Irelaud 76
Kairoir ehu me kohieng Soukohp Sosep Smith oh Sidney Rigdon nan Hiram, Ohio, Pepueri 16, 1832. Pwe en kapehse rekohd en kairoir wet, nan poadoapoad en Sosep Smith koasoia: “Mwurin ai pwurodohsang kapokon nan Amherst, I peusehla kaweweh iren Pwuhk Sarawi kan. Sang ni soangsoangen kaudiahl kan me alahldier, e sansal me ire tohto kesempwal kei me pid duwen komourpen aramas salongasangehr nan Paipelo, de ireh kan pwupwula mwohn ah rikirikpene. E peihn sansal sang dahme mehlel kan me luwehdi, me ma Koht pahn kisekise koaros nin duwen wiewiah kan me wiawi nan mour wet lepin mahsen ‘Nanleng,’ iei ong en Souleng kan wasahn kouson poatoapoat, anahne iangahki wehi kan me tohtohsang ehu. Me pid duwen met, … ni ansou me kaukauwehwe Rongamwahu en St. Sohn, ngehi oh Elder Rigdon ahpw kilangada kairoiro.” Ni ansou me kairoir wet kohieng ira, Soukohpo wie kaukauwehwe Sohn 5:29.
1–4, Kauno iei Koht; 5–10, Ire rir kan en wehio pahn kasansalohng koaros me loaloapwoat; 11–17, Koaros pahn iang iasadao me wihwia mwahu de wihwia suwed; 18–24, Toweh kan en sampah tohtoh kan wia pwutak oh serepein kesempwal kei ong Koht sang Tomwpen Sises Krais; 25–29, Tohnleng en Koht men ahpw pwupwidier oh wialahr tepel; 30–49, Nein soun kamwomwalao pahn lokolok nan mour lekidekla kohkohlahte; luweh kan koaros ahniki ekei dakehn komourla; 50–70, Lingan oh kisakis en kesepwilidahn aramas kan nan wehin selestel kawewehdier; 71–80, Irailko me pahn sohsohki wehin derestel kawewehdier; 81–113, Duwen iren irailko me mih nan wehin delestel, derestel, oh selestel e kawewehdier; 114–119, Me loaloapwoat kak kilang oh wewehki me rir kan en wehin Koht sang ni manaman en Ngehn Sarawi.
1 Rong, kumwail tohn nanleng kan, oh rong mwahu, sampah, oh kumwail toweh kan en perenda, pwe Kauno me Koht, oh ma sohte ih e sohte pahn mie Sounkomour.
2 Sapwellime eripit me poatoapoat, sapwellime doadoahk kopwuriamwei kan, oh soahng koaros me e ketin wiahier me sohte me kak diar.
3 Sapwellime kahrepeh kan kin pweida ansou koaros, oh sohte me kak pelianda kupwure.
4 Sang ni mwohn kawa oh pil kohkohlahte e ketin duweduwehte, oh sapwellimar ieias sohte pahn imwisekla.
5 Pwe Kauno ketin mahsaniher—Ngehi, Kauno, me kin kalahngan oh limpoak ong irailko me kin lemwikinie, oh kupwuriki en wauneki irailko me kin papah ie ni pwung oh ni mehlel lao lel ni imwi.
6 Ketingparail me lap oh arail wehi me poatoapoat.
7 Oh ong irail I pahn kasalehda me rir kan koaros, ei, me rir kan koaros me ekiekla nan ei wehi sang nan mwehin kawao, oh ong dih koaros me pahn kohdo, me I pahn kasalehiong irail ei kupwurkalahngan me pid duwen soahng koaros duwen ei wehio.
8 Ei, duwen kilel kopwuriamwei kan en mour soutik me irail pahn esehda, oh soahng kan me pahn kohdo me I pahn kasalehiong irail, iei duwen soahng kan me pahn wiawi nan dih tohtoh kan me pahn kohdo mwuhr.
9 Oh arail eripit me pahn lap, oh arail maraihniki pahn lel nanleng; oh mwohn arail eripit en me loalokong pahn sohrala, oh marain en me koahiek kan pahn sohte katepe.
