Iralaud 50
Soukohp Sosep Smith alehdi kaudiahl nan Kirtland, Ohio, Mei 9, 1831. Nan poadoapoad en Sosep Smith kasalehda me ekei elder kan sohte wewehki duwen kadehde sansal kan en wekpeseng en ngehn akan me kipehdi sampah oh me kaudiahl wet pahn kasalehda pasapengpen ah kalelapak ong ire wet. Soangen koasoiepen palingehn me sohte rek rehn toweh kan, ekei irail kin nda me irail alehdi ouraman kan oh kaudiahl kan.
1–5, Diren ngehn likamw kan kin kipehdi sampah; 6–9, Meid suwediong irail mwalauhn akan oh irail kan me pekousla sang Mwomwohdiso; 10–14, Elder kan pahn kin padahngki rongamwahuo sang ni Ngehno; 15–22, Koaros tohn padahk kan oh soun rongorong kan anahne en kamarainih sang ni Ngehno; 23–25, Me pahn sohte kin men kekeirda iei kaidehn sang rehn Koht; 26–28, Irail me pwoson kan me pahn kin sohsohki soahng koaros; 29–36, Kapakap kan en irail me mwakelekel me kin alehdi pasapengpe; 37–46, Krais me wia Silepen Sihpw Mwahu oh Poahsen en Israel.
1 Rong mwahu, kumwail elder kan en ai mwomwohdiso, oh rongorong mwahu ngilen Koht ieiaso; oh kin ansou koaros rongorong ngilen mahsen en eripit kan me pahn kin kohieng kumwail, nin duwen amwail kin peki oh pwungkipene nin duwen mwomwohdiso, oh ngehn akan me kohpesengehr nan sampah.
2 Kilang, mehlel I ndahiong kumwail, me mie diren ngehn akan me wia ngehn likamw akan, me kowehr pohn sampah, oh pitipitihdi sampah.
3 Oh pil Sehdan songosong en pitihkumwaildi, pwe en kak poweikumwaildi.
4 Kilang, Ngehi, Kauno, me mwahngiher duwen kumwail, oh kilangehr wiewia suwed kan nan mwomwohdiso me kalohngki ni mwarei.
5 Ahpw meidpai irail kan me pwoson oh kolokol tengedi nan arail pwoson, nan mour wet de ni mehla, pwe irail pahn sohsohki mour soutuk.
6 Ahpw meidsuwediong irail kan me widing oh mwalauhn kan, pwe, Kauno ketin mahsanih, I pahn wadohng irail nan kopwung.
7 Kilang, mehlel I ndahiong kumwail, mie me mwalauhn nanpwungamwail, me pitihdier ekei, me kihong sounkasongosongo manaman; ahpw kilang irail pahn pwurehng weliakapwala.
8 Ahpw me mwalauhn akan pahn dierekda oh pahn lekdekla, nan mour wet de ni mehla, nin duwen me I kupwuriki; oh meidsuwediong irail kan me lekdeklahsang nan ai mwomwohdiso, pwe iei irailkau me sampah poweiraildi.
9 Eri, mweidohng emen emen aramas en keperkinirail arail wiewia kan me sohte mehlel oh sohte pwung mwohn sihlangi.
10 Oh kohdo met, Kauno ketin mahsanih, sang ni Ngehno, ong irail elder kan en sapwellime mwomwohdiso, oh kitail en koasoakoasoipene, pwe kumwail en kak wewepene mwahu;
11 Kitail en koasoakoasoipene duwehte ohl emen eh kin koasoieng emen ohl ni ara kin koasoi kilengpene.
12 Met, ni ansou me ohl emen kin kaweweh mwahu ah koasoi ah ih ohl wehweh men, pwehki e koasoi nin duwen ohl emen; iei pil duwehte Ngehi, Kauno, kin kaweweh mwahu ai koasoi ong kumwail pwe kumwail en kak wewehki.
13 Eri, Ngehi Kauno pahn idek rehmwail kalelapak wet—soangen pwukoah dah me kumwail ahniki?
14 En kalohngki ai rongamwahu sang ni Ngehno, iei Soun Kaloalemwahuo me pekederdo pwehn padahngki me mehlelo.
15 Oh kumwail ahpw alehdier ngehn akan me kumwail sohte kak wewehki, oh kumwail alehdier sang Koht; oh sang ni met kumwail itarikier?
16 Kilang kumwail pahn pein sapeng kalelapak wet; ahpw, pwehki sang ni kupwurkalahngan me I pahn ketkihong kumwail; mehmen me ahniki luwet nan pwungamwail pahn kehlaila.
17 Mehlel I ndahiong kumwail, ih me kin alehda pwukoah sang rehi oh kohla padahngki mahsen en me mehlelo sang Soun Kaloalemwahuo, ni Ngehn en mehlelo, e kin padahngki sang ni Ngehn en mehlelo de ni ehu soangen wiepe?
18 Oh ma e sang ni ehu soangen wiepe eri kaidehn sang rehn Koht.
19 Oh pil ehu, ih me kin alehda mahsen en me mehlelo, e kin alehda sang ni Ngehn en mehlelo de sang ni ehu soangen wiepe?
20 Ma e sang ni ehu soangen wiepe eri kaidehn sang rehn Koht.
21 Eri, dahme kahrehda kumwail sohte kak wewehki oh esehki, me ih me kin alehda mahsen sang Ngehn en mehlelo kin alahldi nin duwen kalohk me kin wiawi sang ni Ngehn en mehlelo?
