Irelaud 68
Soukohp Sosep Smith alehdi kaudiahl nan Hiram, Ohio, Nohpempe 1, 1831, ong pasapengpen kapakap me kasalehda en Kauno madamadau ong me pid Orson Hyde, Luke S. Johnson, Lyman E. Johnson, oh William E. McLellin. Itarete kisehn kaudiahl wet dokedoke ohl pahmen pwukat, ahpw palilaud en audepe kosoia duwen Mwomwohdiso pwon. Kaudiahl wet ahpw kalaudpeseng pahn kaweidpen Sosep Smith ni ansou me e ntingda nan edisin en Padahk oh Inou kan me wiawihda nan pahr 1835.
1–5, Mahsen en elder kan ni ansou me mwekidkihda sang Ngehn Sarawi wia iren pwuhk sarawi; 6–12, Elder kan en kalohk oh wia pepdais, oh kilel kan ahpw pahn idawehn me kin kamehlele kan; 13–24, Mesenih kan nanpwungen nein Aron pwutak kan pahn kak en wia Pisop me Kakaun (me iei, kolokol kih en presedensi ni ah wia pisop men) pahn kaweidpen Presedensi Keieu; 25–28, Pahpa oh nohno kan en padahkihong neirail serih kan rongamwahuo; 29–35, Souleng kan en kin wahuniki rahn en Sabad, doadoahk mwahu, oh kapakap.
1 Nei ladu, Orson Hyde, malipilipidahr sang ni ah kasarawihong en kalohngki rongamwahu poatoapoato, sang ni Ngehn en Koht ieias, en kalohk ong aramas akan pil kolahng aramas teikan, oh sang sahpw ehu kolahng ehu sahpw, nan kapokon kan en me suwed akan, nan arail mpwal kan, koskosoieng irail oh kauwahsak iren pwuhk sarawi kan koaros ong irail.
2 Oh, kilang, oh rong, met iei karasaras ong irail koaros me kasarawihong prihsduhd wet, me arail misin idihdahng irailehr en kowei—
3 Oh met iei karasaras ong irail, me irail pahn kalohk ni arail pahn kehn kaweid en Ngehn Sarawio.
4 Oh sohte lipilipil dahme irail pahn koasoia ni ansou me irail kehn Ngehn Sarawio e pahn wiahla iren pwuhk sarawi, e pahn wia kupwuren Kauno, e pahn wia iren madamadau en Kauno, e pahn wia mahsen en Kauno, e pahn wia kepitien Kauno, oh manaman en Koht ong komourpen sapwellime aramas akan.
5 Kilang, met iei inou en Kauno ong kumwail, kumwail nei ladu kan.
6 Eri, kumwail koapwoaroapwoar, oh dehr masak, pwe Ngehi Kauno ketiket rehmwail, oh pahn utung kumwail; oh kumwail pahn kadehdehkin ie, iei Sises Krais, me Ngehi me wia Ieros en Koht ieiaso, me Ngehi mwo, me Ngehi met, oh me I pil pahn kohdo.
7 Iei met mahsen en Kauno ong kumwail, nei ladu Orson Hyde, oh pil ong nei ladu Luke Johnson, oh ong nei ladu Lyman Johnson, oh ong nei ladu William E. McLellin, oh ong elder loaloapwoat kan en ei mwomwohdiso—
8 Kumwail kowei wasa koaros nan sampah, kalohngki rongamwahuo ong aramas koaros, doadoahngki mweimwei me I ketkihong kumwail, pepdais irail ni mwaren Sahm, oh Sapwellimeu, oh Ngehn Sarawi.
9 Oh mehmen me kamehlele oh pepdaisla pahn komourla, oh mehmen me sohte kamehlele pahn lekidekla.
10 Oh mehmen me kamehlele pahn kapaikihda saihn kan me pahn idawehndo, iei me ntingdier.
11 Oh ong kumwail e pahn kohieng en ese saihn kan en ahnsou, oh saihn kan en ketidohn Nein-Aramas;
12 Oh uwen tohto me Sahmo pahn kadehdehki, ong kumwail e pahn kiheng manaman en katengeirailpene ong mour soutuk. Ahmen.
13 Oh met, me pid duwen ireh kan me kapatapatieng inou sarawi kan oh kosonned akan, iet irail kan—
14 Mie ekei mwurin met, Kauno pahn ketin koasonehdi ahnsou me konehng, ekei pisop kan en kasarawiala ong mwomwohdiso, en udahn papah duwehte keieun pisopo;
15 Eri irail pahn wia samworo lapalap ekei me warohng, oh irail pahn idihda sang Presedensi Keieu en Melikesidik Prihsduhd, ihte ma irail wia kadaudok mehlel en Aron.
