Iralaud 54
Soukohp Sosep Smith alehdi kaudiahl ong Newel Knight, nan Kirtland, Ohio, Suhn 10, 1831. Toweh kan en Mwomwohdiso me patopato nan Thompson, Ohio, sohte pwungpene mwahu mie nan pwungarail ong me pid duwen tohnmetei en epwelpen sahpw akan. Lehk oh noahrek ahpw sansalada. Mwurin ah misin ong pwihn en Shakers (kilang koasoiepe me sansal nan iralaud 49), Leman Copley kawehla ah inou en tonhmeteikihla ah lapalahn mwaht ong Souleng kan me seilokedohsang Colesville, New York. Pwehki dahme wiawi, Newel Knight (me wia kaun en irail toweh kan me koukouson nan Thompson) oh ekei elder ahpw pwarek Soukohpo pwehn ale kaweid ong dahme pahn wiawi. Soukohpo ahpw keinemwe rehn Kauno oh ahpw alehdi kaudiahl wet, me iei en ruwese toweh kan me mihmi nan Thompson en mweselsang nan mwaht en Leman Copley oh seiloklahng Misori.
1–6, Souleng kan anahne en peikiong inou kan en rongamwahuo pwe mahk en mie; 7–10, Irail anahne ahniki kanengamah ni ansou en lokolok.
1 Kilang, Kauno me ketin mahsanih, iei Alpa oh Omeika, tapi oh imwi, iei ih me ketin kalohpwualahr pwehki dipen sampah—
2 Kilang, mehlel, mehlel, I indahiong uhk, nei ladu Newel Knight, ke pahn anahne koltengedi nan pwukoah me I kapwukoahkin uhk.
3 Oh ma riomw souleng kan inangih en tangasang arail imwintihtih kan, mweidohng irail en koluhkihla diperail kan koaros, oh irail en mehleliki arail pahn aktikitikla mwohi oh peik.
4 Oh inou me irail wiahiong ie e olahr, oh e solahr doadoahk oh solahr mie katepe.
5 Oh meid suwediong ih me kahrehda met a wiawi, pwe ihte me pahn mwahu ong ih en kakihrdilahng nan kapin madau.
6 Ahpw meidpai irail kan me kolokol inouo oh kapwaiada kosonnedo, pwe irail pahn ale mahk.
7 Eri, kowei met oh tangasang sahpwen, pwe amwail imwintihtih kan de kolkumwaildi; oh tapiada amwail seilok, oh pilada ihs me pahn wia amwail sounkaweid, oh soun apwalih mwohni ong kumwail.
8 Oh met kumwail pahn tapiadahr amwail seilok kowei ni palikapi en sahpw akan, kowehng nan sahpw en Misori, ni keilen ahl akan en Mehn Leimen kan.
9 Oh mwurin amwail pahn kaimwsekala amwail seilok, kilang, I ndahiong kumwail, en pein rapahki amwail mour nin duwen aramas emen ah kin momour, lao I pahn kaunopada amwail wasa.
10 Oh pil, ahniki kanengamah ni ansou en lokolok lao I pwurodo; oh, kilang, I pahn mwadang lelledo, oh ai pwais mihmi rehi, oh irail kan me rapahkin ie mwadahng pahn diar kommoalpen ngenirail kan. Iei ni mehlel. Ahmen.