Iralaud 12
Kaudiahl kohieng soukohp Sosep Smith ong Sosep Knight Sr., nan Harmony, Pennsylvania, Mei 1829. Sosep Knight kamehlele kalohk kan en Sosep Smith duwen eh kolokol pileit kan en Pwuhk en Mormon oh doadoahk en kawehwehd me wiwiawi ansouo oh ekei pak kihong dipwisou en sawas kan ong Sosep Smith oh nah soun intingo, me sowesehkinira uhsehla kaukaweweh. Sang ehn Sosep Knight pekipek, Soukohpo kalelapak rehn Kauno oh alehdi kaudiahlo.
1–6, Tohn doadoahk kan en nan mwahto pahn komourla; 7–9, Koaros me inangih oh warohng kak sawas nan sapwellimen Kauno doadoahk.
1 Doadoahk kesempwal oh kapwuriamwei ehu pahn kohdo rehn aramas akan.
2 Kilang, Ngehi Koht; kumwail rong ei mahsen, me momour oh manaman, e keng sang kedlahs me au riau, e kin lelohng loalen aramas wasa me keieu rir, wasa me koakon oh sal tuhpene ie; eri rong mwahu ei mahsen kan.
3 Kilang, mwahto lellehr ansou en rahk; eri, mehmen me inangih iang sapak, mweidehng en ale kehlail nah kama, oh iang sapak ni rahn eh maramarainte, pwe en kak kihpenehng palinge komour poatoapoat nan wehin Koht.
4 Ei, mehmen me pahn ale kehlail nah kama oh sapak, e malipilipdahr sang Koht.
5 Eri, ma ke pahn peki rehi ke pahn alehdi; ma ke pahn letelet e pahn ritidahnguhk.
6 Met, nin duwen ahmw peki, kilang, I ndahionguhk, kapwaiada ei kosonned akan, oh rapahki ken kak sowese wiahda oh koasonehdi doadoahk en Saion;
7 Kilang, I koasoionguhk, oh pil koaros me inangih iang sowese kapwurehdo oh koasoanehdi doadoahk wet;
8 Oh sohte me kak iang wia doadoahk wet ihte ma e pahn karakarahk oh diren limpoak, ahneki pwoson, koapwoaroapwoar, oh limpoak unsek, sohte dukieng ineng mwahl nan mehkoaros, sohte lipilipil me pahn kohieng ih apwalih sang ni likilik.
9 Kilang, ngehi me marain oh komour en sampah, me mahsanih mahsen pwukat, eri rong mwahu sang ni ahmw kak, oh ke ahpw pahn malipilip. Ahmen.