Iralaud 48
Soukohp Sosep Smith alehdi kaudiahl, nan Kirtland, Ohio, Mahs 10, 1831. Soukohpo kalelapak rehn Kauno ong ia mwomwen ah pahn kak alehdi sahpw akan pwe Souleng kan en kak soandi loale. Met e wia kemwekid kesempwal ehu pwehki toweh kan en Mwomwohdiso arail seiseilok sang palimese en Amerika, oh peikiong sapwellimen Kauno koasondi me irail pahn kapokonpene nan Ohio (tehk iralaud kan 37:1–3; 45:64).
1–3, Souleng kan nan Ohio pahn ehukieng sapwarail kan rehn rierail kan; 4–6, Souleng kan pahn pwainda sahpw akan, kawada kahnihmw, oh idawehn kaweid kan en arail kaun akan.
1 E udahn kesempwal kumwail en mihmihdihte nan amwail wasahn kouson akan nan ansou wet, pwe ihme pahn mwahu ong amwail irair kan.
2 Oh erein ah mie sapwamwail kan, kumwail pahn ehukiheng sapwemwail kan rehn rierail kan en palimese.
3 Oh erein ah sohte sapwemwail, mweidehng irail en pwainda sahpw akan me kapilpene wasahu, nin duwen me pahn mwahu ong irail, pwe e udahn kesempwal en mie arail wasa me irail kak kouson ie ong ansou wet.
4 E udahn kesempwal me kumwail en nekidala mwahu mwohni koaros me kumwail kak, oh me kumwail alehdi koaros ni amwail pahn wihwia mwahu, pwe ni ansou me e pahn lelledo kumwail en kak pwainda sapwarail sohso, iei kahnihmwo.
5 Wasahu saikinte sansalada; ahpw mwurin riamwail souleng kan arail kohdosang palimese ekei irail pahn pilipilidahsang nanpwungarail, oh ong irail e pahn kohieng en ese wasahu de ong irail e pahn sansalada.
6 Oh irail me pahn pilipilida pwehn pwainda sahpw akan, oh tapiada kauwada poahson en kahnihmwo; oh kumwail pahn tepida kin pokonpene rehn amwail peneinei kan, koaros nin duwen ehu ehu peneinei, nin duwen ah irair kan, oh ni presedensi oh pisop en mwomwohdiso kihong ih, nin duwen kosonned akan oh mehn kaweid kan me kumwail alehdier, oh me kumwail pahn alehdi mwurin met. Ihme pahn wiawi. Ahmen.