22 Eri, ih me kin kalohngkio oh me kin alehdio, kin wewehki emen emen, oh ira koaros kin kamarainda emen emen oh pereperenpene nan pwungara.
23 Oh me kin sohte men sawas kamarainiada emen iei kaidehn sang rehn Koht, oh iei rotorot.
24 Me kin sang Koht iei marain; oh me kin alehda maraino, oh kin loaloapwoatehng Koht, pahn alehda pil ekei marain; oh marain en maraino pahn lalaudla oh maramarain lao lel rahn me e pahn unseklao.
25 Oh pil ehu, mehlel I ndahiong kumwail, oh I nda pwe kumwail en kak esehda me mehlelo, pwe kumwail en kak pwakiasang rotorot nan pwungamwail;
26 Ih me kin alehda pwukoah sarawi sang Koht oh kohla wia, aramaso pil kin pilipilda en lapalapala, itarete e sohte nohn kesempwal oh wia sounpapahn aramas koaros.
27 Eri, ih me kohwahki soahng koaros; pwe soahng koaros kin dokehte ih, koaros nanleng oh pohn sampah, mour oh marain, Ngehn oh manaman, me pekederdo sang ni kupwuren Sahmo sang Sises Krais, sapwellime Iehros.
28 Ahpw sohte ohl emen kak kohwahki mehkoaros ihte ma e mwakelekeldahr oh kamwakelsang nan dihp koaros.
29 Oh ma kumwail mwakelekeldahr oh kamwakelsang nan dihp koaros, kumwail kak peki sohte lipilipil dahme kumwail kupwuriki ni mwaren Sises oh e ahpw pahn pweida.
30 Ahpw ese met, e pahn ketkihong kumwail dahme kumwail peki; oh ni ansou me kumwail pahn pilipilda ong en wia soun kaweid, ngehn akan pahn tihda pohmwail.
31 Eri, ansouo ahpw pahn lelledo, me ma kumwail kilang ngehn ehu me pwarada me kumwail sohte wewehki, oh kumwail sohte alehda ngehno, kumwail pahn peki rehn Sahmo ni mwaren Sises; oh ma e sohte ketkihong kumwail ngehno, eri kumwail pahn ese me e kaidehn sang Koht.
32 Oh e pahn kiheng kumwail, manaman en powehdi ngehno; oh kumwail pahn kalohngki ni ngihl laud uhwong ngehno me e sohte kohdosang rehn Koht—
33 Sohte pahn mih ni wiepen lahlahwe, pwe kumwail dehr kak powehdi, ni mwohmwen pohnmwahso de ngilen pereniki, pwe mepwukat dehr poweikumwaildi.
34 Mehmen me alehdi mehkot sang rehn Koht, mweidohng en pein diarada me e sang rehn Koht; oh mweidohng en perepereniki eh diarada me e warohng Koht me e alehki.
35 Oh sang ni tetehk mwahu oh wihwia mepwukat me kumwail alehdier, oh me kumwail pahn pil alehdi mwurin met—oh wehio me Sahmo ketkihong kumwail, oh manaman en powehdi mehkoaros me sohte kamanamansang ih—
36 Oh kilang, mehlel I ndahiong kumwail, meidpai kumwail me met wie rongorong ai mahsen pwukat sang nan ewen nei sounpapah, pwe dipemwail kan lapwaikumwaildahr.
37 Mweidohng nei sounpapah Sosep Wakefield, me I kin kupwurperenki, oh nei sounpapah Parley P. Pratt en kowei nan pwungen mwomwohdiso kan oh kakehlailih irail ki mahsen en peneu en kakehlail.
38 Oh pil nei sounpapah John Corrill, de nei sounpapah tohto kan me alahldahr ong pwukoah doadoahk wet, oh mweidohng irail en doadoahk nan mwahto; oh dehr mweidohng emen aramas en song kauhdi dahme I kihong irail en wia—
39 Eri, ni meh wet nei sounpapah Edward Partridge sohte itariki; ahpw mweidohng en koluhla oh e ahpw lapwadasang nan dipe.
40 Kilang, kumwail pwihn tikitik kei oh kumwail sohte kakehng soahng koaros ansou wet; kumwail anahne kalaudehla amwail kaping kalahngan oh maraihnkihla me mehlelo.
41 Dehr masak, kumwail pwihn tikitik kan, pwe nei kumwail, oh I powehdier sampah, oh kumwail kisehn irail me Semeio ketkihong ie;
42 Oh sohte emen nan pwungarail me Semeio ketkihong ie pahn salongala.
43 Oh Sahmo oh Ngehi ehu. I mih rehn Sahmo oh Sahmo ketiket rehi; oh ni amwail aleiedahr, kumwail mihmi nan mongiongi oh Ngehi nan mongiongemwail.
44 Eri, I mihmiher rehmwail, oh Ngehi me wia silepen sihpw mwahuo, oh poahsen en Israel. Mehmen me pahn kawada pohn paip wet sohte pahn pwupwidi.
45 Oh rahno pahn kohdo ansou me kumwail pahn rong ngilei oh kilang ie, oh ese me ih Ngehi me.
46 Mwasamwasahn, pwe, kumwail en kak onopada. Iei ni mehlel. Ahmen.