10 Pwe sang ni Ngenei me I kamarainihkin irail, oh sang ni ei manaman me I pahn wiahda en sansalohng irail me rir kan me I kin kupwuriki—ei, iei soahng kan me aramas saikinte kilang, de pil rong, de pil medewehda.
11 Kiht, Sosep Smith, Jun., oh Sidney Rigdon, ni aht direkihla Ngehno ni ke-eisek weneu en Pepueri, ni pahr en atail Kaun kid welipwiki silihsek riau—
12 Sang ni manaman en Ngehno mesat kat ahpw pehdpeseng oh aht madamadau kan ahpw marainda, pwe sen kak kilang oh wewehki soahng kan me pid duwen Koht—
13 Me duwehte soahng kau me sang ni tapio mwohn sampah ah miehda, me wiawihda sang Sahmo, sang ni sawasepen sapwellime Iehrosohte, me kin ketiket ni palimaun en Sahmo, sangete ni tapio;
14 Oh se kadehdehki ih; oh rekohd me se kadehdehki iei unsek en rongamwahu en Sises Krais, me wia Sapwellimehu, me se kilangada oh se koasoieng nin duwen kairoir ehu sang nanleng.
15 Pwe ahnsou me se wihwiahki doadoahk en kaweweh, me Kauno ketin malipehieng kiht, se lel ni iretikitik riesek duwau en irelaud limau en Sohn, me kohieng kiht nin duwe met—
16 Koaskoasoia duwen iasadahn me mehlahr akan, me pid duwen irail kan me pahn kak rong kepitien Nein-Aramas:
17 Oh ahnsou ehu pahn kohdo; irail kan me wiahda mwahu, pahn iang iasadahn me mwahu kan; oh irail kan me wiahda suwed, pahn iang iasadahn me suwed kan.
18 Met e kahrehiong kiht aht pwuriamaweiki, pwehki e kohieng kiht sang ni Ngehno.
19 Oh ni ahnsou me se wie medemedewe mepwukat, Kauno ahpw ketin kamarainiada aht madamadau oh sahpw kilangada wasa, oh lingan en Kauno ahpw kapilkitpene.
20 Oh se kilang lingan en Sapwellimeu, ni palimaun en Sahmo, oh alehda ih ni unsek;
21 Oh kilangada tohnleng sarawi kan, oh irail kan me kasarawialahr mwohn sapwellime mwoahl, pwongpwongih Koht, oh Sihmpwulo, me kin pwongih ih kohkohlahte oh ereihn.
22 Oh met, mwurin tohtohn kadehdeh kan me wiawihongehr ih, iei kadehdehu met, me wiawi mwurin koaros, me se kihong duwen ih: Me e ketin ieias!
23 Pwe se kilang ih, ni eh ketiket ni palimaun en Koht; oh se rong kepitie kadkadehdehki me iei ih me wia Ieros en Sahmo—
24 Me sang ih, oh sang reh, oh pwehki ih, me sampah kan miehki oh kepikipikdahr, oh irail toweh kan en wasahuo iei sapwellimen Koht pwutak kan oh serepein kan.
25 Oh met se pil kilang, oh kadehdehki, me tohnleng en Koht men me ahniki pwukoah mwohn Koht, me uhwong Sapwellime Ieroso me Sahmo ketin poakoahng oh me kin ketiket ni palimaun en Sahmo, ahpw lekidekdilahr sang pahn kupwur en Koht oh Sapwellimeu,
