Iralaud 17
Kaudiahl kohieng Soukohp Soses Smith ong Oliver Cowedery, David Whitmer, oh Martin Harris, nan Fayette, New York, Suhn 1829, mwohn arail kilang nting kan me mih nan poadoapoad en Pwuhk en Mormon. Sosep oh nah soun ntingo, Oliver Cowdery, esehla sang nan kawehwehn pileit kan en Pwuhk en Mormon me sounkadehde kesempwal meh silimen pahn pilipilda (tehk Ihder 5:2–4; 2 Nihpai 11:3; 27:12). Oliver Cowdery, David Whitmer, oh Martin Harris kehnda sang ni ineng kamarain ehu en wia sounkadehde kesempwal silimeno. Soukohpo kalelapak rehn Kaun, oh kaudihal wet ahpw wia pasapeng sang nan Urim oh Dummum.
1–4, Sang ni pwoson Sounkadehde Silimeno pahn kilang pileit ko oh ekei dipwisou sarawi kan; 5–9, Krais kadehdehki sarawi en Pwuhk en Mormon.
1 Kilang, I ndahiong kumwail, me ke pahn koapworopworiki ei mahsen, ma kumwail pahn wia sang nan mohngiong unsek, kumwail pahn kilang pileit ko, oh pil mehn perepen nan mwaremwarehu, oh nein Leipen kedlahso, Urim oh Dummum, me kohieng rien Sared ohlo pohn nahnao, ahnsou me e koasoieng Kauno duwehte aramas men eh kin lokaiang kempoakepah, oh dipwisou en kaweid kapwuriamweio me kohieng Lihai ni ahnsou me e mih nan sapwtehno, ni irepen Sehd Weitahtao.
2 Oh e pahn sang ni amwail pwoson me kumwail pahn kak kilangki, iei pwosonohte me soukohp en kawa ko tungoaleniki.
3 Oh mwurin ahmwail pahn alehdi pwoson, oh kilangki mesemwail kan, kumwail pahn kadehdehkin irail, sang ni manaman en Koht;
4 Oh met kumwail pahn wia pwe nei sounpapah Sosep Smith, Jun., en dehr ohkihla, pwe I en kak wahdo ei koasondi pwung kan rehn aramas akan nan doadoahk wet.
5 Oh kumwail pahn kadehdehki me kumwail kilangehr dipwisou ko, duwehte nei sounpapah Sosep Smith, Jun., e kilangehr; pwe iei sang ni ei manaman me e kilangkier, oh pwehki e ahneki pwoson.
6 Oh e kawehwehda pwuhko, iei pali me I mahsanihong en wia, oh nin duwen amwail Kaun oh amwail Koht e ketin ieias met mehlel.
7 Eri, kumwail alehdier manamanohte, oh pwosonohte, oh kisakisohte duhwehte ih;
8 Oh ma kumwail pahn peikiong lahs en ahi kosonned pwukat, me I pahn kihong kumwail, ewen kehl en ehl sohte pahn powehdi kumwail; pwe ei kalahngan itarohng kumwail, oh kumwail udahn pahn pwokpwokdahla ni imwin rahno.
9 Oh ngehi, Sises Krais, amwail Kaun oh amwail Koht, ndahiong kumwail, pwe I en kak wahdo ei koasondi pwung kan rehn aramas akan nan doadoahk wet. Ahmen.