Iralaud 31
Kaudiahl kohieng Soukohp Sosep Smith ong Thomas B. Marsh, nan Septempe 1830. Irair wet wiawi mwurinte kapokon ehu en Mwomwohdiso (tehk nan oaralap en iralaud 30). Thomas B. Marsh papidaislahr ni tepin sounpwungo oh kasarawilahr en wia emen elder nan Mwomwohdiso mwohn kaudiahl wet e alahldi.
1–6, Thomas B. Marsh malipilipdahr en kalohngki rongamwahuo oh inoukihong ih roson mwahu en eh peneinei; 7–13, E alehdi kaweid me en kanangamah, kalapw kapakap, oh idawehn Sounkaloalamwao.
1 Thomas, nei pwutak, meid pai kowe pwehki ahmw pwoson nan ei doadoahk.
2 Kilang, ke lelohngehr kahpwal tohto pwehki ahmw peneinei; ahpw, I pahn kapaiuhkada oh ahmw peneinei, ei, noumw me tikitik kan; oh rahno pahn kohdo me irail pahn kamehlele oh ese mehlelo oh ehuwonguhk nan ei mwomwohdiso.
3 Perenda nan ahmw mohngiong oh wie pereperen, pwe awahn ahmw misin lelledohr; oh lewemwen pahn lapwadekda, oh ke pahn kalohngki rongamwahu en peren mehlel ong dih wet.
4 Ke pahn kalohngki soahng kan me kasansalohngehr nei ladu, Sosep Smith, Jun. Ke pahn tepida padahk sang met kohla, ei, dolung wahn mwaht me pwetepwetlahr oh kaunopdahngehr isihsla.
5 Eri, idangehng noumw kamahn sang ni palingehn unsek, oh I pahn mahkehng dipemw kan, oh ke pahn kapaikada diren kapakap, pwe soundoadoahko warohng isepehu. Eri, ahmw peneinei pahn mourla.
6 Kilang, mehlel I ndahionguhk, kohsang irail ansou ekiste, oh kalohngki ei mahsen, oh I pahn kaunopada dewerail ehu.
7 Ei, I pahn ritingada mohngiong en aramas akan, oh irail pahn aleiukada. Oh I pahn wiahda ehu mwomwohdiso sang rehmw;
8 Oh ke pahn kakehlaka irail oh kaunopirailda ong ansouo me irail pahn kohpene.
9 Kanangamah nan kahpwal akan, dehr akamaiong irail me kin akamai. Apwalih ihmwomwo sang ni mpai, oh ahneki mour tengeteng.
10 Kilang, I ndahionguhk me ke pahn wia toahkte ong mwomwohdiso, ahpw kaidehn ong sampah, pwe irail sohte pahn alehiukada.
11 Kohkohwei wasa me I pahn mwahuki, oh e pahn kohieng uhk dahme ke pahn wia oh wasa me ke pahn kohla sang rehn Sounkaloalamwahuo.
12 Kalapw kapakap, pwe ke dehr lohdi nan kasongosong oh sohte alehdi isepem.
13 Loaloapwoat lao lel imwi, oh kilang, I pahn ieianguhk. Mahsen pwukat sohte kohsang rehn aramas emen de aramas ekei, ahpw sang rehi, iei Sises Krais, ahmwail Soundor