26 Oh ahpw kadanikihla Kamwomwala, oh tohn nanleng kan ahpw pahtoula pwehki ih—iei ih me Luhsiper, usuhn rahn lingan.
27 Oh se kilang, oh kilang mwahu, me e pwupwidilahr! iei pwupwidilahr, me wia usuhn rahn lingan!
28 Oh ahnsou Ngehno wie mihmihte reht, Kauno ahpw mahsanihong kiht me se anahne ntingihdi kairoiro; pwe se kilang Sehdan, serpent en kawaho, me pil wia tepilo, me uhwong Koht, oh song en kihsang wehi en atail Koht oh sapwellime Krais—
29 Eri, e wiahda mahwin rehn souleng kan en Koht, oh angkehlailki ah kapilirailpene.
30 Oh se kilang kairoir ehu duwen lokolok kan en irailko me e mahwiniong oh poweiraildi, eri kepitien Kauno ahpw kodohng kiht mahsanih:
31 Kauno me mahsaniher duwen koaros me ese sapwellime manaman, oh me alehdier sapwellimen Kauno manamano, oh mweidohngehr pein irail sang ni manaman en tepilo en kak poweiraildi, oh kamahmkihla me mehlelo oh sohte peikiong ei manaman—
32 Iei irail me wia nein soun kamwomwalau, duwen irailko me I mahsanih me e pahn mwahu ong irail ma irail sohte ipwidi;
33 Pwe irail wia pekid en engieng en Koht, walahng en lokolongki engieng en Koht, rehn tepilo oh nah tohnleng kan kohkohlahte;
34 Me pid duwen irailko me I mahsaniher sohte pahn mie mahkpe nin sampah de nan sampah me pahn kohdo—
35 Pwehki irail kahmahmkihla Ngehn Sarawio mwurin arail alehdio, oh pwehki irail kamahmkihla Iehros en Sahmo, pwehki irail kalohpwuala ih ong pein irail oh kanamenekiala ih.
36 Iei irail pwukat me pahn kolahng nan lehn kisiniei oh suwepwel, rehn tepilo oh nah tohnleng kan—
37 Oh irailte me mehla keriau pahn ahniki manaman pohrail;
38 Ei, mehlel, irailte me sohte pahn lapwada ni ahnsou me Kauno ketin koasonehdi, mwurin lokolok kan en sapwellime engieng.
39 Pwe luwe koaros pahn wesikdo sang ni iasadahn me mehlahr akan, sang ni sewi oh lingan en Sihmpwulo, me kamakamalahro, me kin ketiket ni palimaun en Sahmo mwohn sampah kan ah wiawihda.
40 Oh iei rongamwahuo met, rohng kaperen kan, me ngihl me kohsang nanleng kan kadehdehiong kiht—
41 Me e ketido pohn sampah, iei Sises, pwe en kalohpwukihla sampah, oh ketkihsang dihp akan en sampah, oh kasarawiala sampah, oh kamwakelehsang mour en wiewia suwed kan koaros.
42 Me sang ih koaros pahn komourla me Sahmo ketkihongehr sampwellime manaman oh wiawihda sang ih;
43 Me kin kapikapinga Sahmo, oh doarehla doadoahk koaros en nin limeu, ihte irail serih kan en kamwomwalau me kamahmkihla Sapwellimeu mwurin Sahmo ah ketin kasalehiong irail ih.
44 Eri, e ketin doarehla koaros ihte irail—irail pahn kolahng nan kalokolok poatoapoat, me iei kalokolok ehu me sohte imwi, me iei kalokolok soutuk, oh iang kakaun rehn tepil oh nah tohnleng kan kohkohlahte, me mwasarail kan sohte pahn mehla, oh kisinieio sohte kak kunla, me iei arail lokolok—
45 Oh ni imwio, de wasa, de arail lokolok, sohte aramas emen ese;
46 De e kasansaldahr, de sansalehr, de e pahn kasansalohng aramas, ihte ong irail kan me sansalehr me irail miher nan lokolok soutuk wet.
47 Ahpw, Ngehi, Kauno, kasalehiong me tohto sang ni kairoir, ahpw mwadangete pilehu kawuhdi;
48 Eri, ni imwio, uwen tehlap, uwen ile, uwen loal, oh uwen kapahtou en wasahuo, irail sohte wewehki, de pil sohte lipilipil aramas emen ihte irailko me idihdahr ong kalokolok wet.
49 Oh se rong ngihlo, ketihtihki: Ntingihdi kairoiro, pwe kilang, iei met me kaimwseklahn kairoir en lokolok kan en aramas suwed kan.
