Iralaud 45
Soukohp Sosep Smith alehdi kaudiahl ong Mwomwohdiso, nan Kirtland, Ohio, Mahs 7, 1831. Iren kahpese mwotomwot en rekohd en kaudiahl wet, nan poadoapoad en Sosep Smith kasalehda me “sounpar me Mwomwohdiso mihmi loale met … tohtoh repwoht likamw akan … oh koasoiepe sohte mwahu kan, me intingda … oh kohkohseli, … pwe en dehr mweidohng aramas akan en rapahki pwungen doadoahk, de pereniki palien lamalamo. … Ahpw ong popohl en Souleng kan, … I alehdi mepwukat.”
1–5, Krais me wia sounsawasapatail rehn Samatailo; 6–10, Rongamwahuo me wia meninkeder ong ni kaunopada ahl mwohn Kauno; 11–15, Kauno ketin alehda Inok oh rie ohl akan ong Pein Ih; 16–23, Krais ketin kasalehda kilel kan en Sapwellime ketido me sansal pohn Nahnahn Olip; 24–38, Rongamwahuo pahn kopwurupwurdo, ahnsou kan ong Mehn Liki kan pahn imwisekla, oh soumwahu me kin kemehla aramas pahn kipehdi sahpwo; 39–47, Kilel kan, kemwekid kopwuriamwei kan, oh Iasadahu pahn iang patehng Ketido Keriau; 48–53, Krais pahn ketin kesihnen pohn Nahnahn Olip, oh mehn Suhs kan pahn kilang lipwen ohlah kan pohn Limeh kan oh aluweluweh kan; 54–59, Kauno pahn ketin kaunda nan erein Mileniem; 60–62, Soukohpo ahpw alehdi kaweid en tepida kaweweh Kadehde Kapw, sang ni ire kesempwal kan me pahn sansalada; 63–75, Ruwes ong Souleng kan en pokonpene oh kawada Serusalem Kapw, me aramas akan koaros pohn sampah pahn kohdo ie.
1 Rong mwahu, kumwail aramas en ei mwomwohdiso, ong kumwail kan me alehdier wehio; kumwail rong mwahu oh kaido salengemwail kan reh me ketin wiadahr poahsoan en sampah, me ketin kapikada nanleng kan oh audepeh kan koaros, oh me kapikada soahng koaros me kin momour, oh me kin mwekmwekidseli, oh ahneki mour.
2 Oh I pil pwurehng kapwurehieng, rong mwahu ai mahsen, pwe mehla en dehr lelehng kumwail; nan awa me kumwail sohte medewe me ahnsoun karakar imwiseklahr, oh ahnsou en dolung wahnsahpw nekier, oh kumwail sohte komourla.
3 Rong ih me wia sawasapatail rehn Samatailo, me kin pekipeki sawasapamwail reh—
4 Mahmahsanih: Maing Sahm, kilang lokolok kan oh mehla en ih me sohte wiahda dihp, me komw kin ketin kupwurperenikio; kilang ntahn sapwellimwomwi Ieros me keredier, ntahn ih me komw ketkihengehr pwe pein mwaromwi en kak linganla.
5 Eri, Maing Sahm, komw dehr kaloke rie souleng pwukat me kamehlele mwareiet, pwe irail en kak kohdo rei oh iang ahniki mour soutik.
6 Rong mwahu, kumwail aramas en ei mwomwohdiso, oh kumwail elder kan en kin rongorongopene, oh rong ngileiet ni ei pahn eker kumwail rahnwet, oh dehr kakeluwakiala amwail mongiong kan;
7 Pwe mehlel I ndahiong kumwail me Ngehi me Alpa oh Omeika, me wia tapi oh imwi, marain oh mour en sampah—marain ehu me kin kamarainiada wasa rotorot oh wasa rotoroto sohte kak powehdi.
8 I patohkihdo pein nei aramas akan, oh nei aramas akan sohte aleiehda; ahpw ong koaros me aleiehda I kihong irail manaman en wia soahng kopwuriamwei tohto, oh irail en wiahla seri en Koht; oh pil ong irail kan me kamehlele mwareiet me I patohwanehng irail manaman en kak ale mour soutik.
9 Oh pil ni ansouohte I patohwan kadareweiehr ai inou sarawi soutik pohn sampah, pwe en wia mehn kamarainpen sampah, oh en wia kilel ehu ong nei aramas akan, oh pwe Mehn Liki kan en kak rapahki, oh en wia meninkeder mwohn meseiet pwehn kaunopada ahlo mwohi.
10 Eri, kumwail kohdo, oh ong ih me pahn pwaredo I pahn koasoiong ih nin duwen aramas en kawahko, oh I pahn kasalehiong ih uwen kehlail en ai koasoi.
