Iralaud 39
Soukohp Sosep Smith alehdi kaudiahl ong James Covel, nan Fayette, New York, Senuary 5, 1831. James Covel, me wia emen wahnpoaron nan mwomwohdiso en Methodist sounpar pahisek, inoukihong Kauno me e pahn peikiong sohte pahngok koaros me Kauno pahn ketkihong ih sang rehn Soukohp Sosep.
1–4, Souleng kan ahneki manaman en wiahla Sapwellimen Koht; 5–6, En alehda rongamwahuo wehwehki en alehda Krais; 7–14, James Covel pahngokiong en papidaisla oh doadoahk nan Sapwellimen Kauno mwetuwelo; 15–21, Sapwellimen Kauno ladu kan en kalohk ki rongamwahuo mwohn Ketdo Keriau; 22–24, Irail akan me alehda rongamwahuo pahn kopwurupwurpene nan mour wet oh nan mour mwurin mour wet.
1 Kumwail rong mwahu oh rong kepitien ih me ketsang wasa soutuk kohla wasa soutuk, NGEHI IEI me Lapalapo, iei Sises Krais—
2 Marain oh komour pen sampah; maraino me kin kamarainih nan rotorot oh rotoroto sohte kak wehwehki;
3 Ihte ngehio me pil kohdo nan mwehi en werengen ansou rehn pein nei aramas, oh pein nei aramas sohte aleiehda;
4 Ahpw ong aramas koaros me aleiehda, I ketkihong manaman en wiahla nei seri; oh iei pil duwehte I pahn kihong aramas koaros me pahn aleiehda, manaman en wiahla nei seri.
5 Oh mehlel, mehlel, I ndahiong kumwail, mehmen me pahn alehda ei rongamwahu aleiehda; oh mehmen me sohte alehda ei rongamwahu sohte aleiehda.
6 Oh iei met ei rongamwahu—koluhla oh papidaiski pihl, oh e ahpw pahn kohdo papidais en kisiniei oh Ngehn Sarawi, iei Sounkoaloalemwahuo, me kin kasalehda mehkoaros, oh padahngki soahng popohl kan en wehio.
7 Oh met, kilang, I ndahionguhk, nei ladu James, I kilangehr ahmw doadoahk kan oh I eseiuk.
8 Oh mehlel I ndahionguhk, me ansou wet mohngiongumw mwahu mwohi; oh, kilang, I patohwanohngehr pohn moangemwen kapai lap akan;
9 Ahpw, ke kilangehr pahtou lap, pwe ke kasohwe ie pak tohto pwehki pohnmwahso oh anahn akan en sampah.
10 Ahpw, kilang, ahmw rahn en poadoandoarlao lelledohr, ma ke pahn rong mwahu ngileiet, mahmahsanihonguhk: Pwourda oh papidaisla, oh kamwakelehsang dipamwail kan, kapakap ni mwarei, oh ke pahn alehdi Ngehnio, oh kapai me lap ehu me ke sohte ese.
11 Oh ma ke pahn wia met, I kaunopadahr doadoahk kesempwal ehu ong kowe. Ke pahn kalohngki ei rongamwahu unseko, me I kadarewei ni imwin rahn akan, inouo me I kadarewei pwe en kapwurehdo nei aramas akan, me wia peneinei en Israel.
12 Oh ahnsouo pahn kohdo me manaman pahn kohienguhk; ke pahn ahneki pwoson laud, oh I pahn ieianguhk oh tiengwei mwohn mesemwen.
13 Ke malipilipdahr pwe ken doadoahk nan ei mwetwel, oh en kauwada ei mwomwohdiso, oh kaukauwada Saion, pwe en kak pereperen pohn aul akan oh kekeirda.
14 Kilang, mehlel, mehlel, I ndahionguhk, ke sohte malipilipda en kohwei nan wehi kan en palimese, ahpw ke malipilipda en kohwei Ohio.
15 Oh ansou koaros me nei aramas akan pahn kohpene nan Ohio, I wie nekinekid kapai lap me aramas akan saikinte ese duwe, oh e pahn mweredieng pohn mongerail akan. Oh sang wasahu aramas akan pahn kohwei nan wehi kan koaros.
16 Kilang, mehlel, mehlel, I ndahionguhk, me aramas akan nan Ohio wie ekehker ie sang ni pwoson laud, ni ar medemedewe, me I pahn koledi pehi kat ansou en kadeikada wehi kan, ahpw I sohte kak kahmahmki ei mahsen.
17 Eri tepda doadoahk sang ni ahmw kak oh malipe tohn doadoahk loaloapwoat kan ong nan ei mwaht, pwe lahs en ansou en eh pahn kamwakel.
18 Oh ansou koaros me irail pahn koluhla oh alehda ei rongamwahu, oh sarawihla, I pahn koledi pehi kat ni ansou en kadeiko.
19 Eri, kohwei, weriweriki sang ni ngihl laud, ndinda: Wehin Nanleng kerendohr; weriweriki: Kepinga Kauno! meid pai mwaren Koht Wasalapalahpie.
20 Kohwei papidaiski pihl, kaukaunopada ahlo mwohn sihlangi ong ansouo me I pahn ketdo;
21 Pwe ansouo kerendohr; rahno de awahu sohte aramas men ese; ahpw e pahn udahn kohdo.
22 Oh mehmen me pahn alehda mepwukat aleiehda; oh irail pahn kohpene nan ansou wet oh nan mour mwurin mour wet.
23 Oh pil, e ahnsou pahn kohdo me koaros me ke pahn papidaisihki pihl, ke pahn pwilikihdi pehmw kan powe, oh irail pahn alehda kisakis en Ngehn Sarawi, oh pahn kasikasik kilel kan en ei pahn ketdo, oh pahn ese ie.
24 Kilang, I pahn kohdo mwadang. Iei met mehlel. Ahmen.