1 Rong mwahu, kumwail elder kan en ei mwomwohdiso, oh kaieng salengemwail ei mahsen, oh esehla duwen ngehi dahme I kupwuriki ong me pid duwen kumwail, oh pil me pid duwen sahpw wet me I kadar kumwailwehng.

2 Pwe mehlel I ndahiong kumwail, meidpai me kin momouriki ei kosonned akan, nan mour wet de mwurin mehla; oh mehmen me kin loaloapwoat ni ansou en lokolok laudo, e pahn ale ketingpe me laud kowahlap nan wehin nanleng.

3 Kumwail sohte pahn kak kilangki pein mesemwail kan, ong ahnsou wet, koasondi en amwail Koht duwen soahng kan me pahn kohdo mwuhr, oh lingan me pahn idawehndo mwurin lokolok laudo.

4 Pwe mwurin lokolok laud kan a kapai kan kin kohdo. Eri rahno pahn kohdo me kumwail pahn kamwaramwarkihdi lengileng lingan laud; awahu saikinte, ahpw e kereniongehr.

5 Tamataman met, me I mahsanihong kumwailehr mwowehu, pwe kumwail en kak mehlehliki nan mongiong, oh ale dahme pahn kohdo mwuri.

6 Kilang, mehlel I ndahiong kumwail, ong ni kahrepe wet me I kadar kumwailkihwei—pwe kumwail en kak peik, oh pwe amwail mongiong kan en kak kaunopada en kadehdehki soahng kan me pahn kohdo;

7 Oh pil pwe kumwail en kak ahniki wahu en kawada poahsono, oh kadehdehki rekohd en sahpw me Saion en Koht pahn mih ie;

8 Oh pil pwe kamadipw ehu en sahk keieu kaselel kan en kak kaunopada ong me semwehweh kan; ei, kamadipw en sahk keieu kaselel kan, en wain keieu iou, pwe sampah en kak ese me mahsen en soukohp akan sohte likamw;

9 Ei, kamadipw en tehnpas en Kauno, me kaunopadahr mwahu, ong wehi kan koaros me pahn lukodohng.

10 Keieu, me kopwehpweh oh me loalokong, me eripit oh sohpeidi;

11 Oh mwurin rahn en ei manamano pahn lelledo; me semwehmwe, me mwoator, oh me maskun, oh me salengepon, ahpw pahn iang patehng kapwopwoud en Sihmpwulo, oh iang tungoal ni kamadipw lapalap en Kauno, kaunopadahng rahn lapalap en ketido.

12 Kilang, Ngehi, Kauno, me mahsaniher met.

13 Oh pwe kadehdehu en kak kohsang Saion, ei, sang ni ewen kahnihmw en sapwellimen Koht aramas pilipildah kan—

14 Ei, ong ni kahrepe wet me I kadarkumwailkihwei, oh piladahr nei ladu Edward Partridge, oh idiadahr ih en wia ah doadoahk nan sahpw wet.

15 Ahpw ma e sohte pahn koluhkihla dipeh kan, me iangahki ah soupwoson oh nan kapehd keptakai, en kanahieng pwe ede pwupwidieng nan dihp.

16 Kilang ah doadoahk kohiengehr ih, oh e sohte pahn pwurehng kohieng.

17 Oh mehmen me ale doadoahk wet iei e idihdahngehr en wia sounkopwung en Israel, me duwehte nan mweihn kawahko, pwe en nehkpeseng sahpwen sohsoh kan en Koht ong sapwellime seri kan;

18 Oh en kapwung nah aramas akan sang ni kadehde pwung, oh sang ni sawas en nah sounkaweid kan, nin duwen kosonned akan en wehio me alahldisang soukohp akan en Koht.

19 Pwe ni mehlel I ndahiong kumwail, ei kosonned pahn momour nan sahpw wet.

20 Dehr mweidohng emen ohl en medewe me ih me kaun; ahpw mweidohng Koht en kaunda me wia sounkopwungo, nin duwen kaweid me pein ih kupwuriki, de, me pil wewehki, ih me wia sounkaweid de me kin mwohd pohn sehr en kopwungo.

21 Dehr mweidohng aramas emen en kawehla kosonned akan en sahpwo, pwe mehmen me kin kapwaiada kosonned kan en Koht sohte anahne en kin kawehla kosonned en sahpw akan.

22 Eri, peikiong pwuhng en wehi kan me mie, lao eh pahn kaunda me ahniki pwuhng en kaunda, oh kalowehdi imwintihti kan koaros pahn aluweluwe kan.

23 Kilang, kosonned akan me kumwail patohwan alehdier sang nin limei kan wia kosonned akan en mwomwohdiso, oh nan marain wet me kumwail pahn kolokol kowei. Kilang, met iei eripit.