50 Oh se pil kadehdehki—pwe se kilang oh rong, oh iei met me wia kadehdehpen rongamwahu en Krais duwen irail me pahn kohdo ni iasadahn me mwahu kan—
51 Iei irail me alehda kadehde en Sises, oh kamehlele mware oh pepdaisla mwurin wiepen sapwellime seridio, koduhdihla nan pihl ni mware, oh met iei nin duwen kosonned me e ketkihda—
52 Me sang ni kapwaiada kosonned akan irail pahn kak en kamwakelda oh mwakelekelda sang diparail kan koaros, oh alehdi Ngehn Sarawi sang ni pwilikihdi en peh kan en ih me idihdahr oh katengtengdiengehr manaman wet;
53 Oh me powehdi sang ni pwoson, oh katengtengdier sang ni Ngehn Sarawi en inouo, me Sahmo ketin kakerehdieng pohn irail koaros me mwahu oh mehlel.
54 Iei irail me wia mwomwodihso en Mesenih.
55 Iei irail me Sahmo ketkihong soahng koaros nan pehrail kan—
56 Iei irail me wia samworo kan oh nanmwariki kan, me aledahr ih ni unsek, oh sapwellime lingan;
57 Oh wia samworo kan en Wasa Lapalapie, nin duwen koasondi en Melkesidek, nin duwen koasondi en Inok, nin duwen koasondi en Sapwellimeo.
58 Eri, nin duwen eh ntingdier, irail wia koht kei, iei sapwellimen Koht pwutak kan—
59 Eri, soahng koaros arail, mour de mehla, de soahng kan en ahnsou wet, de soahng kan me pahn kohdo, koaros arail oh irail sapwellimen Krais, oh Krais sapwellimen Koht.
60 Oh irail pahn powehdi soahng koaros.
61 Eri, dehr mweidohng aramas en kelinganahda emen aramas, ahpw mweidohng en kelinganahda Koht, me pahn kalowehdi imwintihtih kan koaros pahn aluweluweh kan.
62 Irail pwukat pahn iang mih mwohn silangin Koht oh Krais sapwellimeu kokohlahte.
63 Iei irail pwukat me e pahn ketin wahda, ni ansou me e pahn ketdahla nan depwek kan en nanleng pwe en kaunda sampah ong sapwellime aramas akan.
64 Iei irail pwukat me pahn iang tepin iasadao.
65 Iei irail pwukat me pahn kohdo ni iasadahn me mwahu kan.
66 Iei irail pwukat me kohdo pohn Nahna Saion, oh ni kanihmw en Koht ieias, wasa ehu me duwehte nanleng, me keieu sarawi sang koaros.
67 Iei irail pwukat me pwarekidohr pwihn en tohnleng ngedehrie, ong tiepene lap oh mwomwohdiso en Inok, oh tepin Mesenih.
68 Iei irail pwukat me ederail kan ntingdier nanleng, wasa me Koht oh Krais wia sounkopwung en koaros.
69 Iei irail pwukat me wia aramas mwahu unsek pwehki sang Sises sounsawas en inou sarawi kapwo, me wiahda tomw unsek wet sang ni kakerehdi en pein sapwellime nta.
70 Iei irail pwukat me paliwererail kan duwehte selestiel, me lingan duwehte ketipin, iei lingan en Koht, me keieu lapalap sang koaros, me sapwellime lingan iei ketipin en nanleng me ntingdier en wia kilelepen sapwellime lingan.
71 Oh pil, se kilangehr sampah derestriel, oh kilang oh kilang mwahu, iei irail pwukat me wia tohn derestriel, me arail lingan weksang mwomwodihso en Mesenih me alehdier unsek en Sahmo, iei me duwehte maram me weksang ketipin en nanleng.