11 Eri, kumwail rongorongpene mwahu oh kumwail mweidehngie en kasalehieng kumwail eripit me ih tungoaleniki—sapwellime eripit me kumwail kin koasoiahki me iei Koht en Inok, oh rie souleng kan,
12 Me katohrohr sang sampah, oh Ngehi me pein aleirailda—kahnihmw ehu me kaunopadahr lao rahn me pwung pahn lelledo—rahn ehu me aramas sarawi kan koaros kin rapahkin ie, oh irail sohte diarada pwehki mour suwed oh tiahk suwed kan;
13 Oh kadehdehda ni sansal duwen arail wia mehn liki oh mehn keiru nin sampah;
14 Ahpw alehdi inou ehu me irail udahn pahn diar oh kilangki meserail ni paliwararail.
15 Eri, rong mwahu oh I ahpw pahn koasoiong kumwail, oh I pahn ndahiong kumwail oh kohpada, duwehte ong aramas akan en kawao.
16 Oh I pahn kasalehda ni sansal duwehte ei kasalehiong nei tohnpadahko ni ei kesihnen mwohrail ni paliwar, oh ndahiong irail, koaskoasoia: Ni amwail pekiher rehi duwen saihn kan en rahn me pwurodo, ni rahno me I pahn pwarekihdo ei lingan nan depwek kan en nanleng, pwe ien kapwaiada inou kan me I wiadahr ong amwail pahpahko,
17 Pwehki kumwail kilangehr uwen reirei en ahnsou me palingenimwail kan ah tohrohrsang paliwaramwail kan eh wia kahpwal ehu, I pahn kasalehiong kumwail ia mwomwen rahn en poadoandoaralao ah pahn lelledo, oh pil kopwurupwurdohn kamwermwerpeseng en Israel.
18 Oh met kumwail kilang tehnpas sarawi wet me mihmi nan Serusalem, me kumwail kin kadahniki tehnpas en Koht, oh amwail imwintihtih kan kin nda me tehnpas wet sohte pahn kak ohla.
19 Ahpw, mehlel I ndahiong kumwail, me apwal laud pahn lellohng aramas akan en dih wet rasehng lipirap emen me kin pwaredo nipwong, oh aramas pwukat pahn kamwomwala oh kamwermwerpeseng nan wehi kan.
20 Oh tehnpas sarawi wet me kumwail kilangehr met pahn pokidihsang me sohtehte ehu sokasok en takai pahn luwehdi.
21 Oh ansouo pahn kohdo, me aramas en Suhs kan en dih wet sohte pahn mehla lao kamwomwala koaros me I kosoiahiong kumwailehr me pid duwen irail pahn wiawi mahs.
22 Kumwail koasoia me kumwail ese me imwin sampah kerendohr; kumwail pil koasoia me kumwail ese me nanleng oh sampah pahn sohrala;
23 Oh iei met me kumwail koasoiahki ni mehlel, pwe iei me pahn wiawi; ahpw mepwukat me I mahsaniong kumwailehr pahn sohte imwsekla lao mengihtikpen soahng koaros pahn pweida.
24 Oh met I mahsaniong kumwailehr duwen Serusalem; oh ni ansou me rahno pahn lelledo, irail me luwehdi kan pahn kamwermwerpeseng nan wehi kan koaros.
25 Ahpw irail pahn pwurehng kopwurupwurpene; ahpw irail pahn wie mihmihte lao ahnsou en Mehn Liki kan pahn imwisekla.
26 Oh ni rahno e pahn mie ngilen mahwin kan oh rongen mahwin kan, oh sampah pwon pahn mihla pahn moromor, oh mongiong en aramas akan pahn sohla kakehng, oh irail pahn koasoia me Krais ketin kapwandelahr sapwellime ketido lao lel ni imwin sampah.
27 Oh limpoak en aramas pahn tikitikla, oh me suwed pahn kipehdi wasa.
28 Oh ni ansou me ahnsou en Mehn Liki kan lellodo, marain ehu pahn pwalang pohrail me kin mihmi nan rotorot, oh iei me pahn wia unsek en ei rongamwahu;
29 Ahpw irail sohte alehda; pwe irail pohnsehsehla maraino, oh irail kasohpeisang ie arail mongiong kan pwehki padahk en aramas akan.
30 Oh nan diho me ahnsou en Mehn Liki kan pahn imwisekla.
31 Oh e pahn miehte aramas akan me pahn keskesinenkihte diho, me sohte pahn mehla lao irail pahn kilang kalokolok kan; oh soumwahu me pahn kemehla aramas akan me pahn kipehdi sahpwo.
32 Ahpw nei tohnpadahk kan pahn keskesinente wasa sarawih kan, oh sohte pahn mwekidsang ie; ahpw nan pwungen me suwed akan, aramas akan pahn aklapalapkihda ngilerail kan oh keria Koht oh mehla.
