Irelaud 71
Soukohp Sosep Smith oh Sidney Rigdon alehdi kaudiahl nan Hiram, Ohio, Tihsempe 1, 1831. Soukohpo pousehlahte kaweweh Paipel oh Sidney Rigdon me kin soun ntingihdi lao kaudiahl wet alahldi, oh ni ahnsouo kawewe uhdi ong lepin ahnsou pwe ira en kak kapwaiada mahs kaweid kan me sansal nan kaudiahl wet. Ira en kohwei kalohk pwe ira en kameleileidi pepehm en uhpeneh kan me pwaradahr me uhwong Mwomwohdiso pwehki sang ni kisin likou kan me Ezra Booth ntingiada oh kadarpeseng, ni ah soikalahr mwomwohdiso.
1–4, Sosep Smith oh Sidney Rigdon pekederlahr en kalohngki rongamwahuo; 5–11, En Souleng kan imwintihtih kan pahn sarohdi.
1 Kilang, Kauno me mahsaniher met ong kumwa nei ladu Sosep Smith, Jun., oh Sidney Rigdon, me mehlel ahnsouo lelledohr me anahnepehier oh konehngehr ong ie me kumwa en kihpeseng ewemwah kan oh kalohngkihwei ei rongamwahu, audepeh kan en wehio, kauwahsak me rir kan en iren pwuhk sarawi kan, nin duwen me ekis kisehn Ngehno oh manaman me pahn kohieng kumwa, me I kupwuriki.
2 Mehlel I mahsanihong kumwa, en kalohk ong sampah nan wasah kan me kapilpene, oh pil nan mwomwohdiso, ong nan ereihn ahnsou ehu, iei lao e pahn sansalohng kumwa.
3 Mehlel met e wia misin ehu ong ereihn ahnsou kis, me I ketkihong kumwa.
4 Eri, kumwa doadoahk nan ei mwetuwel. Eker aramas akan en tohn sampah, oh kadehdehki, oh kaunopada ahl ong kosonned akan oh kaudiahl akan me pahn kohdo.
5 Ansou wet, kilang iei eripit met; mehmen me pahn wadek, mweidohng en wewehki oh pil alehda;
6 Pwe ohng ih me alehda e pahn ale laudsang, ah manaman pahn pil laudla.
7 Eri, kasarowehdi amwail imwintihtih kan; eker irail en tuhwong kumwa mwohn sampah oh wasa rir; oh ni amwail pahn loaloapwoat arail namenek pahn sansalohng weipokon.
8 Eri, mweidohng irail en wahdo arail lokaia laud kan mwohn Kauno.
9 Mehlel, Kauno me mahsaniher met ong kumwa—sohte dipwisou en mahwin ehu me mie me wiawihda en uhwong kumwa me kak pweida.
10 Oh ma ohl emen pahn ngilaudehngkumwahda e pahn kamwomwala ni ahnsou ehu me I kupwuriki.
11 Eri, kapwaiada ei kosonned akan; irail me mehlel oh poatoapoat. Ihme pahn wiawi. Ahmen.