24 Oh met, ni ai koaskoasia duwen nei ladu Edward Partridge, sahpw wet iei wasahn ah kouson, oh irailko me e idiadahr en wia nah sounkaweid kan; oh en pil wia sapwen ih me I idiadahr en kin apwahpwali ahi wasahn nahk;

25 Eri, mweidohng irail en wahdo arail peneinei kan nan wehi wet, ni arail pahn kin kaukauweidpene nan pwungen irail oh ngehi.

26 Pwe kilang, e sohte konehng ien kin ruwese soahng koaros; pwe mehmen me kin idihdiong en wia mehkoaros, aramaso me pohnkahke oh sohte wia sounpapah loalokong men; ihme kahrehda e sohte pahn ale ketingpen ah doadoahk.

27 Mehlel I mahsanih, me aramas akan anahne inangih en kin patehng mehkot mwahu, oh wia soahng tohto kan sang arail pein saledek, oh kin kasalehda doadoahk tohto pwung mehlel kan;

28 Pwe manamano mihmi rehrail, ihme kahrehda irail pahn kin pein weliandi pein irail. Oh ni aramas akan arail pahn kin wia me mwahu, ketingparail kan sohte pahn kin sohrala.

29 Ahpw mehmen me pahn kin sohte wia mehkot lao emen pahn ndahieng, oh kin alehdi kosonned ehu ni peikasal, oh wie kolokol pwehki ah pohnkahke, aramaso pahn lekdekla.

30 Ihs ngehi me kapikada aramas, Kauno ahpw mahsanih, me pahn nda me sohte dipe ahpw e sohte kin kapwaiada ahi kosonned akan?

31 Ihs ngehi, Kauno ahpw mahsanih, me wiadahr inou kan oh sohte kin kapwaida?

32 I mahsanih oh aramas sohte peikiong; I kasohrehla oh irail sohte alehdi kapai kan.

33 Irail ahpw koasoia nan arail mongiong kan: Kaidehn doadoahk en Kauno met, pwe sapwellime inou kan sohte pweida. Ahpw meidsuwediong irail kan, pwe ketingparail kan rukrukih irail nan ehl, oh kaidehn sang nanleng.

34 Oh met I pahn ketkihong kumwail iren kaweid kan me pid duwen sahpw wet.

35 Sang ni ei eripit me nei ladu Martin Harris anahne en wia karasaras ong mwomwohdiso, ni ah pahn kihdiong nah sent kan mwohn pisop en mwomwohdiso.

36 Oh pil, kosonned wet iei ong emenemen aramas akan me pahn kohdo nan sahpw wet pwe en alehdi sapwen sohsoh; oh e pahn wiahng nah sent kan nin duwen me kosonnedo ruwesehki.

37 Oh pil sang ni eripit me anahne en mie sahpw akan nan Independence en pweipweida, ong ni wasahn nahk, oh pil ong ni ihmw en prinding.

38 Oh ekei mehn kaweid kan me pid duwen nei ladu Martin Harris pahn kohieng ih sang ni Ngehno, pwe en kak pil alehdi sapwen sohsoh ni wasa me e kupwuriki;

39 Oh mweidohng en koluhkihla dipeh kan, pwe e kin rapahki kaping sang sampah.

40 Oh pil mweidohng nei ladu William W. Phelps en mihmi nan pwukoah me I idiadahngehr loalle, oh ale ah sapwen sohso nan sahpwo;

41 Oh pil e anahne koluhla, pwe Ngehi, Kauno, sohte nohn kupwurpereniki ih, pwe e rapahki en sikila, oh e sohte nohn ahniki aktikitik mwohi.

42 Kilang, mehmen me koluhkihlahr dipeh kan, aramaso pahn ale mahkepen dihp, oh Ngehi, Kauno, sohla pahn tamataman dipeh kan.

43 Sang ni met kumwail en ese ma aramas emen kolukihla dipeh kan—kilang, e pahn wehkada dipeh kan oh sohpeisangirailla.

44 Oh met, mehlel, I koasoia duwen irail elder kan me luwehdi nan ahi mwomwohdiso, ahnsou saikinte lelledo, ong pahr ngeder, ong irail en ale arail sapwen sohso nan sahpw wet, ihte ma irail ahniki ineng sang ni kapakap en pwoson, ihte ni e pahn kak idihdahng irail sang Kauno.

45 Pwe, kilang, irail pahn nantihong kapokonepene aramas akan sang ni keihmw kan en sampah.

46 Eri, kapokonei kumwailpene; oh irail kan me sohte idihda pwe en mihmi nan sahpw wet, mweidohng irail en kalohngki rongamwahuo nan sahpw akan me kapilpene; oh mwurin mwo mweidohng irail en pwuralahng nimwarail kan.

