Iralaud 38
Kaudiahl kohieng Soukohp Sosep Smith, nan Fayette, New York, Senweri 2, 1831. Ahnsouo iei nan kapokon en Mwomwohdiso.
1–6, Krais kapikada mehkoaros; 7–8, E kin ketin ieiang Sapwellime Souleng kan, me pahn ansou mwadang kilang Ih; 9–12, Aramas koaros dipan mwohn Sihlangih; 13–22, E ketin nekidalahr sahpw en inou ehu ong Sapwellime Souleng kan nan mour wet oh mour soutuk; 23–27, Kosonned kohiengehr souleng kan irail en ehupene oh wiahki emen emen irail pirien; 28–29, Mahwen kokohpda; 30–33, Souleng kan pahn alehdi manaman sang powe oh pahn kohwei nan wehi koaros; 34–42, Kosonned kohieng Mwomwohdiso en apwalih me semwehmwe oh anahn oh rapahki kepwehpweh mour soutuk.
1 Kauno amwail Koht, iei Sises Krais, NGEHI IEI NGEHI me Lapalapo, Alpa oh Omeka, me tapi oh imwi, ihte me ketin irihrong wasa loal kan en mour soutuk, oh tohnleng en nanleng koaruhsie, mwohn sampah eh wiawihda;
2 Ihte me ketin mwahngih mehkoaros, pwe mehkoaros mih mwohn mesei kat;
3 Ihte ngehi me mahsan, oh sampah wiawihda, oh mehkoaros miehda sang ie.
4 Ihte ngehi me alehda kahnihmw Saion en Inok oh pwolepene; oh mehlel, I nda, koaros me pahn kamehlele mwareiet, pwe ngehi iei Krais, oh sang pein mwareiet, sang ni manaman en nting me I kakerehdier, I pekimahngkinirailehr mwohn Sahmo.
5 Ahpw kilang, luhwen me suwed kan I
6 Oh iei met me I pahn wiahiong me suwed en kolkoldihte, irail me sohte kin rong ngileie ahpw kin kakeptakaiala mohngiongarail kan, oh meid suwed, meid suwed, meid suwed, kamwomwparailo.
7 Ahpw kilang, mehlel, mehlel, I ndahiong kumwail me mesei kat patohwan kilikilang kumwail. I wie patpato nanpwungamwail oh kumwail sohte kak kilang ie;
8 Ahpw rahno kereniongehr kohdo me kumwail pahn kilang ie, oh ese me iei ngehi me; pwe kahdeng en karetongo pahn kereniongehr tei, oh irail akan me sohte mwakelekelda sohte pahn momour ni rahno.
9 Eri, kumwail katehngehdi lukopomwail kan oh kaunopada. Kilang, wehio iei amwail, oh imwintihtio sohte pahn powehdi.
10 Mehlel I ndahiong kumwail, kumwail mwakelekel, ahpw kaidehng kumwail koaros; oh sohte emen me I kupwurpereniki;
11 Pwe aramas koaros dipadahr mwohi; oh manaman en rotorot kipehdier sampah, rehn aramas koaros, mwohn karihs en nanleng koaruhsiehn—
12 Me kahrehda kaudiahl uhdi, oh wasa koaros nanleng wie lokolok, oh tohnleng kan awiawih pahngok lapo me irail en mwatih sampah, oh kihpene dihpw suwed kan pwe irail en isikala; oh, kilang, imwintihtio ehupenehr.
13 Oh met I kasalehiong kumwail rir ehu, soahng ehu me kin wie nekinek nan pere rir kan, pwe en kasalehiong kumwail ni mehlel kamwomwpamwail me pahn kohdo mwurin ahnsou kis, oh kumwail sohte ese;
14 Ahpw met I ndahiong kumwail, oh meid pahi kumwail, kaidehng pwehki amwail wiewia suwed kan, de pil amwail mohngiong soupwoson kan; pwe ekei kumwail dipadahr mwohi, ahpw I pahn mahkohng amwail luwed akan.
15 Eri, kumwail kehlail sang met kohla; dehr masak, pwe wehio iei amwail.
16 Oh ong komourpamwail I kihong kumwail kosonned ehu, pwe I rongehr amwail kapakap kan, oh me semwehmwe kan kaulimalahr mwohi, oh me kepwehpwe kan ngehi me wiairailda, oh nei aramas koaros, oh I sohte kin lipilipilki aramas kan.
17 Oh Ngehi me patohwan wiahda sampah en kepwehpwe, oh kilang e wia dewen alualuwei kan, eri, I pahn pwurehng pato powe.
18 Oh I patohwan kapahwei oh inengieng kihong kumwail kapai laud akan, iei sahpw en inou ehu, sahpw ehu me diren milik oh sukehng loangalap;
19 Oh I pahn patohwan kihong kumwail pwe en wia sapwamwail sapwen sohso, ma kumwail rapahki sang nan mohngiongimwail kan ni unsek.
20 Oh met pahn wia ei inou ong kumwail, kumwail pahn ahneki pwe en wia sapwamwail sapwen sohso, oh pwe en wia sapwen sohso ong noumwail serih kan kohkohlahte, erein sampah eh pahn keskesihnen, oh kumwail pahn pwurehng sohsohki mwurin mour wet, sohte kak pwurehng mehla.
21 Ahpw, mehlel I ndahiong kumwail me ansou ehu pahn kohdo kumwail sohla pahn ahneki nanmwariki de kaun; pwe ngehi me pahn wia amwail nanmwariki oh tetehk kumwail.