72 Kilang, iei irail pwukat me mehla sohte iang ese kosonnedo;
73 Oh pil irail me ahniki ngehn kan en aramas me sensel, me Sapwellimeo kin pwarek irail, oh kalohngkiheng irail rongamwahuo, pwe irail en kak ale kadeikparail nin duwen aramas akan ni paliwar;
74 Me sohte iang alehdi kadehdeh en Sises ni paliwar, ahpw mwuhr e ahpw alehdi.
75 Iei irail pwukat me wia aramas wahu kei pohn sampah, me maskunkihla widing en aramas akan.
76 Iei irail pwukat me alehda sapwellime lingan, ahpw kaidehn ih ni unsek.
77 Iei irail pwukat me alehda sihlangin Sapwellimeo, ahpw kaidehn unsek en Sahmo.
78 Eri, irail wia paliwar kan en derestriel, oh kaidehn paliwar kan en selestiel, oh arail lingan wekpeseng duwehte maramo eh weksang ketipino.
79 Iei irail pwukat me sohte kin eimahki arail kadehdeh duwen Sises; eri, irail sohte iang ale kamwaramwar nan wehin samatail Koht.
80 Oh met iei keimwseklahn kairoir me se kilangada ong derestriel, me Kauno ketin ruwesehkin kiht en ntingihdi isaniki Ngehno eh wie ketikete reht.
81 Oh pil, se kilangada lingan en delestiel, me linganpe me tikitik, iei me duwehte lingan en usuh kan me weksang lingan en maram nanleng.
82 Iei irail pwukat me sohte alehda rongamwahu en Krais, de pil kadehdeh duwen Sises.
83 Iei irail pwukat me kahmahmkihla Ngehn Sarawio.
84 Iei irail pwukat me lekdekdihla nan ehl.
85 Iei irail pwukat me sohte pahn poadoandoarasang tepilo lao lel ni kaimwiseklahn iasadao, lao Kauno, iei Krais Sihmwpwulo, pahn ketin kaimwisekala sapwellime doadoahk.
86 Iei irail pwukat me sohte alehda ih ni unsek nan mour poatoapoato, ahpw sang ni Ngehn Sarawi en pwukoahn papah en nan derestriel;
87 Oh ong derestriel sang ni pwukoahn papah en nan selestiel.
88 Oh pil ong delestiel irail alehdi sang soun papah en tohnleng kan me idihda en papah irail, de me idihda pwe en wia soun papah ngehn kei ong irail; pwe irail pahn wia soun weliepen komour.
89 Oh se kilangada, nan kairoir en nanleng, lingan en delestiel, me inenen deisang en aramas arail wewehki;
90 Oh sohte aramas emen ese ihte ih me Koht ketin kasalehiong.
91 Oh se pil kilangada lingan en derestriel me laudsang soahng koaros en lingan en delestiel, iei ni lingan, oh ni manaman, oh ni roson, oh ni kakaun.
92 Oh se pil kilangada lingan en selestiel, me laudsang soahng koaros—wasa Koht, iei Sahmo, kin kakaun nan mwoale kohkohlahte;
93 Mwohn me sapwellimaniki mwoahlo soahng koaros poaridi ni karakarahk oh wahu, oh kihong ih lingan kohkohlahte.
94 Irail me iang mih mwohn sihlangih iei irail me wia mwomwodihso en Mesenih; oh irail kilang duwehte Koht ah kilang irail, oh ese duwehte Koht ah ese irail, pwehki arail alehda ih ni unsek oh sapwellime kalahngan;
95 Oh e wiahda irail en ahniki manaman pahrek, oh ni roson, on ni kakaun.
96 Oh lingan en selestiel ehute, iei duwehte lingan en ketipin ehute.
97 Oh lingan en derestriel ehute, iei duwehte lingan en maram ehute.
98 Oh lingan en delestiel ehute, iei duwehte lingan en usuh kan ehute; pwe ehu usu weksang ehu lingan en usu, iei e pil weksang emen sang lingan en mehteio nan sampah delestiel;
99 Pwe iei irail pwukat me iengen Pohl, oh iengen Apolos, oh iengen Cepas.
100 Iei irail pwukat me nda me irail ekei iengen emen oh ekei iengen mehteio—ekei iengen Krais oh ekei iengen Sohn, oh ekei iengen Moses, oh ekei iengen Elaias, oh ekei iengen Esaias, oh ekei iengen Aiseia, oh ekei iengen Inok;
101 Ahpw sohte alehda rongamwahuo, de pil kadehdeh duwen Sises, de soukohp kan, de inou sarawi poatoapoato.
102 Oh keimwsekla, iei irail pwukat koaros me sohte pahn iang pokonpene rehn souleng kan, en iang patehng mwomwodihso en Mesenih, oh pwekipwekdahla nan depwek kan.