16 Oh ma irail wia kadaudok mehlel en Aron irail ahneki pwuhng en kosonned ong ohpis en pisop, ma irail wia mesenih en nein Aron pwutak kan;
17 Pwe mesenih kin kolokol pwuhng en presedensi pohn prihsduhd wet, oh kih kan de mweimwei en pwukoahn ohpis duwepenehte.
18 Sohte aramas emen ahneki pwuhng en kosonned ong ohpis wet, en kolokol kih kan en prihsduhd wet, ihte ma e wia kadaudok mehlel oh mesenih en Aron.
19 Ahpw, sang ni samworo lapalap en Melikesidik Prihsduhd ahneki manaman en wia doadoahk en ohpis tikitik kan koaros me e pahn kak wia nan ohpis en pisop ni ansou me sohte kadaudok mehlel en Aron kak dierek, ma e malipilipiong oh idihdahng oh kasarawihong manaman wet, sang ni pwilikihdi en peh kan en Presedensi Keieu en Melikesidik Prihsduhd.
20 Oh kadaudok mehlel en Aron men, pil, anahne en pilipildahsang Presedensi wet, oh anahne en warohng, oh keidi, oh kasarawiala sang ni pwilikihdi en peh kan en Presedensi wet, ma soh a irail sohte ahneki mweimwei en doadoahngki arail prihsduhd.
21 Ahpw, sang ni poahsoan en kalohk me pid duwen arail pwuhng en prihsduhd me kasapwilidi sang pahpa ong nah pwutak, irail kak rapahki arail pwuhng en keidi ma irail kak kasalehda me irail wia kadaudoke ni sohte lipilipil ahnsou, de en diarada sang ni kaudiahl sang Kauno sang ni pwilikihdi en peh kan en eden Presedensi.
22 Oh pil, sohte pisop de samworo lapalap emen me pahn idihda ong pwukoahn papah wet pahn song de lekidengkihla pwehki sang ni dihp sohte lipilipil, ihte mweidohng en wiawi mwohn Presedensi Keieu en mwomwohdiso;
23 Oh ma e dierekda me e dipaniki mwohn Presedensi wet, sang ni kadehde me met e sohte kak en mie repenpwung wiawihong, e pahn ale kalokepe;
24 Oh ma e koluhla e pahn ale lapwepen dipe, nin duwen inou sarawi kan oh kosonned akan en mwomwohdiso.
25 Oh pil, ni ahnsouohte ma pahpa oh nohno kan me nainiki seri kan nan Saion, de sohte lipilipil nan ah steik kan me soandier, me sohte padahkihong irail en wewehki padahk en koluhla, pwoson Krais Ieros en Koht ieiaso, oh pepdais oh kisakis en Ngehn Sarawi sang ni pwilikihdi en peh kan, ni ansou irail sounpar waluh, dihpo pahn mihmi pohn arail pahpa oh nohno.
26 Pwe met en wia kosonned ehu ong tohn kouson kan en Saion, de nan ah steik sohte lipilipil kan me soandier.
27 Oh neirail serih kan en pepdaisla ong lapwepen diperail kan ni ansou me irail pahn lel sounpar waluh, oh alehda pwilikihdi en peh kan.
28 Oh irail pahn pil padahkihong neirail serih kan en kapakap, oh weweidki mour pwung mwohn Kauno.
29 Oh tohn kouson kan en Saion pahn pil wauneki rahn en Sabad oh wiahki rahn sarawi.
30 Oh tohn kouson kan en Saion pil pahn tamataman arail doadoahk kan, ongete ma irail idihda en doadoahk, ni loaloapwoat koaros; ong me dangapauhro Kauno pahn tamatamante.
31 Met, Ngehi, Kauno, sohte nohn pereniki tohn kouson kan en Saion, pwe mie me dangapauhr nanpwungarail; oh neirail serih kan pil wie kekeirda nan wiewia suwed; irail pil sohte inangih en rapahki pai kan me poatoapoat, ahpw meserail kan me diren noahrek.
32 Mepwukat e sohte konehng, oh anahne en kesehsang irail; eri, mweidohng nei ladu Oliver Cowdery en wahwei mahsen pwukat nan sapwen Saion.
33 Oh kosonned ehu me I ketkihong irail—me mehmen me sohte pahn wia ah kapakap kan mwohn Kauno nan ahnsou me konehng, mweidohng en wia mehn kataman mwohn kopwung en nei aramas akan.
34 Mahsen pwukat me mehlel oh poatoapoat; eri, dehr sapeikihong irail, de pil kihsang mehkot.
35 Kilang, Ngehi me Alpa oh Omeika, oh I pahn mwadang leledo. Ahmen.