33 Oh e pahn mie rerrer en sahpw akan pil ni wasa sohte lipilipil kan, oh kamwomwala tohtoh; ahpw aramas akan pahn kakeluwakihla arail mongiong kan oh uhwong ie, oh irail pahn ale neirail dipwisou en mahwin, peipene nan pwungarail, oh irail pahn kemehla emen emen irail.
34 Oh met, ni ansou me Ngehi Kauno koasoiahier mepwukat ong nei tohnpadahk kan, irail ahpw salohda.
35 Oh I ndahiong irail: Kaleke kumwail salohda, pwe, ni ansou me mepwukat pahn wiawi, kumwail pahn ese me inou kan me wiawidahr ong kumwail pahn pweidahr.
36 Oh ni ansou me maraino pahn pwalangada wasa, e pahn ieiang irail duwehte karasaras ehu me I pahn kasalehiong kumwail—
37 Kumwail kilengla oh kilang tuhke pik kan, oh kumwail kilangki pein mesemwail kan, oh kumwail nda ni ansou me irail pahn tepida osada, oh teh kan tepidar mwuterek, eri ansou en rahk kerendohr;
38 Pil duwehte ni rahno ni ansou me irail pahn kilang soahng pwukat koaros, irail ahpw pahn ese me awahu kerendohr.
39 Oh ansouo pahn kohdo me irail me kin lemwikinie pahn kasikalahr rahn lap en ketidohn Kauno, pil iangahki kilel kan me pahn kasalehda ketidohn Nein Aramas.
40 Oh irail pahn kilang kilel kan oh kilel kopwuriamwei kan, pwe irail pahn pwarada nanleng oh pahn sampah.
41 Oh irail pahn kilang nta, oh kisiniei, oh ediniei laud.
42 Oh mwohn rahn en Kauno pahn ketido, ketipino pahn rotorotala, oh maramo pahn weitahtahla duwehte nta, oh usu kan pahn pwupwidihdosang nanleng.
43 Oh irail me luwehdi kan ahpw pahn pokonpene wasaht;
44 Oh irail ahpw pahn rapahkinie, oh, kilang, I pahn kohdo; oh irail ahpw pahn kilang ie pohn depwek en pahnlahng kan, kapilikipene manaman oh lingaling lapalahpie; iangahki tohnleng sarawih kan koaros; oh mehmen me sohte pahn mwasamwasahn ie rahno pahn lekidekla.
45 Ahpw mwohn limen Kauno pahn leledo, tohnleng men pahn peuk nah sewio, oh souleng me mehlahr akan ahpw pahn kohdo oh tuhwong ie nan depwek kan.
46 Eri, ma kumwail mehla ni popohl meidpai kumwail; pwe met kumwail kilangiehier oh ese me Ngehi met, kumwail kohdo rehi oh ngenimwail kan pahn komourla, oh komourpamwail ahpw pahn unsekla; oh souleng kan ahpw pahn kohdo sang ni keihmw pahieu en sampah.
47 Eri ih ansouo me limen Kauno pahn lelohng nan wehi kan.
48 Oh Kauno ahpw pahn ketkihdiong eluweluweh kan pohn dohl wet, oh e ahpw pahn pwalpeseng wiada riau, oh sampah pahn itikekda, oh waswasaseli, oh nanleng kan pahn wie rerrer.
49 Oh Kauno pahn kapwulewei sapwellime ngihl, oh wasa koaros pohn sampah pahn karonge; oh wehi kan en sampah pahn pahtoula, oh irail me kouruhrkiher pahn kilang arail pweipwei.
50 Oh kahpwal laud pahn lelohng me kin lahlahweh, oh me kin kamwamwahli pahn isihsla; oh irail me kin tetehkte ansou en wiahda tiahk suwed pahn kolkoldi oh lekideklahng nan kisiniei.
51 Oh mehn Suhs kan ahpw pahn kilengdohng ie oh koasoia: A dahkei ohla pwukat me mih ni limemwih kan oh eluwelimwohmwih kan?
52 Oh irail ahpw pahn ese me Ngehi me Kauno; pwe I pahn ndahiong irail: Ohla pwukat iei ohla kan me I ohkihla nan tehnpas en kempoakepahi kan. Ih ngehi me irail tenekiehdau. Ih ngehi me Sises me kalohpwualahuo. Ih ngehi me Ieros en Koht.
53 Oh irail ahpw pahn mwahiei pwehki arail wiewia suwed kan; oh irail ahpw pahn pahtoula pwehki arail kalokehdi arail nanmwariki.
54 Oh wehi kan me sohte kamehlele Koht ahpw pahn komourla, oh irail kan me sohte douluhl ese kosonnedo pahn iang keieun iasadahuo; oh e pahn ekis mengei ong irail.
