Iralaud 53
Soukohp Sosep Smith alehdi kaudiahl ong Algernon Sidney Gilbert, nan Kirtland, Ohio, Suhn 8, 1831. Sang ni pekipek en Sidney Gilbert, Soukohpo kalelapak rehn Kauno ong pid duwen en Brother Gilbert doadoahk oh koasondi en pwukoah nan Mwomwohdiso.
1–3, Malipilip oh pilipildahn pwukoah me kohieng Sidney Gilbert nan Mwomwohdiso iei e kasarawihong en wiahla emen elder; 4–7, E pil wia nein pisop sounweliepe.
1 Kilang, I indahionguhk, nei ladu Sidney Gilbert, me I karongehier ahmw kapakap kan; oh ke peki rehi en sansalehng uhk, Kauno ahmw Koht, me pid duwen malipilip oh pilipildahn pwukoah me kohieng uhk nan mwomwohdiso, me Ngehi, Kauno, wiadahr ni imwin rahn pwukat.
2 Kilang, Ngehi, Kauno, me kalohpwualahr pwehki dipen sampah, ketkihong uhk kosonned ehu me ken pwilikihdi mouren sampah.
3 Alehda ai pwukoah me I kiheng uhk, iei pwukoahn elder, ken kalohngki pwoson oh koluhla oh lapwepen dihp akan, nin duwen ai mahsen, oh alahldi en Ngehn Sarawi sang ni pwilikihdi en peh kan;
4 Oh pil ni ansouohte ken wia emen weliepe nan mwomwohdiso wasa me pisop pahn idiada ken pwukoah ie, nin duwen kosonned akan me pahn sansalada mwurin met.
5 Oh pil, mehlel I indahiong uhk, me ke pahn iangih nei ladu kan Sosep Smith, Jun., oh Sidney Rigdon seilok.
6 Kilang, ih mepwukat me wia keieu en pwukoah sarawi me ke pahn ale; oh luweh kan ahpw pahn sansalada ni ansou kohkohdoh kan, nin duwen uwen pwoson en ahmw doadoahk nan ai mwaht.
7 Oh pil, I men ken ese me ke anahne wewehki me ihte me emen pahn pitikihla ma e pahn dadaurete lel imwi. Iei ni mehlel. Ahmen.