwei; oh me Ngehno ketin kadehdehiong kumwailehr oh pil ni ansouohte I kupwuriki kumwail en wia mehkoaros ni mongiong mwakelekel, weweidiki mour pwung mwohi, medemedewe imwin amwail komour, wia mehkoaros ni kapakap oh kaping kalahngan, pwe kumwail dehr lohdiong pahn ngehn likamw akan, de padahk en tepil kan, de kosonned akan en aramas; pwe ekei sang rehn aramas, oh ekei sang tepil kan.
8 Eri, kumwail kanaiehng pwe kumwail dehr lohdiong nan likamw; oh pwe kumwail en dehr lohdiong nan likamw, rapahkihte kisakis keieu kesempwal akan, oh tamataman ansou koaros dahme kahrehda kumwail kin alehkihdi kisakis pwukat;
9 Pwe ni mehlel I ndahiong kumwail, me irail alehdi ong kamwaupen irailko me kin poakoahng ie oh kapwaiada ei kosonned akan, oh ong ih me kin nantihong rapahki; pwe koaros en kak wia mehn kamwauperail ong me kin rapahki de me kin peki rehi, me kin peki oh sohte wiahki kilel ehu me irail pahn doadoahngkiongete arail noahrek kan.
10 Oh pil, mehlel I ndahiong kumwail, I men kumwail en tamataman ansou koaros, oh ansou koaros kidihong nan amwail madamadau kan uwen kesempwal en kisakis pwuko, me e ketin ketikihongehr mwomwohdiso.
11 Pwe e sohte ketkihong aramas koaros kisakis koaros; pwe mie kisakis tohto, oh ong emen emen aramas kin alehdi kisakis ehu sang Ngehn en Koht.
12 Ong ekei ale ehu, oh ong ekei ale ehu soahng, pwe koaros en kak insenemwahuki.
13 Ong ekei e kohieng irail sang ni Ngehn Sarawi pwe irail en kak ese me Sises Krais iei Ieros en Koht, oh me e ketin lohpwuhla pwehki dihp akan en sampah.
14 Ong mehtei kan e kohieng irail en kak kamehlele arail mahsen akan, pwe irail en pil kak ahneki mour soutuk ma irail pahn loaloapwoatieng arail pwoson.
15 Oh pil, ong ekei e kohieng irail sang ni Ngehn Sarawi pwe en ese wekpeseng en pwukoah doadoahk kan, nin duwen me pahn kin mwahu ong Kauntehmeno, duwen me Kauno ketin kupwuriki, me pahrekieng sapwellime kupwurkalahngan kan nin duwen momour en tiahk en aramas akan.
16 Oh pil, Ngehn Sarawi ketikihong ekei en ese soangsoangen koahiek en doadoahk kan, ma irail sang rehn Koht, pwe emenemen kin ale eh pwais sang rehn Ngehno pwe en koadoahkihong ni kamwaupen aramas koaros.
17 Oh pil, mehlel I ndahiong kumwail, ong ekei irail ale, sang ni Ngehn en Koht, mahsen en eripit.
18 Ong emen e ale mahsen en dehdehki, pwe koaros en kak kaskuhlda en loalokong oh ahneki wehwe mwahu.
19 Oh pil, ong ekei irail ale en kak ahneki pwoson en maiaudahsang nan soumwau;
20 Oh ong mehtei kan en kak ahneki pwoson en kamwauihala.
21 Oh pil, ong ekei en kak wia doadoahk manaman kopwuriamwei kan;
22 Oh ong mehtei kan en kak ahneki manaman en kokohp;
23 Oh ong mehtei kan en kak ese kasawihada wekpeseng en ngehn kan.
24 Oh pil, ong ekei en kak ahneki koahiek en lokaiahki soangsoangen lokaiah kan.
25 Oh ong emen en kak ahneki koahiek en kaweweh soangsoangen mahsen akan.
26 Oh kisakis pwukat koaros kohsang rehn Koht, ong kamwahupen Sapwellimen Koht seri kan.
27 Oh ong pisop en mwomwohdiso, oh ong irail kan me Koht pahn ketin pilada oh kasarawiala pwe en apwalih mwomwohdiso oh wia elder kan en mwomwohdiso, iei me e pahn ketkihong irail pwe irail en kak ese ia wekpeseng en kisakis kan koaros pwe e dehr mie nanpwungamwail me koaskoasoi ni ah sohte ale mweimwei sang rehn Koht.
28 Oh ahnsouo pahn kohdo me aramas emen me peki ni Ngehno pahn pil ale ni Ngehno;
29 Pwe ong ekei e pahn kak kohieng irail kisakis koaros, pwe en kak mie me mongehda, pwe toweh kan koaros en kak insenamwahuki.
30 Mehmen me kin peki ni Ngehno kin peki nin duwen kupwuren Koht; eri e pahn pweida nin duwen e pekio.
31 Oh pil, I ndahiong kumwail, soahng koaros udahn anahne en wiawi ni mwaren Krais, sohte lipilipil dahme kumwail wia ni Ngehno;
32 Oh kumwail anahne kapingkihong Koht ni Ngehno ong sohte lipilipil kapai kan me kumwail kapaikihda.
33 Oh kumwail anahne kaiahnehkin kumwail mwakelekel oh mour sarawi mwohi kohkohlahte. Ihme pahn wiawi. Ahmen.