103 Iei irail pwukat me mwahuki wiahda likamw, oh sounwunahni kan, oh sounkamwahl kan, oh mouren nenek kan, oh mehmen me kin pereniki oh wiahda likamw.
104 Iei irail pwukat me lokolongki engieng en Koht pohn sampah.
105 Iei irail pwukat me lokolongki kalokepen kisiniei soutuk.
106 Iei irail pwukat me lekidekdilahng nan ehl oh lokolongki engieng en Koht Lapalap, lao lel ni unsek en ahnsou kan, ni ansou me Krais pahn kalowehdi imwintihti kan koaros pahn aluweluweh kan, oh pahn kaunsekehla sapwellime doadoahk;
107 Ni ansou me e pahn ketkihdahla wehio, oh ketkihong Sahmo, ni sohte samin ie, mahmasanih: I powehdier oh I tiakpesengehr mehn kamwute waino, iei mehn kamwute waino me kasalehda kamasepwehk en engieng en Koht Lapalapo.
108 Eri e ahpw pahn kamwaramwarikihdi mwaramwar en sapwellime lingan, pwe en ketdieng nan mwoahl en sapwellime manaman en kaunda kohkohlahte.
109 Ahpw kilang, oh kilang mwahu, se kilangada lingan oh tohn kouson kan en sampah delestiel, me irail inenen ngeder duwehte usuh kan en pahnlahng en nanleng, de ngeder en pihk kan pohn oaroahr kan;
110 Oh rongada kepitien Kauno mahmasanih: Irail pwukat koaros pahn kelipwikihdi, oh loh koaros pahn kadehdehiong ih me ketiket pohn mwoahlo kohkohlahte;
111 Pwe irail pahn ale kadeik nin duwen arail doadoahk kan, oh aramas koaros pahn ale nin duwen pein ah doadoahk kan, pein ah kin kakaun, nan tehnpas akan me kaunopadahr;
112 Oh irail pahn wia ladu kan en me Wasa Lapalahpie; ahpw wasa me Koht oh Krais kin ketiket ie irail sohte pahn kak kohla ie, sampah kan me sohte imwi.
113 Iei met me kaimwsekala kairoir me se kilangada, me Kauno mahsanihong kiht sen ntingihdi isaniki Ngehno ketiket loalet.
114 Ahpw sapwellimen Kauno doadoahk kan me lapalap oh kopwuriamwei, oh me rir kan en sapwellime wehi me e ketin kasalehiong kiht, me dauliala en aramas arail wewehki duwen lingan, oh duwen roson, oh duwen kakaun;
115 Me e mahsanihong kiht sen dehr ntingihdi ni ansou me Ngehno wie ketiket loalet, oh aramas emen sohte ahniki mweimwei en koasoia;
116 Oh aramas emen sohte pahn kak en kasalehda, pwe ihte me irail pahn kak kilangkihda oh wewehki iei sang ni manaman en Ngehn Sarawi, me Koht ketkihong irail kan me poakoahng ih, oh irail me mwakelekel mwohi.
117 Ong ih e ketkihong kapai wet en kak pein kilikilang oh wie wewehki;
118 Pwe sang ni manaman oh kasansal en Ngehno, ni arail mih ni paliwar, irail pahn kak en powehdi mwohn sihlangih nan sampah lingalingo.
119 Oh ong Koht oh Sihmwpwulo en ahniki lingan, oh wahu, oh kakaun kohkohlahte. Ahmen.