Iralaud 57
Soukohp Sosep Smith alehdi kaudiahl nan Saion, Jackson County, Misori, Sulai 20, 1831. Pwe en kak idawehn sapwellimen Kauno ruwes en seiloklahng Misori, wasa me E pahn ketin kasalehda “sapwen amwail sohsoh” (iralaud 52), elder kan ahpw seiloksangehr Ohio kolahng palikapi en irepen Misori. Sosep Smith ahpw medemedewe iren Mehn Leimen kan oh medewehla: “Iahd sapwtehno pahn masalpeseng duwehte rohs? Iahd Saion pahn kak kokouda nan sapwellime lingan lapalap, oh ia wasa me Sapwellime tehnpas sarawi pahn kokouda ie, wasa me wehi kan koaros pahn kodohng ni imwin rahn akan?” Mwurin mepwukat me e alehdi kaudiahl wet.
1–3, Nan Independence, Misori, wia wasa ehu ong Kahnihmw en Saion oh tehnpas sarawi; 4–7, Souleng kan en pwainda sahpw akan oh ale sohsoh kan nan wasahuo; 8–16, Sidney Gilbert en kawada ehu sidohwa, William W. Phelps me pahn wia soun prinder, oh Oliver Cowdery me pahn wia soun kapwung doarepweh kan ong wiawidahn pwuhk kan.
1 Rong mwahu, kumwail elder kan en ai mwomwohdiso, Kauno amwail Koht me mahsanih met, kumwail me kapokonepenei kumwailpenehr, nin duwen ai kosonned kan, nan sahpw wet, me wia sapwen Misori, me wia sahpw me I patohwan koasonehdier oh piladahr ong kapokonpenehn souleng kan.
2 Eri, iei met me wia sapwen inou, oh wasa me kahnihmw en Saion pahn mih ie.
3 Oh Kauno amwail Koht ahpw mahsanih, ma kumwail inangih en ahniki eripit met iei kupwurokong. Kilang, wasa me met kahdaniki Independence iei me wia poahsoan en wasahu; oh wasa me tehnpas sarawi mih ie iei ni palikapi en wasahu, ni lepin pwehl ehu me sohte dohsang mwoahlen kopwung.
4 Eri, sang ni eripit me souleng kan anahne pwainda sahpw wet, oh pil lepin sahpw koaros me mihdihla ni palikapi, oh pil ni irepen sahpw me tang nanpwungen mehn Suhs oh Mehn Liki kan.
5 Oh pil lepin sahpw koaros me mih ni irepen sahpw dipwidipw kan, ihme kahrehda nei tohnpadahk kan kak pwaihnki sahpw akan. Kilang, iei eripit met, pwe irail en kak alehda ong arail sohsoh kohkohlahte.
6 Oh mweidohng nei ladu Sidney Gilbert en mihmi nan pwukoah me I idiadahngehr loalle, en kin alehda mwohnih kan, en kin wia sounweliepe nan mwomwohdiso, en kin pwaihn sahpw nan wehi kan koaros me mih wasahu, sang ni ah pahn kin wiawi ni pwung, oh sang kaweid en eripit.
7 Oh mweidohng nei ladu Edward Partridge en mihmi nan pwukoah me I idiadahngehr loalle, oh koasonehdieng souleng kan arail sohsoh kan, duwehte me I ruwesehkiero; oh pil ong irail kan me e piladahr en sewese ih.
8 Oh pil, mehlel I ndahiong kumwail, mweidohng nei ladu Sidney Gilbert en koasonehdi ih wasa kiset, oh wiahda ehu sidohwa, pwe en kak netikihla kopwehn netinet kan ni sohte mih ni mwekid en mworsuwed, pwe en kak alehdi mwohni en pwainda sahpw akan ong kamwaupen souleng kan, oh pwe en kak alehdi sohte lipilipil dahngeh kan me tohnpadahk kan kak doadoahngki en poadokedieng nan arail sohsoh kan.
9 Oh pil mweidohng nei ladu Sidney Gilbert en alehdi laisin—kilang met iei eripit, oh mehmen me wadek mweidehng en wewehki—pwe en kak kadarala kopweh kan rehn aramas akan, emen me e pilada sang nan nah kilerk kan me sewesewese ih;
10 Oh met pwe en apwalihki nei souleng kan, pwe ai rongamwahu en kak kalohkwei rehn irail kan me kin mwomwohd nan rotorot oh mihmi nan sapwen soukoapwoaroapwoar.
11 Oh pil, mehlel I ndahiong kumwail, mweidohng nei ladu William W. Phelps en pil soandieng nan wasa kiset, oh wiahda soun prinder ong mwomwohdiso.
12 Oh kilang, ma sampah pahn alehdi ah nting kan—kilang eripit met—mweidohng ih en alehdi sohte lipilipil mehkot me e kak alehdi ni pwung, ong kamwaupen souleng kan.
13 Oh mweidohng nei ladu Oliver Cowdery en sewese ih, duwehte me I ruwesehkier, ni sohte lipilipil wasa me I pahn idiadahng ih loalle, pwehn koapi, oh kapwung, oh pilada, pwe soahng koaros en kak pwung mwohi, ni e pahn kamehlelda sang ni Ngehno ong ih.
14 Oh met mweidohng irailko me I patohwan mahsaniher en soandieng nan sahpw en Saion, ni ansou karuaru, rehn arail peneinei kan, en wia dahngeh kau me I patohwan mahsaniher.
15 Oh met ong me pid duwen kapokonpenehu—Mweidohng pisop oh weliepehu en kaunopada ong peneieni kau me alehdier poahngok en kodohng nan sahpw wet, ni ansou karuaru, oh koasoneiraildieng nan sapwen arail sohsoh.
16 Oh ong irail elder kan oh toweh kan me luwehdi kaweid en dahme pahn wiawi ahpw pahn kohdo mwuhr. Iei ni mehlel. Ahmen.