55 Oh Sehdan pahn selidi, pwe en dehr mie dowe nan mongiong en aramas akan.
56 Oh ni rahno, ni ahnsou me I pahn pwarekihdo ei lingan, karasaraso pahn pweidahr me I mahsaniher me pid duwen meipwon ehko.
57 Ong irail me loalokong kan oh me alehdier me mehlelo, oh me alehier Ngehn Sarawi pwe en wia arail mehn kaweid, oh saikinte me pitihdi—mehlel I ndahiong kumwail, irail sohte pahn kolkoldi oh lekideklahng nan kisiniei, ahpw pahn powehdi rahno.
58 Oh sampah pahn kohieng irail pwe en wia wasahn kouson; oh irail pahn kaparaparala oh kehlailla, oh neirail serih kan pahn laudla sohte diperail ong komourperail.
59 Pwe Kauno pahn ketiket nanpwungarail, oh sapwellime lingan pahn ketiket pohrail, oh e pahn wia arail nanmwariki oh arail soun koukosonned.
60 Oh met, kilang, I ndahiong uhk, e sohte pahn sansalohng uhk en ese dahme pahn wiawi nan oaralap wet, lao Kadehde Kapw pahn kawewehdi, oh loalle mepwukat koaros ahpw pahn kasansalada;
61 Eri I kihong uhk pwe ke en kak kawewehdier met, pwe ke en kak kaunopadahng soahng kan me pahn kohdo.
62 Pwe mehlel I ndahiong kumwail, me soahng kaselel kan wie awiawih kumwail;
63 Kumwail rong mahwin kan en nan sahpwen liki kan; ahpw, kilang, I ndahiong kumwail, irail kerendohr, karaniher amwail wenihmw kan, oh e sohte pahn lel pahr kei ah kumwail pahn rong me mahwin kan wihwiawiher nan pein sapwamwail.
64 Eri Ngehi, Kauno, mahsaniher, me kumwail en kohdosang ni palimese en sahpw kan, kumwail kapokoneikumwailpene kumwail elder kan en ei mwomwohdiso; kumwail kowei ni palikapi en wehi kan, lukweriong tohn wehi kan en koluhla, oh ni arail pahn koluhla, kawada ihmw sarawi kan ong ie.
65 Oh ni mongiong ehu oh ni lamalam ehu, kihpene amwail pahi kan pwe kumwail en kak pwaihnkihda sahpwen sohso me pahn kohieng kumwail mwurin ansou kis.
66 Oh e pahn kahdaniki Serusalem Kapw, sapwen meleilei, me pahn wia kahnihmw en rukula, wasahn perehre ong souleng kan en Koht Wasa Lapalap.
67 Oh lingan en Kauno pahn ketiket wasahuo, oh kelemw en Kauno pahn pil ketiket wasahuo, iei me kahrehda aramas suwed kan sohte pahn kohdo wasahuo, oh e pahn kahdaniki Saion.
68 Oh ansou pahn lelledo nan pwungen me suwed kan, me emen emen aramas me sohte pahn pwokada nah mehn pei ong mehn mpe pahn anahne tangala Saion pwehn kak mourla.
69 Oh aramas kan koaros nan wehi kan koaros me mih pahn lahng pahn pokonpene wasahu; oh e pahn ihte irail aramas akan me pahn sohte mahwinpene nan pwungarail.
70 Oh aramas suwed akan ahpw pahn ndapene nan pwungarail: Kitail dehr kohdahla mahwinieng Saion, pwe irail tohn mehn Saion kan udahn kamasepwehk; eri kitail sohte pahn kakehng irail.
71 Oh ahnsou pahn lelledo me irail me mwahu kan pahn pokonpene sang nan pwungen wehi kan koaros, oh pahn kohdo Saion, oh kokoulki koul en popohl soutuk kan.
72 Oh met I ndahiong kumwail, en koledi mepwukat pwe e dehr kohpeseng pohn sampah lao e konehng ong ie, pwe kumwail en kak kaunsekihla doadoahk wet mwohn mesen aramas akan, oh mwohn mesen amwail imwintihtih kan, pwe irail en dehr ese amwail doadoahk kan lao kumwail kaunsekihla dahme I kupwuriki kumwail en wia;
73 Pwe ahnsou irail en kak esehda, pwe irail en kak medewe mepwukat.
74 Pwe ni ahnsou me Kauno pahn ketido e pahn ketin kamasak irailda, pwe irail en masepwehkada, oh irail pahn kesihnen dohsang oh wie rerrer.
75 Oh wehi kan koaros pahn masepwehkada pwehki kelemw en Kauno, oh uwen sapwellime manaman kehlail. Ihme me pahn wiawi. Ahmen.