47 Mweidohng irail en kalohk kowei, oh wie kadkadehdehki me mehlelo ni wasah kan koaros, oh peki rehn me kopwehpweh, me lapalap oh me sohte lapalap, oh me somwehmweh en koluhla.

48 Oh mweidohng irail en kawada ihmw sarawih kan, ma tohnsampah kan pahn koluhla.

49 Oh mweidohng en mie weliepe me pahn idihda sang ni ngihl en mwomwohdiso, ong mwomwohdiso nan Ohio, en kak alehdi mwohni kan en pwainda sahpw akan nan Saion.

50 Oh I patohwan ketkihong nei ladu Sidney Rigdon kosonned ehu, me e pahn ntingihda duwen mwomwen sapwen Saion, oh mahsenpen kupwuren Koht, ni e pahn sansal ong ih sang Ngehno;

51 Oh kisin likou ehu oh kisin likou en kadehde, en kohieng ihmw sarawi koaros pwe en ale mwohni, en kohieng nan pehn pisop, reh de rehn weliepe, me e kupwuriki de me e kaweidkiheng, pwe en pwainda sahpw akan ong sapwen sohso ong seri en Koht akan.

52 Pwe, kilang, mehlel I ndahiong kumwail, Kauno ketin kupwuriki me tohnpadahk kan oh seri en aramas akan anahne ritingada arail mongiong kan, iei en pwainda sapwen wehi pwon wet, ni ansou karuaru me ahnsou pahn mweidada.

53 Kilang, iei eripit met. Mweidohng irail en wia met ma soh a irail sohte pahn alehdite ehu sapwen sohso, ihte ma sang ni kakerehdi nta.

54 Oh pil, ma e pahn mie sahpw me pahn alahldi, mweidohng en mie aramas en doadoahk sohte lipilipil en kohla pohn sahpw wet, en doadoahk ong souleng kan en Koht.

55 Mweidohng soahng koaros en wiawi nin duwen koasondi; oh en mie ansou mwahu en koadoahke sahpw akan en kak sansal nan ehu ehu ahnsou, sang pisop de weliepen mwomwohdiso.

56 Oh dehr mweidohng doadoahk en kapokonpene en mwadang wiawi, de sopohla; ahpw en wiawi sang kaweidpen elder kan en mwomwohdiso en nan kapokon lap kan, nin duwen eripit me irail kin alehdi sang ehu ehu ahnsou.

57 Oh mweidohng nei ladu Sidney Rigdon en keiehdi oh kasarwihla sahpw wet, oh wasa me tehnpas sarawi pahn kokouda, ong Kauno.

58 Oh mweidohng ehu mihting en kapokon lap en wiawi; oh mwurin mwo mweidohng nei ladu Sidney Rigdon oh Sosep Smith, Jun., en pwurodo, oh pil Oliver Cowdery en iang ira, pwehn kanekehla luwen doadoahk me I idiadahng irailehr nan pein sapwarail, oh luweh kan ahpw pahn wiawi sang ni kaweidpen kapokon lap kan.

59 Oh dehr mweidohng emen aramas en pwurasang sahpw wet ihte ma e pahn wia ah kadehde kowei, ong dahme e ese oh udahn kamehlele.

60 Mweidohng pwukoah me kohieng Ziba Peterson en kopwurupwursang ih; oh mweidohng ih en wiahte towe en mwomwohdiso, oh en doadoahk ki pein peh kan, rehn souleng kan, lao e itar en kak karakarala ong dipeh kan koaros; pwe e sohte wehkada dipeh kan, oh e medewe me e pahn ekihrailla.

61 Mweidohng elder kan me luwehdi nan mwomowhdiso wet, me pahn kodohng nan sahpw wet, ekei irail me ahniki kapai laud me inenen laud mehlel, pil kin wia kapokon nan sahpw wet.

62 Oh mweidohng nei ladu Edward Partridge en kaunda kapokon me pahn wiawi rehrail.

63 Oh mweidohng irail en pil pwurodo, kalkalongki rongamwahuo kowei, kadkadehdehki soahng kan me kin sansalohng irail.

64 Pwe, mehlel, ngihlo anahne en kowei sang ni wasa kiset kowehng sampah pwon, oh lel ni wasa doh kan en sampah—rongamwahuo anahne en kalohk ong aramas koaros, oh kilel kan pahn kin idawehn irail kan me kin kamehlele.

65 Oh kilang Nein-Aramas pahn ketido. Ahmen.