Iralaud 6
Kaudiahl kohieng Soukohp Sosep Smith oh Oliver Cowdery, nan Harmony, Pennsylvania, Epreil, 1829. Oliver Cowdery tepikihda pwukoahn soun nting nan kawehwehdahn Pwuhk en Mormon, Epreil 7, 1829. E alehdier kadehdeh sarawi en mehlelpen ehn Soukohpo kadehdeh duwen pileit kan me Pwuhk en Mormon ntingdi loale. Soukohpo kalelapak rehn Kauno sang ni wiepen Urim oh Dummum oh alehdi pasapengpe.
1–6, Tohn doadoahk en nan sapwellimen Kauno mwetuwelo komourla; 7–13, Sohte kisakis lapalapsang kisakis en komourla; 14–27, Kadehdehpen mehlelo kin kohsang ni manaman en Ngehno; 28–37, Kilenglahng Krais, oh wiwia mwahu ansou koaros.
1 Doadoahk lap oh kesempwal ehu pahn kohdo rehn aramas akan.
2 Kilang, ngehi Koht; kumwail rong mwahu ei mahsen, me mwadang oh manaman, keng sang kedlahs me imwi riau, me pahn lelohng nan pwungen koakoan oh kurupwin tih; eri kumwail rong mwahu ei mahsen kan.
3 Kilang, mwetuwelo mahier oh onopadahngehr ansou en rahk; eri, mehmen me inangih dolung, mweidehng en idangehng kehlail nah kamaho, oh dolung ni rahno eh maramarainte, pwe en kak nekidala ong palingene komour poatoapoat nan wehin Koht.
4 Ei, mehmen me pahn idangehng nah kamahoa oh dolung, Koht ketin malipehier ih.
5 Eri, ma kumwail pahn peki rehi kumwail pahn alehdi; ma kumwail pahn letelet e pahn ritidahng kumwail.
6 Eri, nin duwen amwail peki, kilang, I ndahiong kumwail, kapwaiada ei kosonned akan, oh rapahki en sowese kapwurehdo oh wiahda doadoahk en Saion.
7 Dehr rapahki dipwisou kan ahpw rapahki eripit, oh kilang, sapwellimen Koht rir kan pahn kasansalohng kumwail, eri kumwail ahpw pahn kepwepwehla. Kilang, mehmen me ahneki mour soutuk e kepwehpweh.
8 Mehlel, mehlel, I ndahiong kumwail, nin duwen amwail inangih sang rehi e pahn pil pweida ong kumwail; oh ma ke inangih, ke pahn wiahda doadoahk mwahu kei ong dih wet.
9 Dehr inda mehkot likin koluhla ong dih wet; kapwaiada ei kosonned akan, oh sowese ei doadoahk en pweida, nin duwen ei kosonned akan, oh kumwail pahn kapaida.
10 Kilang mie ahmw kisakis, oh meid pai kowe pwehki ahmw kisakis en. Tamataman me e sarawi oh e kohsang powe—
11 Oh ma ke pahn rapahki, ke pahn ese me rir kan me kesempwal oh kapwuriamwei; eri, ke pahn doadoahngki ahmw kisakisen, pwe ken kak diarada me rir kan, pwe ken kak wahdo aramas tohto ong marainkihda mehlelo, ei, kasalehiong irail en esehda arail ahl sapwung kan.
12 Dehr kasalehiong amwail kisakis kan mehtei kan ihte ong irail akan me pwoson. Dehr mwamwahliki soahng kan me sarawi.
13 Ma ke pahn wia me mwahu, ei, oh kolokol loaloapwoat lao lel ni imwio, ke pahn komourla nan wehin Koht, me iei kisakis keieu ileile nan sapwellimen Koht kisakis kan; pwe sohte kisakis me laud sang kisakis en komourla.
14 Mehlel, mehlel, I ndahionguhk, meid pahi kowe pwehki dahme ke wiadahr; pwe ke kalelapak rehi, oh kilang, ni omw pahn kin kalapw kalelapak rehi ke pahn kin alehdi kaweid en ei Ngehno. Ma met sohte wiawi, ke sohte pahn kohdo wasaht me ansou wet ke mihmi ie.
15 Kilang, ke ese me ke kalelapak rehi oh ngehi kamarainiada ahmw madamadau; oh I kasalehionguhk mepwukat pwe ken kak ese me ke marainkihda sang ni Ngehn en mehlelo;
16 Ei, I ndahionguhk, pwe ken kak ese me sohte emen ihte Koht me ketin mwahngih ahmw madamadau kan oh ineng en nan mohngiongumw.