22 Eri, kumwail rong kepitie oh idawehn ie, oh kumwail pahn wia aramas saledek, oh kumwail sohte pahn ahneki kosonned kan ahpw ei kosonned kan ahnsou me I pahn sapahldo, pwe ngehi me wia amwail soun koukosonned, oh dahme pahn kak kauhdi pehi kat?
23 Ahpw, mehlel I ndahiong kumwail, padahkihong emen emen nin duwen pwukoahn ohpis me I malipehiong kumwail loale;
24 Oh kumwail koaros en kin wahuniki riomwail akan duwehte pein kumwail, oh kaiahnehkin kumwail mour mwakelekel oh mour sarawi mwohi.
25 Oh I pwurehng ndahiong kumwail, kumwail wahuniki riomwail akan duwehte pein kumwail.
26 Pwe soangen ohl dahmen rehmwail me nainiki pwutak ehk riemen, oh kin sohte lipilipil ki emen irail, oh irail kin peikiong papah ih, oh e ahpw ndahiong emen irail: Likawiada likou puhp wet oh mwohndi wasaht; oh ong emen irail: likawiada likou tok wet oh mwohndi mwo—oh ahpw kilang nah pwutak kan oh nda I wia ohl pwung men?
27 Kilang, met I kihong kumwail nin duwen karasaras ehu, oh iei ih mwomwen ngehi met. I ndahiong kumwail, kumwail wiahla ehu; oh ma kumwail sohte pahn wiahla ehu kumwail sohte wia nei aramas.
28 Oh met, I ndahiong kumwail me imwintihtio me mih nan pere rir kan raparapahki amwail mour kan.
29 Kumwail kin rong mahwin kan nan wehi doh kan, oh kumwail kin nda me kereniongehr mahwin lap akan pahn wiawi nan wehi doh kan, ahpw kumwail sohte ese audepen nan mohngiongen aramas en nan sapwamwail akan.
30 I ndahiong kumwail mepwukat pwehki amwail kapakap akan; eri, kumwail nahkpene oh pwoalepene eripit, pwe suwed en aramas akan e de kapwarahiong kumwail mepwukat sang ni arail wiewia suwed kan, ni mwohmw ehu me pahn koasoiwei nan salengamwail kan ni ngihl ehu me pahn katairong sang me pahn itikada sampah; ahpw ma kumwail pahn kaunopada kumwail sohte pahn masak.
31 Oh pwe kumwail en kak pitsang manaman en imwintihtio, oh pwurepene rehi wia aramas mour pwung kei, sohte samin oh sohte dipan—
32 Eri, pwehki kahrepe wet I kihong kumwail kosonned me kumwail pahn kohla Ohio; oh wasahu I pahn kihong kumwail ei kosonned; oh wasahu kumwail pahn alehdi manaman sang powe;
33 Oh sang wasahu, mehmen me I kupwuriki pahn pekederwei nan wehi kan koaros, oh e pahn kohieng irail dahme irail pahn wia; pwe mie ahi doadoahk kesempwal ehu me wie nekinek, pwe Israel pahn komourla, oh I pahn kahluwairailla sohte lipilipil wasa me I kupwuriki, oh sohte manaman me pahn kauhdi pehi kat.
34 Oh met, I patohwan kihong mwomwohdiso nan wasa pwukat kosonned ehu, me ekei ohl akan sang nan pwungarail en idihdida, oh irail pahn idihdida sang ni ngihl en mwomwohdiso;
35 Oh irail pahn kilang me semwehmwe oh anahn, oh sowese irail en maiauda pwe irail en dehr lokolok; oh kadariraila wasahu me I pahngokiong irail;
36 Oh met iei arail doadoahk, ren apwalih doadoahk kan me pid soahng kan me mwomwohdiso ahneki.
37 Oh irail akan me ahneki mwaht kan me sohte kak netila, irail en kohsang de rendla nin duwen arail kilang me mwahu.
38 Tehk mwahu me soahng koaros nekinekla mwahu; oh ahnsou me aramas akan alehdi manaman sang powe oh pekederwei, soahng pwukat koaros pahn kohpene oh mwomwohdiso pwolepene.
39 Oh ma kumwail rapahki pai kan me Sahmo ketin kupwuriki ketkihong kumwail, kumwail pahn wiahla aramas keieu paiamwahu nanpwungen aramas koaros, pwe kumwail pahn tungoalenki pai kan me poatoapoat; oh ni mehlel ngehi me tungoaleniki pai kan en sampah oh pahn kihwei; ahpw kumwail kaparikin kumwail pohnmwahso, pwe kumwail de duwehla Mehn Nihpai kan en mahso.
40 Oh I pwurehng ndahiong kumwail, I kihong kumwail kosonned ehu, me aramas koaros, elder kan, samworo kan, sounpadahk kan, oh pil towe kan, en kohkihwei arail kak, iangahki doadoahngki pehrail kan, en kaunopada oh kapwaiada soang kan me I mahsaniher.
41 Oh mweidehng amwail kalohk kan en wia ngihl en keper, emen emen aramas ong mehn mpe, ni meleilei oh ohpampap.
42 Oh kumwail pidohisang rehn me suwed kan. Kumwail kapitkumwailla. Kumwail akan me wewa sapwellimen Kauno dipwsou kesempwal akan kumwail kamwakeleikumwailda. Iei met mehlelo. Ahmen.