Pali 67
Soukohp Sosep Smith alehdi kaudiahl nan Hiram, Ohio, tepin Nohpempe 1831. Ahnsouo wia rahn en kapokon kesempwal ehu, oh kaudiahl kan me ntingdier alahldier sang Kauno rehn Soukohpo me alahldahr oh wiepe wiawihong (kilang kawehwe me mih nan oaralap en irelaud 1). William W. Phelps apwtehn wiahda en Mwomwohdiso wasahn ntingiada pwuhk nan Independence, Misori. Kapokono koasonehdi en en wiawihda ntingdahn kaudiahl kan nan Pwuhk en Kosonned akan oh en prindihda koapi meh 10,000 (ahpw pwehki soangen kahpwal kei me sohte kasikpe pwarada e katikala meh 3,000 koapi me wiawihda). Me tohto souleng ohl akan me wia kadehde me kaudiahl akan me rikirikpene pwe en wiawihda me inenen mehlel, sang ni kadehdehpen Ngehn Sarawi me tihda pohrail. Poadoapoad en Sosep Smith kasalehda me mwurin kaudiahl me alahldier en wia irelaud 1, ekei koasoiepe me wiawi me pid duwen lokaiah kan me doadoahk nan kaudiahl kan. Kaudiahl me mie ansouo ahpw kohdi mwuri.
1–3, Kauno kin karonge kapakap akan en oh tetehk Sapwellime elder kan; 4–9, E kin song aramas loalokong en pwurehng ntingih Sapwellime kaudiahl tikitik kan; 10–14, Elder kan me loaloapwoat pahn komourla sang ni Ngehno oh kilang sihlangin Koht.
1 Kilang oh rong mwahu, kumwail elder kan en ei mwomwohdiso, me pokonpenehr nan pwungamwail, me amwail kapakap akan I karongehier, oh nan amwail mongiong kan I mwahngiher, oh dahme amwail ineng kan miher mwohi.
2 Kilang oh rong, mesei kat patohwan kilikilang kumwail, oh nanleng kan oh sampah mihmi nan pehi kat, oh ngehi me tungoaleniki pai kan me poatoapoat oh pahn kihwei.
3 Kumwail en nantihong kamehlele me kumwail pahn alehdi kapai me kohieng kumwail; ahpw kilang, mehlel I mahsanihong kumwail me mie per nan amwail mongiong kan, oh mehlel iei met me kahrehda kumwail sohte kak alehkihdi.
4 Oh met Ngehi, Kauno, kihong kumwail kadehdeh en me mehlelo en kosonned pwukat me mihmi mwohmwail.
5 Mesemwail kan kilangehr nei ladu Sosep Smith, Junior, oh ah lokaiah me kumwail esehier, oh ah sohte itar akan me kumwail esehier; oh kumwail kilangehr nan amwail mongiong kan eripit me kumwail kak doadoahngki me pahn mwahusang ah lokaia; met kumwail pil wewehki.
6 Met, kumwail rapahki sang nan Pwuhk en Kosonned akan, iei pil me keieu tikitik me mih nan pwungamwail, oh idiada me keieu maraihn nan pwungamwail;
7 De, ma mie emen nan pwungamwail me pahn wia soahngo me duwehte; eri e mehlel dahme kumwail koasoia me kumwail sohte wewehki me irail mehlel;
8 Ahpw ma kumwail sohte pahn kak wiahda ehu me duwehte, kumwail pahn mihla pahn lokolok en dihp ma kumwail sohte pahn kadehdehki me irail mehlel.
9 Pwe kumwail ese me sohte mehkot sapwung loalle, oh me kin pwung kin kohdo sang powe, sang Sounwiepen maraihn en nanleng kan.
10 Oh pil, mehlel I mahsanihong kumwail me e wia amwail ahnsou mwahu, oh inou ehu me I ketkihong kumwail me idihdahr ong pwukoah sarawi wet, me ni amwail pahn kainapwihsang kumwail luwakahk kan oh per kan, oh aktikitikila mwohi, pwe kumwail sohte nohn ahneki aktikitik, kahdengo pahn teipeseng oh kumwail pahn kilang ie oh ese me I ngehi me—kaidehn sang mour en sampah de madamadau en aramas, ahpw sang ni palingehn.
11 Pwe sohte aramas emen kilangdier Koht ni paliwar ni ahnsou sohte lipilipil kan, ihte koumourla sang ni Ngehn en Koht.
12 Pil sohte aramas en sampah men kak powehdi lingan en Koht, pil me ahneki madamadau en sampah pil sohte kak powehdi.
13 Kumwail sohte pahn kak powehdi lingan en Koht ansou wet, pil duwehte tohn papah en tongleng kan; eri, wenla mwowe ahneki kanengamah lao kumwail unsekla.
14 Dehr mweidohng amwail madamadau kan en pwurala mwuri; oh ni ahnsou me kumwail pahn warohng, nan ahnsou me konehng ong ie, kumwail en kilang oh ese me dahme kohieng kumwail sang ni pehn nei ladu Sosep Smith, Junior. Ahmen.