17 I ndahionguhk mepwukat pwe en wia mehn kadehdeh ong kowe—me mahsen kan oh doadoahk me ke wie ntintingih e mehlel.
18 Eri kin pwersek; loaloapwoationg utungada nei sounpapah Sosep nan irair apwal sohte lipilipil me e pahn lel pwehki mahseno.
19 Kaweid ih nan eh sapwung kan, oh pil alehda kaweid sang reh. Kin kanangamah; kin popohl, kin liksang me suwed kan; ahneki kanangamah, pwoson, koapwoaroapwoar oh limpoak unsek.
20 Kilang, kowe me Oliver, oh I koasoionguhk pwehki ahmw ineng kan; eri kihpene mahsen pwukat nan omw mohngiong. Kin loaloapwoat oh pwersekiong kapwaiada sapwellimen Koht kosonned akan, oh I pahn pwoalehkinuhkedi ei limpoak.
21 Kilang, ngehi iei Sises Krais, Sapwellimen Koht Iehroso. Ihte ngehi me kohdo rehn pein nei aramas, oh nei aramas sohte aleiehda. Ngehi me maraino me kamarainiada wasa rotorot, oh wasa rotoroto sohte kak powehdi.
22 Mehlel, mehlel, I ndahionguhk, ma ke inangih ekei kadehde, tamataman pwohngo me ke eker ie nan mohngiongumw, pwe ken kak ese duwen mehlel en mepwukat.
23 I sou ketikihong popohl nan ahmw madamadau duwen ire wet? Dah, mie kadehdeh lap ke kak ale likin me sang rehn Koht?
24 Eri, kilang, ke alehdier ehu kadehdeh; pwe ma I pahn ndahionguhk soahng kan me sohte aramas ese met sou wehwehki me ke alehdi kadehdeh?
25 Oh, kilang, I kihonguhk ehu kisakis, ma ke inangih sang rehi, en kawehweh, duwehte nei sounpapah Sosep.
26 Mehlel, mehlel, I ndahionguhk, me mie poadoapoad kei me audaudiki ei rongamwahu, me ekiekla pwehki wiewia suwed en aramas akan;
27 Oh met I mahsanihonguhk, ma ke ahneki ineng mwahu—ineng en kihpene ahmw pai en nanleng—eri ke pahn sawaski ahmw kisakis en ong ni wahdo nan marain pali teikan en nei pwuhk sarawi kan me ekiekla pwehki wiewia suwed kan.
28 Eri, kilang, I kihonguhk, oh pil ong nei sounpapah Sosep, kih kan en kisakis wet, me pahn wahdohng nan marain doadoahk wet; oh sang ni ewen soun kadehdeh riemen de silimen mahsen koaros pahn pweida.
29 Mehlel, mehlel, I ndahionguhk, ma irail pahn soikala ei mahsen, oh pali en ei rongamwahu oh doadoahk wet, meid pahi kowe, pwe irail sohte kak wiahionguhk mehkot duwehte ong ie.
30 Oh ma irail pahn wiahionguhk dahme irail wiahiong ie, meid pahi kowe, pwe ke pahn iang ie mih nan lingan.
31 Ahpw ma irail sohte pahn soikala ei mahsen kan, me pahn wiawihda sang kadehdeh kan me pahn wiawi, meid pahi irail, oh eri ke pahn pereniki wahn ahmw doadoahk kan.
32 Mehlel, mehlel, I ndahionguhk, nin duwen ei ndahiong nei tohnpadahk kan, wasa me aramas riemen de silimen kohpene ie ni mwarei, nin duwen koasondi ehu, kilang, I pahn mih rehrail wasao—duwehte ei mih rehmwa.
33 Dehr masak wia me mwahu, samwa, pwe soahng koaros me ke pahn padokedi, ke pahn pil dolung; eri, ma ke pahn padokedi me mwahu ke pahn pil dolung me mwahu ong isepemw.
34 Eri, dehr masak, kumwail kisin pwihn tikitik; kumwail wia mwahu; mweidehng sampah oh ehl en patpene uhwonguhk, pwe ma ke pahn kokouda pohn ei paip, irail sohte pahn kak pweida.
35 Kilang, I sohte keseiukala; kohkohwei oh dehr pwurehng wiahda dihp; wia doadoahk wet me I mahsanihonguhk ken wia ni popohl.
36 Kilengdohng ie nan madamadau koaros; dehr peikasal, dehr masak.
37 Kilang ohlah kan me kawehla pengpengeie, oh pil lipwen meteh kan nan pehi kan oh nehi kat; kin loaloapwoat, kapwaiada ei kosonned akan, oh ke pahn sohsohki wehin nanleng Ahmen.